小寶寶又有靚衫仔禮物呀~~

謝謝OnOnLokLok一家人呀~~

件衫仔好靚呀!

小寶寶你快d出世啦~~ 好多靚衫仔等緊你着呀!

大姨媽又送禮~~~

大姨媽又破費啦~~ 又送咗禮物俾小寶寶! 好得意呀~~~ hehe..............

謝謝大姨媽呀!

 你唔好再買嘢俾小寶寶啦~~ 實在買得太多! (雖然好第買~~ hehe...)

小寶寶你快d出世啦~~ 好想同你戴呢頂帽仔同手襪仔, 再着埋個件白雪雪甲乸衣, 應該會好得意!

忙過返工呀!

28 Aug 2007

放產假仲忙過返工呀! 今朝同張先生飲完茶, 去咗直銷中心買咗張梳化, 難得張老太肯換個張又殘又舊o既梳化, 我地咪咋咋臨去買! 最緊要係平靚正麻~~

係直銷中心睇到有百靈牌個隻耳探機, 賣348蚊, 我大拿拿買貴咗成50蚊呀!!!

 我係萬寧買399蚊呀!!!

買完梳化, 陪張先生去剪髮, 剪完髮我地去咗廣成冰室食下午茶! 最主要係飲好好好.... 好味o既紅豆冰啦! 呢度d紅豆冰真係好正架~~ 紅豆大大粒, 林之餘又有咬感! 要下晝2點後至有架~~

呢杯就係孕婦生涯中最後一杯紅豆冰! 一邊飲, 張先生一邊話唔應該俾我咁放肆, 飲咁多凍嘢!

食飽飽我地就返屋企執屋! 由四點執到差唔多十點, 砌埋張bb床, 最辛苦都係張先生囉~~ 執到身水身汗! 做人daddy真係唔易呢~~ haha.......

遲下小寶寶就會瞓係呢張床仔度! 唔知到時會係點呢?!

小寶寶, 依家有隻小狗霸咗你張床仔呀! 你快d出世, 霸返張床仔啦~~

38週產檢

27 Aug 2007

今朝去咗廣華產檢, 若廣華計, 小寶寶已39週大啦~~

今次見醫生時, 同醫生講, 呢排個肚成日都變得好硬, 個醫生o既回應都幾搞笑: 咁咪好囉~~ 就係咁樣回應我! 以佢o既專業, 係咪應該俾個專業d o既答案我呢?! 雖然我都知臨生係會成日宮縮!

我又同醫生講, 呢排小寶寶郁得唔多, 佢問我一日有無郁十次, 我呢個大意媽媽無刻意去數過, 結果醫生寫紙我入院聽小寶寶心跳! 仲俾咗張始兒活動錄表, 要我每日要做功課, 記底小寶寶每日郁第十次o既時間!

入到去12點幾, 有2個媽媽都係要聽BB心跳, 有1個就要量血壓, 4個孕婦坐埋一枱食埋個午飯先! 食飯時鴉雀無聲, 都幾悶下~~ 張先生就好啦! 有得出街食! 而我就無選擇, 食炒白菜同埋魚柳! 唔係好食, 但又唔係難食!

食飽飽就開始聽心跳, 聽到個心跳好似跑馬咁o既聲, 我仲以為係小寶寶o既心跳聲, 因為確實好大聲, 點知原來係隔離床個bb心跳聲

 因為姑娘同隔離床個孕婦講: 你個bb聽得好好! 跟住姑娘就同我講: 你個bb唔得喎~~ 跟住叫我深呼吸!

隔咗陣, 姑娘又入黎叫我深呼吸, 大佬呀! 已經好努力深呼吸啦~~ 又隔咗陣, 姑娘走黎話可能我"擇"住咗亞b條血管, 叫我唔好側身瞓, 坐係度, 跟住又話我瞓係度時小寶寶係度瞓覺! 結果由原本聽半個鐘, 變咗聽成個鐘! 隔離床d孕婦都走晒!

無無聊聊又係度諗, 會唔會突然之間話要催生?! 結果, 一切無事, 出院返屋企!

下星期一又要返廣華產檢啦~~ 到時40週! 唔知生咗未呢?! 如果未生會唔會迫催生呢?! 小寶寶, 你快d出世啦~~

睇黎張老伯遺傳咗d睡魔俾張先生, 而張先生又遺傳咗d睡魔俾小寶寶! 所以小寶寶郁得咁少~~ 我瞓覺時佢又瞓覺! 我做嘢時佢都係度瞓! 小寶寶會唔會懶到唔捨得出世架~~ .............

