小事幾則 ~ 過新年篇

年廿八完全沒有返工的心情，但又無得放早，更加沒心情啊！反而舊公司有得放早，仲要放三點，想當年都未曾試過這樣的待遇啊~~

年廿九過咗張先生屋企食團年飯，但情況有點混亂，因為沒想到大哥一家過埋黎食，但又無預早告訴伯母，好在準備咗好多飯餸，不致於唔夠食！始終都對大嫂無乜好感，睇錢大過天，知道我同張先生將結婚，第一句就問我地結咗婚之後係邊度住...俾我感覺好似驚我地會 "吞" 咗個屋咁...真的不太喜歡她！

年初一留係屋企，無聊到爆，幸好張先生過咗黎陪我一整日，一齊睇戲才不致太悶！過年都係悶到爆......

年初二過咗亞婆屋企食開年飯，之後去咗一位舊同事屋企拜年之後便回家，渡過沉悶的一天！

年初三與張先生返咗粉嶺豆利是，咁大個人仲去豆利是，真係有點不好意思呢！整咗個cheese cake俾張先生d師兄食，唔知佢地覺得好唔好食呢？希望佢地會鍾意食啦...haha...之後去咗張先生嘅老朋友屋企拜年兼睇bb，張先生揸車去，第一次去觀塘個頭，結果係觀塘道行咗兩個大運(因為唔係好識路兼行錯路)...haha...bb好過癮，細細個，得12日大咋...坐咗一陣，有個super baby黎睇bb，係bb女，真係超可愛，超得意，五個月大咋，有成18磅，肥嘟嘟，頭大大，又圓碌碌，真係非常得人鍾意，但佢太黐住佢媽咪啦，一離開媽咪就喊，佢媽咪話連爸爸抱佢都唔得，都會喊，不過佢都算俾面我啦，我抱咗佢一陣都無喊到，haha...可惜無帶相機，如果唔係可以同呢個super baby合照留念！

探完bb，入咗西貢行咗陣，入到去北潭涌，張先生俾咗架車我揸，由北潭涌駛出去回旋處再兜返入口附近個停車場，好緊張呢~~落咗車做返乘客時個心仍撲撲咁跳，真係好緊張啊~~~~~

年初四本來要返工，但攞咗假，因為一早要去屯門婚姻註冊處辦手續，原來辦手續都要讀一段嘢宣誓，由張先生一人來宣誓，都幾有趣！係個度等待期間，都有兩對情侶準備行禮，一對就勁causal，好似平常去街咁嘅look入去註冊，而另一對就著得較斯文，男嘅西裝骨骨，女嘅就著條黑色連身裙，褸條淺色肩，著對黑色boots，就咁入去行禮！依著就是如此簡單！搞到到時嘅我應該點著好呢？朋友們就話一生人一次，更係要著婚紗，但就係為咗人生呢一刻(15 mins)，又要特登去set頭，簡婚紗...都好麻煩(因為註冊同擺酒都隔咗一段時間)，到目前都仍然係唔知點好！

之後入咗東涌探亞Ling，今日係張先生第一次揸車行青馬大橋，而我就第一次坐私家車行青馬大橋(想當年日日坐巴士入東涌返工)，細佬大個咗好多，越來越精靈，好鬼馬，haha...之後兜咗去廸士尼，本諗住去廸欣湖行下，但廸欣湖個邊唔俾車入，部車要泊到超遠，行去都有排行，最後都揸車走咗，入咗Ma On Shan三哥屋企拜年！

呢兩日都去咗好多地方，d油錢、隧道費、停車場費夾夾埋埋都好乸利~~~~~ =.=" (好在有d利是錢幫補下!!!)