張先生o既禮服

奄尖o既張先生嚴VL d男禮無厘特別, 普通過普通, 所以上次係我揀衫時, 試極都未合心水, 真麻煩呢~~

就快到我confirm婚紗晚裝o既日子, 我呢幾日就係為咗張生o既禮服而煩惱, 究竟邊度有d特別d, 或者款式多d o既男禮租呢??? 如果別無他選, 只好退而求其次, 係返VL租就算吧~~

呢幾日係esdlife o既forum睇下別人o既留言, 睇下邊樹會有d好評o既男禮租借店, 有網友介紹係金都有一間店, 佢地d男禮確實與眾不同, 但係服務就好差,  講到個店員好串, 態度一d都唔客氣!

今日放工去金都攞帖, 順便去化妝個度揀件伴娘裙俾細妹(揀到件粉紅色短裙仔俾細妹啦, 簡簡單單得黎都幾好架), 跟住四圍逛下, 係無意之間, 自己就企咗係個間男禮租借店o既櫥窗, 點解會企咗係個度?! 咪就係因為張先生企咗係度講緊個電話囉~~ 係張先生講電話期間, 自己係度諗, 好無入去睇下, 但d人又話個店員態度差喎~~~  諗咗一輪, 結果, 抱住睇下又唔洗錢o既心態, 還是入咗去!!!

首先, 個男店員初初都無乜點理我地, 淨係叫我地隨便睇, 心諗咁仲好, 睇咗一輪佢先向我地介紹d款, 店員話有興趣可以試下, 於是試咗兩套, 兩套都係黑色, 着咗好似個d日頭係伯爵, 夜晚變吸血彊屍咁o既feel, 睇到我嘩嘩聲, 真係好fit身, 好正, 好型, 好特別呢~~ 與出面一般o既男禮店大大不同, 連張先生呢個奄尖o既新郎哥都話good good good呀!

跟住店員不斷幫張先生并d禮服, 佢地每套禮服都會襯返特定o既suit, 佢地唔鍾意客人自己并, 可能因為呢個原因, 所以網上d人話佢地串, 態度差吧~~ 其實個店員都係designer, 所以有d性格, 有自己o既一套, 但佢個套又確實幾good, d禮服同恤衫襯得非常good, 唔似一般個d得白色恤衫咁死板! 張先生不停換衫期間, 我同designer都幾好傾丫~~ 又不至於態度好差喎~~ 個designer o既口頭禪係: 我咩都唔理架, 最緊要係靚!!! 成晚佢講咗好多次呢~~

張先生這晚試咗差唔多八九套禮服(差d試得比我多呢), 好多套都好正, 本來打算租一套就算, 因為租一套都唔平($880一套, 死都唔肯減價), 仲要一定要係佢度訂造恤衫($350一件), 但係試埋白色個d禮服, 真係無得頂, 結果, 一生人一次做主角, 豁出去, 最緊要鍾意, 所以決定租兩套!!!

張先生個日實全場觸目啦~~  因為新娘一定係婚紗、晚裝, 呢個係人都知, 但張先生o既禮服, 就並非他人所估到呢~~~~~

喜帖

yeah!!! 今晚終於攞咗d喜帖啦~~

因為有好幾位姊妹、朋友都會睇我個blog, 為保持神秘, 都係唔post張相出黎, 等佢地有返d幻想o既空間先得, 當佢地收到張帖o既時候都會: 嘩...張帖又真係幾靚喎~~ (hehe......純粹個人幻想)

又辦妥一件事啦! 煩少樣嘢!

下星期要去酒樓寫菜單同商討佈置事宜至得, 我已經慢人一步啦! (有d唔開心), 因為同我同月同日同地點攞酒個pair新人已經同酒樓傾掂咗啦(俾個經理呃咗, 又話一個月前左右先寫菜...... =.=)

 

開飯啦~~~

我耐都無煮過飯仔啦!!! 出街食得多都好厭, 又唔健康, 於是尋晚放工同張先生拍住拖去逛街巿買餸煮飯!!!

今餐兩餸一湯: 煎紅衫魚、蜜糖豆炒牛肉同埋咸蛋肉片節瓜湯! (個湯係張先生嘅至愛)

今次終於好成功咁煎到條紅衫魚非常完整, d皮仲黐係魚度!   張先生都讚今次煎到條魚好靚呢~~ (好不容易先得到張先生嘅讚賞呀!)