下廚

25 Aug 2007

好耐無試過親自下廚, 今晚煮咗三色椒炒排骨同埋蒜子浸菠菜! 三色椒好甜好好味呢~~ 菠菜就......... 見佢唔大棵, 但食落係苦o既~~

返埋今日放產假啦~~

24 Aug 2007

今日係最後一日返工的日子, 跟住開始放產假啦~~~~~

我原本o既工作一早已交晒俾同事, 所以今日都唔算忙碌! 又因為部門每個同事都要做一個Performance  Review, 今日係我o既last day, 放工前要做埋個review至走呢~~

不過好麻煩, 要自己寫一篇嘢講自己, 睇下有咩改善地方........ 都唔明解o既?! Performance Review 緊係上司寫下屬, 有乜理由自己要寫返自己?! 確實無聊~~

放工前同咗d同事影相留念, 留住歷史性巨肚的一刻麻~~ 因為應該都無乜機會再見到我咁巨o既身型, 咁巨o既肚子! haha......  

小寶寶又收禮物

同事亞敏好有心, 送咗份小禮物俾小寶寶呢~~

份禮物係一件豬豬衫仔同埋豬豬口水肩, 連個包裝都係豬豬, 所以好有心思, 送呢份禮物俾就快出世o既豬BB呢~~

謝謝你呀~~  好靚, 好得意呀!!!

小鞋子

小寶寶未出世就有佢第一對小鞋子!

係小寶寶舅父同埋佢女友亞Ming送嘅~~ 又幾得意, 幾型仔咁喎~~~~~

不過....... 有排都未着到啦! 起碼要到佢6個月至着到囉! haha......

亞舅父仔呀~~ 淨係買個虎枕同埋鞋仔好似便宜咗你咁喎~~ 話晒第一粒姨甥仔喎~~

同事贈小寶寶禮物

22 Aug 2007

今日放工, 同坐係後面嘅同事打個招呼, 因為佢聽日放幾日假, 而我返埋星期五就放假, 所以今日係我地最後見面嘅日子, 要到十一月至再見啦~~ haha......

唔知乜水咁唔生性, 放工至打我枱頭電話, 仲要打兩次黎, 放工時間緊係當聽唔到啦, 繼續同個同事傾計, 聽咗容乜易要做嘢架!!! hehe...... (但原來呢兩個來電係佢地打黎........)

傾完計, 正離開嘅時候, 竟然被幾個同事欄途截劫!!! 原來佢地幾個夾埋送咗樣好實用嘅禮物俾小寶寶~~ 一張好靚嘅Precious Moments賀咭加紙尿片兩包! haha...... 佢地都醒目, 識得買細碼, 而唔係初生! (點解話佢地醒目, 因為佢地個個都未婚未有細路)

謝謝你們嘅禮物同埋祝福~~~~~

 

不過點解無人祝我減肥成功嘅~~ 唔通佢地鍾意見我圓碌碌, 肥嘟嘟個樣.......  

37週啦~~

今個星期開始踏入37週(政府計已經38週添啦~~), 即係小寶寶隨時都可以出世啦~~ 爭在呢位大少想幾時至出黎見我地! haha......

 

呢排都成日問小寶寶: 你想幾時出世呀?! 出世時記住俾d signal我呀! 最好就係見紅嘅signal啦~~ 仲有要成日提小寶寶, 要等daddy係屋企至好作動呀! 每日就好似傻婆咁同小寶寶講呢堆嘢!

37週嘅孕婦, 越黎越圓潤, 腳依然係豬腳, 肚圍keep住46寸, 磅數17x磅(屋企無磅, 又未到檢查日, 都唔知又重咗幾多~~

) 成日覺得自己好似個大冬瓜, 但好多同事都話我個肚咁大, 但睇你行動又好輕盈! haha...

 連張先生都覺得呢~~ 我仲可以自己剪腳甲添呀~~

人做孕婦我做孕婦, 好奇怪, 好多孕婦都會凸肚臍, 但我偏偏就無凸! 以前成日諗, 第時大肚凸肚臍會係點嘅呢?! 點知........ 凸肚臍無我份!

亦有樣好慶幸, 好多孕婦臨生前都會有便秘呢個煩惱, 而我又好好彩, 仲要好暢順! 成日覺得因為小寶寶唔鍾意與便便為伴, 所以......  

好多孕婦都睇住佢地小寶寶嘅權頭仔腳仔係肚皮上游動, 但我偏偏就未見過! 最利害都係睇住個肚上下左右咁震動, 但見嘅次數唔多, 果然係溫柔嘅小寶寶呀! 小寶寶呀~~ 你係男仔黎架, 溫柔得濟會唔會唔多好呢?!

