26.9.2008
今晚去食滿月飯, 堂表弟仔滿月啦~~
堂表弟仔真係超好湊呀! 食飽就瞓, 瞓飽就食, 食完又繼續瞓~~ 不過唔知點解佢乖成咁, 一味瞓, 嘈都照瞓, 唔會嘈醒, 肚餓又唔會喊 (想當年B仔, 支奶俾遲一秒都喊到拆屋咁) 姑婆話可能係胎教, 因為BB媽媽馱住佢時都係瞓同食 =.="""
B仔見到罐可樂, 眼睛發亮~~
27.9.2008
今個禮拜無湊B仔返屋企, 因為剛好返, 費事返來返去, 所以B仔媽尋晚留咗係婆婆度陪B仔~~
瞓醒去咗巿中心試下翡翠拉麵小籠包, 都OK喎~~ 閒逛咗一陣就返婆婆度lu~~
返到婆婆度就白白豬先~~ B仔呢輪又唔肯戴洗頭帽 =.="""
婆婆話B仔扮花, 我就覺得B仔似獅子仔多d~~
B仔今個禮拜又進步咗, 唔洗引誘佢, 自己放手通屋行呀~~ Haha......
同埋家陣識自己駕車車啦~~ 又識向前, 又識向後, 但未識轉彎!
24.9.2008
由星期一凌晨到今日, B仔仍未退燒, 燒下又退下咁, 唉... 發生乜事呀?! 已經第三日啦~~
放工帶咗B仔去睇陳醫生, 今次B仔無上次咁癲, 上次一入去就喪喊, 今次無喊, 只係陳醫生睇口腔時至喊(次次都唔俾人睇), 同埋肛探次次都喪喊, B仔, 你男孩子黎架, 咁細膽架~~~~~
陳醫生話B仔喉嚨有幾粒飛滋, 係過濾性病毒感染, 鼻膜有d發炎, 引致眼仔有d眼水, 同埋發燒. 陳醫生開咗一支同上次一樣嘅藥水+退燒水+眼藥水.
問陳醫生會唔會有機會係出玫瑰疹, 陳醫生話有機會係, 如果出疹會燒埋聽日跟住就退燒後出疹, 到時又要見陳醫生.
B仔, 你乖乖食藥藥啦~~ 飲多d水水~~ 好快就好返架啦!!!
22.9.2008
自打完MMR已經第11日, 打針時陳醫生話過咗12日無事就無事, 點知... B仔臨尾打敗仗!
婆婆今朝打俾B仔媽, 話B仔凌晨4點發燒101度, 食咗次退燒水, 但瞓醒仍有燒, 直至下晝4點都仲係徘徊係100.4至100.6度, 肯食奶同粥, 但就成日唔多點玩, 最重要係, 連至愛既honey(奶咀)都唔肯食, 所以婆婆話帶B仔去睇陳醫生!
差不多六點出到陳醫生度, 竟然無人睇, 唔洗等成粒鐘就有得睇, 實在太好啦~~
入到陳醫生個房, B仔竟然喪喊, 應該係記得上次係呢度俾陳醫生吉咗2針吧! 原全係唔收聲呀!
陳醫生檢查完話B仔喉嚨有d發炎, 所以要食藥藥, 不過就只有一支藥水, 唔洗食好多支呢~~
睇完舅父仔就車我地返婆婆度! 依然肯食奶, 今晚仲肯玩, 瞓覺前仲退咗d燒, B仔, 你要加油呀!!!
20.9.2008
Yeah!!! 張B仔終於識行啦~~ 上個禮拜仍覺得佢腳步未夠穩, 但今個禮拜, 穩咗好多, 仲可以由sofa行到去房門(距離都有12尺呀), 不過膽子都仲未好夠, 要誘惑佢至肯自己放手行出第一步! 但都比之前進步咗!
B仔今朝瞓到十點半就醒, 十二點左右去咗買餸, 買買下B仔竟然扭計係度喊, 搞到一手抱住佢, 一手推住掛滿餸既車仔咋咋臨返屋企 =.=""""
B仔瞓得一陣晏覺就唔瞓, B仔媽又要襯太陽晒洗衫兼晾衫, 又要抺乾淨個地下俾B仔四圍爬, 又要洗餸...... 成個下晝都好忙呀!