點解咁講?!  因為之前試過煎紅衫魚同埋大眼雞, 點知煎完之後, 條魚d皮黐晒係鑊度, 條魚無咗d皮, 得d肉係度, 好肉酸呢~~~  經過媽咪嘅指教(媽咪煎親魚都煎得好靚架), 我今次終於成功啦!!!

姊妹手花(改良版)

因為之前問過幾位朋友嘅意見, 其中某幾位都話d葉太青綠, 太假, 所以提議換過第二種無咁青綠嘅葉!!! 於是趁住有空檔, 就嘗試換另一種葉!!!

改良前

改良後

大家覺得如何呢~~

我嘅口罩 =.=

好耐無見大家, 今次我pizza妹妹要告訴大家 ~~ 我好可憐呢~~~  

屬於我嘅口罩終於買咗啦~~ (真係要多謝ming姐姐囉!)

唉~~~~~~~ 當堂樣衰咗幾咁多呢~~~~~~~~~~~~~~~~~~~~~~~~~~~~~~~~~

終於影咗相啦 ^ ^

尋日, 天朗氣清, 終於影咗第二輯婚紗相啦~~

一大清早六點鐘起床, 八點鐘去到影相個度, 首先去咗海邊影相(鹽田某海灘), 跟住去公園(不知明嘅公園), 然後先返室內影! 影室外景好辛苦呢~~ 尤其是幾pair人一齊出去影, 出發又要等, 回程又要等, 浪費咗好多時間呢~~ 幫我影相個位攝影師要影兩pair呢, 去到海邊我同張先生影先, 影完就係度等等等, 因為有七八pair影呢! 好彩有風, 如果唔係真係等待時熱到爆炸呢~~

下晝兩點幾先返到店個度影室內景, 今次有6個造型: 室外婚紗、室內婚紗、晚裝、裙褂、唐裝同埋小鳳仙裝, d造型都好有趣呢~~ 個店員係咁推薦影韓服同埋宮廷, 但真係無興趣呢, 所以揀咗d中式嘅服飾黎影! 之前影過一輯, 乜都唔識, 任人擺佈, 今次有咗經驗, 識得點樣作出要求!!!

室外婚紗無乜選擇, 好不容易先揀到一件簡簡單單, 無乜花款, 清清地兼大拖尾嘅婚紗, 好彩係早揀咋, 其他真係揀唔落手呢~~

至於室內個婚紗look, 我同張先生都好鍾意呢個造型(下圖左), 完全係自己要求咁整, 好classic, 好靚呢~~ 擺酒個日都想整個咁上下嘅造型呢~~ 初初揀咗件婚紗都ok, 但其實一坐係度化妝時已留意到後面個公仔着住個件婚紗都幾靚, 但唔知試唔試得, 於是咪問個換衫姐姐可唔可以試, 但佢一味係度話: 唔係丫, 你着緊呢條都好靚呀, 個條可能無咁靚喎, 除出黎都有難度喎~~ (其實係佢自己懶遮) 但係我一輪"我想試"嘅攻勢下, 佢都無我乎, 係"有難度"嘅情況下攞件婚紗俾我試, 最後就係揀咗呢條!!!

至於上圖中間同右邊個個造型就係我同張先生嘅唐裝look啦~~ 張先生個look好搞笑呢~~ 之前係網上參考過其他新人影個d唐裝look, 有d女仔嘅造型好清樓女子feel呢, 我唔係咁鍾意呢~~ 所以揀衫時, 同換衫姐姐講我唔要清樓女子feel嘅衫, 於是佢就介紹咗呢件俾我(中間圖)! 張先生話我個look成個楊貴妃咁, 好有霸氣呢~~ 隔離左右d新人見到我地個look都覺得好搞笑, haha......

除咗呢個有趣look, 仲有一個裙褂look都好有趣, 褂就無乜特別, 最特別係我要求戴個個鳳冠霞佩, 睇電視就見得多, 親身戴就未試過, 同埋結婚都唔會有機會戴呢d嘢啦~~ 橫掂個度有, 咪戴黎影相玩下囉! 個頂嘢都幾重, 好驚佢會倒下來呢, 所以一步一驚心, 都唔敢點大動作呢~~ 隔離對情侶見我戴得咁過隱, 佢又戴住黎影呢~~ haha......

總結, 今次影相雖然辛苦, 一日影晒又頻撲, 非常攰呢~~ 但係影得都好開心, d造型又得意, 但係就唔知影出黎靚唔靚啦!!! 希望唔肉酸, 又唔好超靚啦! 希望唔會揀得太多相啦~~ 如果唔係又一筆錢囉!!!

