大年初七

1.2.2009

今日B仔同B仔媽諗住3點零鐘出發去二伯娘屋企拜年, 點知12點幾打俾二伯娘無人聽, 諗住唔去架啦~~ 點知3點二伯娘至覆返電話俾我地, 咪照原定計劃出發!

出發之前, 去咗樓下商場閒逛, 兼俾利是柏滔, 跟住諗住去M記食個午餐, 點知翠思姐姐同佢男朋友Eric哥哥黎咗, hehe... B仔媽無啦啦呃咗餐晏仔食! haha......

4點幾出發, 同B仔去咗搭巴士返屯門, 嘩... 個部261多人到丫~~ d人係大陸返黎一包二包大大包放晒係走廊阻住晒, 真係麻煩呀! 上車又好似衝峰陷陣咁, 煩煩煩!

去到二伯娘度, 家雯姐姐開咗佢座鋼琴俾B仔玩, B仔不知幾咁興奮, 係咁係度"彈"琴, haha...... 唔知B仔大個仔d仲有無興趣彈琴呢~~

坐咗一陣就返婆婆度, 公公急call話開飯! 今晚零舍早開飯, 六點幾就開飯, 因為成村人黎咗婆婆家!

B仔婆婆今日就辛苦囉~~ 一個人煮十四人飯餸! B仔媽自動請纓幫婆婆洗碗, B仔媽忙碌期間, 聽到B仔喊, 但超快收聲, 成手泡唔得閒走出黎睇發生乜事, 究竟邊個整喊B仔呀?! 仲要喊到咁可憐咁款..........

食飽飽d人傾咗陣計就散水, B仔全日無瞓過晏覺, 眼瞓到爆都唔肯瞓, 係咁要駕佢部戰車! 可能過年返咗屋企咁多日, 太耐無駕車啦~~ haha......

B仔媽湊咗B仔八日, 又係每當熟習咗三人生活時, B仔媽要返工, B仔要返婆婆度! 真係唔多捨得, 雖然呢八日七夜入面, B仔晚晚凌晨三四點要食支奶, 到七八點又食支奶, B仔媽無一晚係一覺瞓到大天光, 之但係呢幾日對住B仔, 日日同佢玩到痴痴地, 笑到卡卡聲, 佢又會無啦啦走黎"own"個頭埋黎對住你笑, 撩你玩, 真係好甜呢~~ B仔見B仔媽拖地, 佢又要拖埋一份, 拎住個紙拖把通屋走真係好搞笑呀!

有排都無長假期湊B仔lu~~ 至快到要等到復活節呀!