到夜晚準備晚餐, B仔爸又未返到...... 唯有煮定d又睇下B仔咁啦~~
B仔, 你又係度自己爬上凳?! 要小心喎!!!
B仔爸一入屋, B仔竟然喪喊, 貼身膏藥咁黐住B仔媽.......... 好似見到佢嫲嫲咁喪喊! 可能B仔爸似嫲嫲, 誤會咗係嫲嫲 =.="""
B仔媽係咁同B仔講: 你望清楚d, 係爸爸, 唔係嫲嫲呀!!! (呢句嘢不斷重覆又重覆咁對住B仔講, 佢望真d就無喊, 但仍好黐身)
開飯啦~~~ B仔爸餵B仔食魚湯西蘭花字母粉!
是日晚餐有.........
蒜蓉豬扒并美極蝦茄汁意粉
仲有"錄"西蘭花同埋好好味既蕃茄薯仔大眼雞湯
B仔好鍾意飲大眼雞湯呢~~ (查實B仔媽同B仔爸都好鍾意大眼雞湯架~~)
13.9.2008
今朝又瞓到成11點, 爽呀! 當然晨早5點幾食咗餐奶, 仲要食完走咗去烚埋奶樽至再瞓過啦~~
瞓醒既B仔又係度搞搞震.....
拎咗Yani姐姐送俾B仔媽既按摩器黎轉轉轉...
無啦啦係度拍手掌, 真搞笑...
瞓醒之後約咗柏滔媽一齊食嘢買餸煲粥仔, 跟住上咗黎一齊玩! 今日煲咗南瓜肉碎粥!
果然隔離飯輕香d~~
連個水樽都爭一餐...
估下邊個會爭嬴?!
答案係~~~~~ B仔輸咗! 爭爭下可能覺得爭唔到, 放晒手望住B仔媽喊 =.=""
喊喊下望到電視就收晒聲睇電視, 之後完全唔會記得發生咗乜事!
玩到4點左右兩個BB都扭眼瞓, 柏滔返屋企覺覺豬, B仔都9秒9瞓咗~~
謝謝柏滔媽送俾B仔既牛一禮物呀! 好實用呀!
B仔爸要返工, 是夜B仔媽自己一人帶住B仔去咗同爺爺嫲嫲做節食飯, 嘩~~ 大排檔竟然冷氣跳制, 成晚汗流夾背咁食飯, B仔變咗濕水B仔呀!!!
12.9.2008
今朝晨咁早8點半起床, B仔都未願起床呀! 點解咁早?! 咪係9點半要去健康院檢查囉~~
去到健康院勁多細BB呀~~ 不過B仔都唔理唔望, 只管四圍行(當然要我地拖住佢黎行啦)
磅重9.08kg, 身高74.5cm(係陳醫生度度), 頭圍48.5cm
跟住見姑娘, 一坐底B仔就四圍手指指, 姑娘已話叻, 識指想指既嘢!
姑娘問:
一日食幾多餐奶同粥? 依家BB大個要食兩餐粥, 一份肉就兩份蔬菜, 要每日食水果, 由細開始培養良好飲食習慣
識得講乜嘢?
識唔識得俾嘢媽媽?
識唔識得用學習杯飲水?
識唔識得行? 單手拖定雙手拖住黎行? 扶住嘢自己識唔識行?
識唔識推車車(玩具車)? (好彩剛剛識得推遮~~)
姑娘俾粒餅仔, 睇下B仔識唔識得用手指拎, 試完右手試左手, 姑娘讚B仔手指運用好靈活呢~~
跟住就話體重係生長範圍, 發展正常, 問B仔媽有無嘢想問?! 都無乜好問囉~~ 於是約期歲半時再去檢查, 之後就去食嘢, 返屋企!
返到屋企煲粥仔, 粟米肉碎粥, 正呀! 又香又甜, 好好味呀! 呢度係成個湯碗咁濟, 差不多俾B仔食晒呀!
仲食餅餅
B仔媽煲緊粥期間, B仔爸唔聲唔聲, B仔媽一出黎就話B仔又多條傷痕, 話好明顯, 叫B仔媽自己睇........................