迷你蓮蓉月餅

星期六買咗d新鮮o既蓮子整蓮蓉, 浸咗4個鐘, 就開始動工做蓮蓉, 原來做蓮蓉並非一件易事呢~~ 又要去芯, 又要煲林, 又要顏碎成蓉狀, 呢個步驟最麻煩, 要用力顏碎, 用搞拌機又唔得, 放咗入去都唔識郁, 用打蛋器搞, 又唔多見效~~ =.= 好辛苦呢, 顏到成蓉之後, 又要落鑊炒, 真係辛水辛汗呢~~ 結果, 都係唔多成功, 味道就直頭係蓮蓉味, 但質感就極唔似呢, 仲有d蓮子粒粒夾雜係度~~ =.=

           

已浸過夜o既蓮子                               完成o既蓮蓉(完全唔似出面街買現成個d=.=)

星期日早上趁住空檔, 未夠鐘出葵芳同joan午膳, 於是整埋另一半蓮子, 這次d蓮子浸咗成晚, 希望效果會好過之前整個d, 點知, 今次有點兒水水地咁, 於是把心一橫, 將尋晚整個d撈埋一齊落鑊炒, 希望無咁水狀, 結果都好少少, 實返dd呢~~ 但質感依然未有改善, 一d都唔滑, 仍然有粒粒呢~~ 究竟點解出面買現成個d整得咁靚呢?! 有咩竅門呢?! 經此一役, 原來蓮蓉係咁難整, 唔怪得之出面d材料店買現成都唔平啦!!!

同joan食飽飽之後就返屋企動工做蓮蓉月餅! 其實個餅皮好易整, 反而係個蓮蓉有難度~~ 唔怪得之出面買一盒月餅咁鬼貴呢~~ (貴在d蓮蓉o既製作功夫呢)

                      

烤焗前(白雪雪)                                   烤焗後(陣陣香味由焗爐傳出

)

     

製作完成o既月餅出爐啦!  

                  

來個近鏡俾大家睇睇!賣相係咪都ok呢?!

原本應該等幾日先食得, 因為要回油, 但係見到佢地咁靚, 屋企人同我都忍唔住, 試咗一個呢~~ 味道都唔錯, 個皮好香, 好似街買咁, 無街買o既月餅咁甜, 而且好有口感, 因為d蓮蓉仲有d蓮子粒, haha......

大家會唔會有個疑問, 點解有d咁深色, 有d咁淺色呢?!

假M?! 石女?!

星期六要返工, 係涼浸浸o既天氣下, 真係唔願起床呢~~~~

放咗工, 無無聊聊, 於是陪腹大便便o既大肚媽媽去咗金魚街買海綿, 然後一齊去食麵閑聊一番! 大肚媽媽告訴我, 原來初初出世o既bb女會有假m, 之前生大女時, 佢話發現亞女d "um" "um"入面有幾點紅, 想當年初為人母o既佢, 唔知點解會咁, 經醫生講解, 原來係媽媽過多咗d hormone俾bb, 所以bb出世之後, 好似大人咁會黎m, 當然唔會好似大人咁黎得"her her"聲啦, 只會係好少量, 呢個情況係正常o既~~ 所以呢個情況就叫做假m!!! 不過呢d情況只會出要係bb女身上!!!

大肚媽媽又告訴我, 咩叫做石女, 原來bb女出世之後, 幾個月o既時候去健康院時, 護士姐姐會除咗bb女條片片檢查陰部, 點解?! 原來有d人, 出世陰道口會閉塞, 要係一歲之前做手術通返, 所以護士姐姐要同b女做檢查呢~~ 原來生一個bb都有好多好多唔同o既事發生, 真係唔經歷過o既都唔識呢~~b女十月頭就出世啦, 唔知佢似大肚媽媽還是爸爸呢?! haha.....