..............

呢排盤骨同恥骨都好痛! 尤其是恥骨, 瞓醒個下嘢真係差d痛到行唔到~~ 都幾奪命!

仲有發現呢排腳汗越黎越勁, 點解呢?! 係咪因為同懷孕有關呢?!

最近同貓貓傾計, 講開想小寶寶快d出世, 佢提議試下砌咗張床仔先, 因為幾位媽媽都係砌咗床仔之後兩三日, 佢地個小寶寶就出世啦~~ 同埋砌好床要放個公仔係床度, 唔好等張床吉咗响樹, 唔係咁好喎~~

唔通d小寶寶見佢地張床仔未砌好, 所以唔肯出世住?!

 又或者見到張床仔俾個公仔霸住咗, 咋咋臨出世霸返張床??? 張師奶又响度諗埋d無聊嘢!

......

同張先生商量過, 叫佢執下間無人瞓嘅房, 拆咗張床, 方便放小寶寶d嘢, 但佢又擔心俾張老太話! 唔拆床又點執房?! 唔執房又點砌小寶寶張床?! 下星期一定要執下! 唔理張老太咁多~~

孕婦返多兩日工(即返埋禮拜五)就開始放產假啦~~ 唔知做乜, 呢排成日都好攰, 成日都唔夠瞓咁, 開始放假就可以瞓晏d啦~~ 希望小寶寶下個禮拜出世就好啦!!!

吉之島購物日

19 Aug 2007

今日又係無所事事, 懇咗好耐去大埔吉之島(因為自己唔識點去), 終於張先生肯陪我去啦~~

去吉之島之前, 先去食個好好味嘅東江鹽焗雞飯先~~ 好耐無食過啦! 好懷念

 ~~ 真係好好....好味! 再加支忌廉! 都係個句, 想食乜好趁住生之前好食囉!

唔知係咁啱還是個斬雞師傳見我大肚呢?! 竟然俾咗成隻雞脾我喎~~

 就咁叫碟雞飯29蚊, 若叫雞脾飯要35蚊架~~ 大大碟雞飯竟然食到乾乾淨淨! 好滿足呢~~

食飽飽就逛吉之島, 買咗兩套睡衣打算坐月時着, 仲有買咗個麵包盒, 用黎裝小寶寶嘅乾淨奶樽! 跟住去超巿買咗d嘢食就返歸! 返到屋企至醒起唔記得行埋十蚊店! (以前行屯門吉之島, 最鍾意就係行十蚊店) .......

快d擁有自己的家就好囉~~

18 Aug 2007

星期六, 又係無節目嘅日子! (大肚林dump去得邊~~)

又係張先生做大廚嘅日子, 佢好似越黎越鍾意煮飯仔咁呀! haha......

是晚靚湯靚餸有......

淮山慈實節瓜煲豬展湯、薯仔炆雞翼 (薯仔同雞翼都好好味

) 同埋薑汁炒芥蘭!

今晚張老太同張老伯返咗黎~~ 問佢飲唔飲節瓜湯, 佢掉返轉問我瓜涼架喎?! 乜你飲得咩?!

我只好回應一句, 節瓜唔係正氣嘅咩?! (因為媽咪同我講節瓜係正氣) 佢就話憑瓜都涼架啦~~ (又係佢講嘅永遠是對的咁!) 之但係是晚佢買咗個西瓜返黎俾我地食!

..........

張先生成日話我坐月時張老太會識煲嘢我食, 但睇怕佢...... 真有點擔心! 好彩我都叫咗媽咪過黎幫我手!!!

張老太返黎若得我係屋企, 佢通常都無乜嘢講, 跟住就返房, 但我發覺, 當張先生係度, 佢就會哦張先生, 好似今晚咁, 上個禮拜張老太買咗十幾個橙返黎, 返到黎見仲有成五六個係度, 就哦張先生做乜唔食?! 幾蚊一個架, 晒晒d嘢! ......... 張先生呢個時候, 就會借咗聾耳陳對耳

 haha......

大佬呀~~ 次次都買成籮生果返黎咁濟, 邊食得晒! 買成廿個奇異果返黎都試過, 一個禮拜邊食得晒?! 最終又咪爛咗!

其實張老太對我地好好, 但始終唔係自己媽咪, 硬係覺得生活上夾唔黎! 佢一哦張先生我就覺得好煩, 因為我媽咪唔會咁哦我麻~~ 而我又未夠高深借到聾耳陳對耳, haha...... 又一次令我好想快d擁有自己的家! 希望小寶寶學爬之前擁有自己的家啦~~