嘩.......... 搞咩呀?! 點睇仔架?! 條痕咁長?! 搞到咁樣衰呀?! 原來俾本書刮到, 唉.......... B仔爸, 你點睇住你個寶貝仔架?!
食飽粥粥就出發去陳醫生度打MMR同埋肺炎鏈球菌~~
打針前~~ 仲笑得咁開心?! 一陣打完手脾就打大脾, 到時你就笑唔出囉~~~~~
打針時, B仔都好叻叻, 打咗手脾先(MMR), 支針一篤入去都無乜反應, 射d藥入去就黎料啦~~ 喊到呀! 邊喊邊掙扎呀! 不過好快就收聲!
跟住打大脾(肺鏈), 嘩..... 又係邊喊邊掙扎, 呢支好似勁過MMR呀~~ 嘩...... B仔媽心同肉都痛埋呀!!! 支針抆咗出黎都仲喊咗陣, 但又係好快就收聲lu~~ 好叻叻呀!!!
陳醫生話無咁快會有副作用, 通常兩至三日(如果有的話), 有d可能會出疹, 但係好疏既, 幾日就會退晒! 有d可能針口紅腫! 副作用期為12日, 過咗呢12日就唔會有發燒!
唉~~ B仔媽好擔心呀!!! 聽日B仔爸仲要返工架~~ 得自已照顧B仔架~~
拎藥後就返屋企!
11.9.2008
今日叫咗B仔爸拆咗B仔媽一副舊眼鏡既鏡片俾B仔戴, 睇下會唔會似多d我~~~
都唔係好似, 反而好似IQ博士入面個小寶寶, HAHA.........
話說尋日行沙田新城巿時, 係兩間賣日本雜誌/玩具鋪見到小寶寶既figure, 見到真係好鍾意, 好得意, 好似B仔呀~~ 但望一望個價錢, 一間$999, 另一間$599, 嘩...... 太貴啦~~ 望下好囉!
傍晚時份去咗泳池游咗一陣水, 真係半粒鐘咋~~ B仔就扭計, 連水泡都唔肯坐, 要B仔爸抱住係水度游呀 =.=""""""
跟住就返屋企煮飯! 今晚滾咗蕃茄薯仔大眼雞湯, B仔不知幾鍾意飲呀!!!
仲有麵豉醬炒唐生菜!
沙甸魚炒公仔麵, 但B仔爸唔多like, 話怪怪的!
10.9.2008
張B仔牛一大日子, 起初諗住去Disneyland, 但B仔太細又未識行又唔玩得個度d嘢, 都係唔去! 跟住諗住去Ocean Park睇魚睇熊貓, 但同事話天氣太熱啦, 同埋個度有工程, 同埋又係太細無嘢好玩! 結果決定兩個樂園都唔去, 等B仔識行至去囉~~
今朝瞓到11點, 當然晨早起身食過一次奶啦~~ 瞓醒去咗大尾篤食Lunch, 跟住係個度行下!
之後去咗沙田嘆返支奶先~~
跟住去行街街, B仔爸買禮物, 玩具反斗城竟然裝修喎! 結果去咗荷花買禮物! 入到荷花, B仔見到d車車床唔肯走呀!!!
去完荷花到B仔爸B仔媽嘆返杯凍飲先~~ B仔, 你都坐得好嘆喎!
仲要企係張凳度係咁轉隔離枱個張凳, 隔離枱個婆婆都笑呀!
之後又去Snoopyland, B仔爸第一句話: 又去!!!
咁買咗嘢, 滿200蚊有得坐船仔麻~~ 唔好蝕麻~~
跟住買埋機頂盒同埋蛋糕就返屋企~~
呢個私家波波池就係B仔爸送俾B仔既牛一禮物啦~~ 正呀!!!
跟住就係一家三口party時間啦~~~~~
Happy Birthday to u,
Happy Birthday to u,
Happy Birthday to Tsun Kiu,
Happy Birthday to u~~~~~
當然B仔係唔知發生緊乜嘢事啦! (就係因為咁而唔打算同B仔搞生日party) 仲要切完蛋糕就開始扭計要瞓覺添呀~~~
就係咁樣簡簡單單, 開開心心, 一家三口慶牛一! B仔媽已經好滿足!!!