陪咗大肚媽媽去搭車之後, 係花園街逛咗一陣, 目的只有一個, 就係想買3個又平又靚o既燈籠俾張先生o既姪仔姪女, 因為每年都會買俾佢地, 所以今年亦不例外, 一條街, 真係要逛晒先好決定係邊間買, 同一個燈籠, 價錢都會唔同, 結果用咗53蚊買咗3個橙籠(一個hello咪咪同埋兩個keroro), 叫個老闆娘平d, 但死都唔肯, 結果只咗一蚊咁多 =.=

之後逛咗一陣花墟就回家~~

 

 

星期五晚o既飯聚

星期五, 由英國返港o既林sir打黎, 即興約食飯, 我地約食飯都約咗好幾個星期啦, 因為一係就呢個唔得, 跟住又輪到個個唔得, 橫掂大家個晚都得閒, 於是同林sir, 林太, 靚媽一家同埋張先生, 去咗茌灣金龍船飯聚呢~~

金龍船晚巿有好多套餐, 我地叫咗其中一個大約九百蚊o既半席套餐, 都有好多個餸, 直頭係一席咁多餸, 不過份量就減半! 我地仲叫咗一枝紅酒, 仲有d啤酒汽水, 因為林sir識得個度其中一個經理, 所以埋單都係千一蚊左右, 都算係第呢~~~~~~ ^^

本來打算同靚媽夾份請林sir食飯, 又因為林sir識人, 個服務姐姐死都唔肯收我地o既錢 =.= (張先生同林太爭俾錢都爭咗一斷時間, 但都爭唔羸), 次次都係咁.......

前往酒樓之前, 去咗南豐個間烘焙材料店買材料, 打算星期六/日係屋企無o野做整月餅呢~~~

 

忙

剛剛過去o既一星期都好忙, 因為協助同事收form, 所以成個星期都無打blog啦~~~~~

真係好奇怪, 一係就無乜o野做, 一係就忙都嘔, 呢個禮拜收form, 無時間做自己o既o野, 積埋積埋係度, 唉...... 最麻煩就係, 得閒個時就無人話要搵人, 硬係係我最唔得閒時, 呢個又話urgent要請人, 個個又話要搵人做嘢, 都唔知顧得邊個!!! =.=

 

頂波波

我Pizza妹妹要告訴大家我o既新發現絕技 -- 頭頂波波!!! 大家睇下:

http://www.youtube.com/watch?v=aW-4cjKZ1gM

係咪好勁呢?! haha......

金價跌返d啦~~

上星期金價開始回落返d, 上星期中每両$5850, 而星期六再睇, 跌多$100, 雖然唔知金價會唔會再跌, 淨返兩個月嘅時間, 好難估計何時起, 何時跌, 趁住低過六千, 還是買定差不多啦~~ 

星期日同爸爸媽咪張先生飲過早茶, 就去咗六福逛逛, 點解去六福?! 因為有張vip咭, 手工係有半價呢~~ hehe...

去到試咗幾條頸鏈, 試過花花款同埋龍鳳款, 龍鳳款就咁係櫥窗睇就靚, 但戴咗上頸又麻麻地, 結果揀咗條花花款, 大體之餘亦唔算好貴!

跟住再揀咗對龍鳳鐲, 有d龍鳳鐲好有花款, 但手工好貴呢~~ 買咁貴手工嘅鐲都係唔值, 所以都係揀咗對大體得黎手工又第嘅鐲呢~~

最後買咗隻介指, 到結婚個日媽咪送俾張先生嘅! 買咗幾樣嘢, 二萬二千埋單, 好貴呢~~~

唔知張老太會唔會買對龍鳳鐲同埋頸鏈俾我呢?!

萬世歌王

詹瑞文x林奕華《萬世歌王》

以嘴巴「演」盡側田、Twins、羅文、Pavarotti、Michael Jackson…
以身體「唱」盡K歌、兒歌、懷舊歌、Rap、Opera、Jazz…

詹瑞文的千面歌舞技藝，先後於《大娛樂家》、《人神鬥》及《男人之虎》嶄露鋒芒，唱定今年春天，向高難度個人musical挑戰，跟林奕華再續《大娛樂家》的演唱前緣，並邀得台灣資深音樂人陳建騏及李唐聨合創作，以K歌、兒歌、懷舊歌、Rap、Opera、Jazz、Folk「演盡」港人集體回憶，唱出人生耳油。精彩內容不能盡錄.

出品人：林建岳、詹瑞文
合辦：劇場組合、東亞娛樂
聯合創作：林奕華、詹瑞文
舞台設計：陳友榮
形象設計：郭家賜
燈光設計：陳焯華
音樂：陳建騏
歌唱指導：李唐
舞蹈編排：伍宇烈
演員：詹瑞文

昨日, 與張先生去咗演藝學院睇<萬世歌王>, 之前係Yani介紹之下, 睇過詹瑞文主演嘅<男人之虎>, 我同張先生都拍案叫絕, 好好睇!

今次嘅<萬世歌王>好睇過<男人之虎>, 好好笑, 好好睇! 好佩服詹瑞文一人分飾多角, 一時扮細路女, 一時扮亞婆, 一時扮justin, 一時扮hit hop版陳灌a, 一時又扮twins, 一時又扮張學友振音唱歌......每個造型, 每個演出, 都好精彩, 好好笑呢~~

佢把雄偉響亮嘅聲線, 唱歌好聽之餘, 真係高音低音都難不到他, 其中一幕扮演九姊妹花, 用咗不同嘅聲線代表唔同嘅人, 勁!!! 又有一幕, 范大帥同范太帥(即范大帥個老婆), 真係勁勁勁!!! 呢一秒, 范大帥掌刮緊范太帥時, 另一秒已變咗范太帥被刮嘅動作, 每秒之間嘅來來回回, 真係佩服! 佩服呀! 如果唔係做緊舞台劇的話, 大家一定會覺得佢有極度嚴重嘅精神分裂呢~~ haha......

仲有一幕, 將一首中文歌嘅歌詞變成英文歌詞, 真係笑到爆燈呀, haha...... 又係要寫個服字俾佢呀! 首歌嘅歌名係<Thousand Mountain I Go Alone>, 大家估唔估到係咩歌呢?!

全劇我最欣賞嘅係, 詹向觀眾攞咗份報紙, 即席拿住份報紙係度rap裡面嘅標題, rap得好有節奏, rap得好押韻, 好第死, 好好笑, 好正, 勁勁勁呀!!!

不過, <萬世歌王>比<萬世歌王>唱多咗歌, 演出嘅技倆都無乜分別, 看得多的話應該都會有d厭, 希望下次嘅新劇會有所變化啦!

星期六的聚會

星期六與三位朋友去咗飲茶, 這三位朋友係以前公司識嘅, 雖然大家都住係附近, 但係自從離開咗個間公司之後, 都好耐無見過佢地lu~~

我同小英個日都放假, 所以負責去搵位, 十一點零鐘就去搵, 去到明星, 嘩......好多人等位啊~~ 心諗: 一定有排等吧! 於是我同小英攞咗搭枱同唔搭枱嘅飛, 丫...唔搭枱竟然即刻有位喎! 我同小英都係度猶豫緊, 搭唔搭枱好, 當諗到要等成三十幾張枱先有位嘅時候, 我就決定搭枱就搭枱啦! 入到去張枱度, 竟然係張四人枱, 簡直就無決定錯呀!!! haha...... 如果唔係, 有排等呀!!! yeah! yeah! yeah!

等齊人, 叫咗個四人餐, 超值呀! 個餐98蚊, 有粉絲節瓜蝦煲、2隻乳鴿、一碟菜同埋一碟乾燒伊麵, 碟碟都大大碟, 六個人都夠食呢!!! 今餐其中一位朋友請客, 因為佢喬遷之喜兼加人工, 所以我地都無同佢爭俾錢, 唯有下次visit佢新居時再送禮物俾佢啦!!!

食飽飽就返張先生度, 無嘢做, 天朗又氣清, 見到間屋唔多乾淨, 所以進行大清洗嘅工作! 好攰呢~~~ 清潔期間張老太返咗黎, 所以無拖地, 只掃下個地就算, 因為張老太着住出過街嘅拖鞋通屋行, 為免白費心機, 於是遲下先拖地囉~~ 係掃地期間, 張老太用閒聊嘅語氣同我講: 「你真係乾淨, 我就求求其其嘅遮, 咁乾淨, 一世辛苦! 」唔知佢有何意思呢?! 同張先生講返, 佢都摸不着頭腦呢~~

晚上, 去咗強記大排檔食飯, 叫咗好好好好味嘅沙嗲粉絲蝦煲, 仲有椒絲腐乳通菜同埋大腸拼鴨腎, 好好味!!!

 

慶祝後遺症

昨晚, 同張先生嘅"女朋友"嘅老婆慶祝生日, 去咗沙田karaoke, 一放工就約咗張先生去咗逛一陣, 睇中咗一對波鞋, 但係無買到, 因為呢個月實在洗得太太太......多錢啦 =.=

跟住同埋張先生同埋佢"女朋友"兩pair去食晚飯, 因為壽星女想食西餐, 所以去咗新城巿廣場第一期七樓嘅 Relaxing Tea House plus Chocolate Garden食晚餐.

張先生叫咗客鵝肝雞胸卷配青口, 鵝肝就好滑, 但係包住佢個d雞胸肉就鞋烚烚, d飯又唔夠熱之餘又實dick dick, 一d都唔好味! (仲要4個set dinner最貴係呢set) 而我就叫咗客芝士大蝦伴牛柳, 反而我呢個就ok, 過得去啦~~ 我仲叫咗杯玫瑰朱古力, 好香玫瑰味, 但係朱古力味就唔夠濃, 同埋勁多沙冰! 如果少d冰同埋朱古力味重d會正d!

食飽飽, 八點幾就去到karaoke, 但坐咗好耐都係得我地兩pair人, 而壽星女嘅朋友十點幾先黎, 結果, 原本打算十一點幾就走(趕尾班火車), 點知成點半先走, 返到屋企沖埋涼, 吹埋頭, 上床瞓覺已是兩點半嘅事啦~~~ =.=

返到屋企, 見到個堆晒咗2日都仍然好似啱啱洗完咁嘅衫, 真係想發忟憎呀! 用風扇吹咗成晚都唔乾 =.= 好討厭呢~~~

今朝返工, 只得個軀殼, 靈魂係屋企, 超勁眼瞓呢~~~~~ 想瞓, 但又唔得~~~~~

Green Box送嘅蛋糕, 都唔知佢係雪糕蛋糕還是雪咗好耐嘅海綿忌廉蛋糕, 有部份有d似綿花糖嘅感覺, 不過一句講晒, 好難食!!! 賣相又唔得!!! 唔駛錢, 送嘅嘢係咁上下!!! (仲有支不含酒精嘅蜜桃味香檳, 太甜) 
 

生日禮物

今日趁住lunch時間, 去咗旺角新世紀買咗個貓咪公仔, 因為今晚要同張先生嘅"女朋友"嘅老婆慶祝生日, 無理由兩手空空去同人慶祝, 唔知佢鍾意d咩, 又驚買咗d嘢佢又唔鍾意, 只知佢好鍾意貓, 於是買咗隻肥嘟嘟, 好可愛, 但個樣又得烕嘅小貓咪公仔俾佢, 希望佢會鍾意啦!!!

 

 

3:20PM 14 September 2006

3:20 pm, 14.9.2006, 呢一刻, 我發現出面無落雨之餘, 竟然出太陽 =.=

太陽伯伯, 你晨咁早出黎咪好囉, 早d叫雨點兵團走麻~~~~~~ 咁我咪可以如計劃進行影相活動囉~~~

改期

原本聽日約咗去影婚紗相, 點知...天有不測之風雲 =.= 咁嘅天氣, 點影呀!

結果, 要打電去取消booking, 改咗下個再下個星期先至影, 店員未覆我個日得唔得, 希望得啦~~ 其實最想係下個星期去影, 但係next week very busy, 無得放假, 所以要等多一個星期先影.......唔知趕唔趕得切攞相去做dvd呢?! 好似有點吻水添 =.=""

六年六月廿六日

尋晚睇返本Schedule, 發現我同張先生拍拖拍咗六年六個月零廿六日啦~~

同張先生註冊都已經138日啦, 時間過得真係快呢~~

再過多兩個多月, 就正正式式係張太囉!

真想快d到12月2日, 點解?! 因為到咗呢日, 我就唔駛再為結婚嘅事而煩惱呢~~ hoho......

入伙啦

尋日放工, 同張先生去咗宜家攞窗簾, 係宜家入面個餐廳食埋飯, 個度選擇好少, 味道都ok嘅~~

攞完窗簾就速速回家, 因為好想執下間房呢~~ 張先生擔心開電鑽會嘈到人, 個時係八點半都未到, 但係我慫恿之下, 只不過係鑽兩個洞而已, 嘈都唔會嘈好耐, 結果張先生就好快手地鑽咗兩個洞, hehe...... 就咁就掛咗個窗簾!

跟住張先生裝埋張床, 而我就鋪床單被鋪, 本來張先生唔想郁張電腦枱住, 又係我慫恿之下, 係一夜之間(唔駛三個鐘), 搞掂晒間房(仲要係執埋隔離房), hoho...... 就咁我地就直式入伙啦(係間房, 唔係間屋)~~

不過, 係新環境、新床鋪、新床裖之下, 我竟然瞓唔着 =.="""" (所謂嘅生保床) 加上出面又大風大雨, 開咗窗呼呼聲, 唉...... 結果, 今日就勁眼瞓呢~~~

至於幾時先有屋, 真係好難講, 張先生話今期未必攞到添呀 =.= 為有試試啦!!!

Big Day Countdown

圈套

好耐無見大家, 又係我Pizza妹妹呀!!!

點解我個嘴仔會俾個圈圈吸住?!  一日都係自己攞黎衰囉, 見到唔識/少黎探我嘅人一入屋就吠, 唔識得睇時候~~ 話說szeman姐姐年尾結婚, 個日會有好多人黎, 勳哥哥為免我嚇親佢地, 所以打算買個口罩罩住我個嘴仔, 同埋早d買等我熟習下喎~~ 於是咪用個圈圈黎度size, 方便去買囉~~~ 真係可憐...

爸爸個提議仲差, 話放我係狗酒店度住一日咪得囉, 嘩......好慘呢~~ 我唔制呀!!!!!! 咁大個狗仔都未試過住酒店, 聽聞d狗酒店環境好差, 無啖好食, 服務生態度又差......好彩媽咪極力反對, 如果唔係, 實嚇死我啦~~~~  我寧願戴住個口罩囉~~ 起碼到時可以左籐右籐, 自自由由丫~~

 <--大家睇下我個樣幾無耐

俾大家笑咗一輪, 勳哥哥都唔肯幫我攞走個圈圈, 唯有自己動手, 整走佢 =.=

 

新房間

尋日張床終於送咗黎啦, 真開心呢~~ 有張新床瞓啦! haha......

適逢張先生尋日已經將間房油好油(本來我都想試下油油嘅滋味, 因為未試過, 點知一攞個掃, d油就係咁滴落地 =.= 結果都係俾返張先生油), 加上尋日好大風, d油好快就乾晒, 最重要係連d味都吹走埋, 唔洗搞到成間屋一陣油漆味, good good good 呀! 等張先生得閒, 砌埋張床, 放好位後我地就可以入住啦~~ 真開心呢~~

自星期六晚發生嘅不快事之後, 真的非常渴望快d分到屋, 唔駛好似寄人離下(有少少)嘅感覺, 到時想dump咩就dump, 想買咩就買, 想點佈置就點佈置...... haha......好期待呢~~ 快d分到就好囉!

 

 

 

不快嘅星期六晚上

星期六嘅晚上, 接到二嫂嘅電話(因為張先生當日要返工, 電話又無電), 問我地係咪掉咗張老太一張床(其實個張床已無人瞓, 同埋個張床掉咗係街都無人要個隻黎, 都唔知留黎做乜), 因為我地買咗張新嘅床, 咪掉咗個張囉~~ 執咗間無人瞓嘅房間, 油下油, 執一執, 準備結婚用囉~~ 於是, 咪打個電同張老太講一聲, 點知......今次真係自投羅莽囉~~~ =.=""""""

張老太好好中氣, 一輪嘴係咁話張先生呢樣個樣, 又話做乜掉咗張床, 又話做乜買個燈籠放係佢房(其實係一棧係宜家傢俬買嘅成個波咁嘅燈), 買個時邊會諗到佢諗埋一邊, 張老太就以傳統又迷信嘅角度去睇棧燈, 而張先生同我都無諗過張老太諗嘅嘢 =.= 唉......真係麻煩, 張先生見佢棧燈壞咗咁耐咪買棧俾佢, 幫佢整返好, 點知......多此一舉之餘仲要俾人鬧到一面屁! (成日話自己有病, 都咁好中氣......) 唔鍾意咪掉咗佢囉~~ 我好唔開心呢~~ 雖然佢對住我, 話嘅係張先生, 但俾我感覺好似佢話緊我咁......咁大個人都無人對住我, 聲大夾惡咁講嘢架

張老太真係令到我對佢好反感, 好唔鍾意佢  結咗婚我一定唔可以, 係絕對唔可以同佢一齊住! 實在太難頂啦, 自己懷胎十月生出黎嘅仔都係咁鬧鬧鬧, 差d祖宗十八代都搬出黎鬧埋, 我一定會頂佢唔住呢~~ 有時真係佩服張老伯, 可以對住佢咁耐~~

俾張老太嘅一輪炮轟, 我嘅心情當然好唔開心, 但張先生嘅電話又無電 =.=, 結果都係忍唔住, 打俾佢同事叫佢搵我, 不吐不快呀! 同張先生講完我嘅無辜辜中招嘅經歷, 張先生對張老太嘅反應已習以為常, 不覺一回事 =.=

大出血呀!!!

今日下晝放咗工, 去咗私人胸間度買girdle, 方便星期四去影相用同埋結婚個日用!

放工時傾盆大雨, 落到好似倒水咁, 一對腳都濕晒! 去到私人胸間, 不到15mins就消費咗四百幾蚊, 買咗一個girdle同埋束腰褲, 實在太肥啦, 試咗件girdle, 腰間d豬腩肉bit晒出黎, 好肉酸呢~~ 跟住sales姐姐介紹咗條束腰褲俾我, 果然係束腰褲, 緊到真係扎實晒d肉, 結果就買咗兩樣嘢!!!

買完嘢, 都依然落得好勁, 本來想行去油麻地買蛋糕材料, 最後都決定唔去, 都係想返屋企多d! 最後搭火車, 去到旺角站, 就係新世紀逛咗一陣, 去咗大眾睇咗本書, 係介紹結婚時d遊戲! 都唔知呢d書會唔會有人買, 好似我咁, 企係書局度睇咗一陣都已經睇晒, 加上係網上面都有人講過一d裡面都有o既遊戲, 有d就係d大路d o既遊戲, 無厘新意~~

唉......睇完都仍然解決唔到我o既煩惱 -- 接新娘玩咩遊戲好呢??? 擺酒期間玩咩大眾遊戲好呢??? 大家如果有咩好玩又有新意又能令大家開心o既遊戲, 請指教一下小妹!

買完書, 就去咗睇我逛新世紀o既主要目的, 就係去睇Precious Moments結婚公仔. 幾個月之前自己都去睇過, 但實在太貴, 所以唔捨得買, 之後行過金都, 個d公仔實在樣子假, 又無厘新意, 又太普通啦, 真的看不上眼 (唔係睇唔起個d公仔, 只不過是自己眼角高遮~~)

所以今日又再去睇多一次, 入到去聽老闆娘介紹, 最後自己都決定買一對Precious Moments o既結婚公仔, 老闆娘話原本要六個月前就要訂, 因為如果買現成就即時有, 但因為要加工, 製作需時, 所以正常情況係要六個月前訂造, 唔通有錢唔賺咩, 老闆娘都肯幫我, haha......

不過因為佢手頭上有幾個客九月尾結婚, 要趕起個幾個公仔先可以幫到我整, 所以我個對公仔最快都要11月頭先俾到我, 好心急想快d見到個製成品呢~~ 但急極都要等到11月!!! 到時佢地先再同大家見面啦!!!

呢對公仔好貴呢~~ 花費咗$1560買佢地 (老闆娘死都唔肯減價, 結果佢就送咗個鏈咀可以掛係公仔條頸鏈度), 唉......我都知好破費架啦, 但係千金難買心頭好, 又搵唔到可以取代佢地o既公仔~~~ 好彩張先生都無反對我買咗佢地, 因為佢知我鍾意Precious Moments麻~~ hehe......

                 呢個係買滿五百蚊送o既扇啦~~

破完費, 還是速速回家, 費時又忍唔住手買其他嘢!

閒事幾則

尋晚又再一次整桂花糕, 今次係整返公司請同事食! 尋晚整嘅時候, 發現魚膠粉存貨不足, 爭成25g =.="" , 但又懶得落樓下買, 所以決定博一博, 試下凝唔凝固到先再作決定, haha...真係好彩, 凝固到喎~~~ 總算無白費心機!

不過, 掛住睇電視, 就過咗時, 唔記得係佢開始半凝固狀態時"new"下佢, 令d桂花唔好沉晒底, 當我記起時, 已經變咗固體狀  為有大家將就下, 食住沉晒係底嘅桂花糕先, hehe.....

今朝, 搭個部巴士有個4、5歲嘅o靚仔, 好嘈, 係咁不停玩不停講嘢, 嘈到我頭都痛埋 =.= 由我上車已經開始嘈到落車, 個嘴無停過, 足足嘈咗成半個鐘, 成部車到聽到佢嘈, 搞到我想小睡片刻都唔得~~ 佢真係好討厭呢~~~~~~~

返到公司, 做完一輪嘢, 又係悶! 悶! 悶! 跟住隔離section同事又俾個難題我, 要搵人星期一同埋星期四下晝返part-time, 天呀~~ 家陣d人仔咁忙, 真係談何容易呢~~  打咗好多電話, d人仔都話唔得, 唉......呢次真係煩! 煩! 煩!

要捱埋聽朝先有假放~~ 努力呀!!!