23.2.2010
婆婆話B仔尋晚十點幾就瞓咗, 無食奶咀... 十點幾就瞓, 同以前一樣, 希望B仔真係習慣咗沒有奶咀的日子啦~
B仔叻仔! 繼續加油!
2010年2月23日 星期二
沒有奶咀的日子... 第五日
22.2.2010
今朝一早B仔媽已急不及待打電俾婆婆問B仔尋晚既情況, 婆婆話B仔十點幾上床, 但成十一點幾至瞓得着, 無食奶咀, 但就瞓到第二朝六點幾嘈食奶, 食飽又繼續瞓, 唔願起身返學, 婆婆就好急忙地... 又要幫B仔梳洗, 又要準備早餐, 八點五十分至出門口!
婆婆話B仔返學好開心, 入到學校, 自己換鞋, 隔離個小朋友就不停喊, 之後莫老師拖住B仔, B仔就拖住不停喊既個位同學, 好開心咁入課室! B仔往後都咁鍾意返學就好啦~~ 其實B仔媽都好擔心K1時, 學校轉咗, 環境唔同咗, 老師又唔同咗, 同學又唔同咗, B仔會唔會唔鍾意返學?!
B仔媽放工時又急不及待打電俾B仔, 婆婆話B仔成三點幾至午睡, 瞓咗兩個鐘左右咋~ 平時B仔一放學食飽飯就瞓, 一瞓就三粒鐘架麻~ 不過B仔都好叻仔, 無嘈食奶咀!
到夜晚, B仔打電俾B仔媽(當然係婆幫佢按號碼), 不停咁媽咪!媽咪! 嘩... B仔媽真係聽到好冧呀!!!!!!!! 叫得真係寧舍好聽, 暈得一陣陣呀~~~~~~~~~ 之後俾B仔爸聽, 佢又係咁BaBa! BaBa! 突然覺得個仔好似好掛住我地咁~ 好似好想返屋企咁呀~~
沒有奶咀的日子... 第四天
21.2.2010
尋晚B仔瞓到四點零鐘, 突然放聲大哭, 要搵奶咀...... =.=""""" B仔媽不停 "Tum" B仔都無用, 仍然繼續放聲大哭, B仔媽曾經有一刻衝動想放棄, 俾返個奶咀B仔, 因為實在唔想嘈到公公婆婆瞓覺, 但諗深d, 依家至黎放棄真係會前勁盡廢, 結果就係咁 "Tum" B仔, 又將Thomas & Gorden放係B仔手中, 叫B仔拎住Thomas & Gorden一齊瞓覺至搞得掂咋~
之但係瞓瞓下... B仔無啦啦又嘈... 跟住突然一句: 唔坐呢度! (發爛渣既語氣) B仔媽望佢一望, 原來係發夢... haha...........
到六點幾又嘈食奶... 一瞓就瞓到成十點, 婆婆出咗門去搵位飲茶我地都唔知... 連B仔爸黎到婆婆家Join埋一齊去飲茶, B仔都唔願醒... B仔呢個新年假期變咗爛瞓豬呀! 返學點算?!
飲完茶, 公公係反斗城買咗個Gorden俾B仔, B仔其他Thomas既friends都唔揀, 係都要揀Gorden, 呢期B仔真係勁迷呢~~ 之後去咗巿鎮公園個爬蟲館, 估唔到B仔見到d 蜥蝪, 蛇...一d都唔驚, 又係咁睇d勁大隻既龜, 仲係咁同佢地say hello!
之後就沿路行返婆婆家, 係公園玩咗一陣又跑咗一陣, B仔突然話要痾屎, 唯有急急返婆婆家"辦大事", haha.............
契媽黎咗同我地拜年, 仲買咗個thomas背囊仔俾B仔呢~~ 下次同契媽食飯要孭出黎至得! haha.........
九日既年假終於完結, 照顧咗B仔咁多日, 真係有點唔捨得! 明天又要繼續返工, B仔繼續返學, 唔知會唔會扭計呢?! 唔知B仔戒奶咀, 婆婆會唔會心軟呢?!
沒有奶咀的日子... 第三天
20.2.2010
尋晚B仔嘈咗一次要奶咀, 但又係好快就瞓着... 朝早七點左右又嘈食奶, 然後就同B仔媽瞓到差不多十一點... 真係爽呀... B仔媽瞓到唔想郁呀! 但要去郵局一趟, 不得不趕快起床梳洗兼俾早餐B仔食...
B仔母子二人超級急趕地趕得切一點前去到郵局拎信, 趕到B仔媽有氣無訂抖咁濟呀! 之後同B仔去食拉麵, 然後就返婆婆家~ (B仔爸返工呢~)
B仔媽想觀察下B仔係婆婆家無奶咀既情況, 又希望讓婆婆睇到B仔媽有多大既決心同B仔戒奶咀... 今晚B仔母子霸佔咗舅父仔張大床, haha.....
B仔係婆婆家沒奶咀的晚上... 臨瞓前都幾扭計要奶咀... B仔應該知道掉既只係媽咪屋企隻奶咀, 認為婆婆度有... 當然, B仔媽重施故技, 繼續話B仔自己已掉咗奶咀, B仔就話BaBa掉咗奶咀, haha................ B仔又係一手Thomas, 另一手Gorden, 蘊釀咗一輪就自然入睡......
沒有奶咀的日子... 第二天
19.2.2010
尋晩半夜B仔只嘈咗一次搵奶咀, B仔媽同B仔講... B仔你自己掉咗奶咀, 唔記得咗呀?! 拍兩拍B仔又進入夢鄉... 到晨早六點半就嘈要飲奶..... 之後同B仔媽瞓到九點幾便起床, 因為公公婆婆過咗黎搵我地飲茶呢~~ 幾日無見B仔, 公公婆婆掛住B仔呢~
飲完茶, 公公就車咗B仔母子出大角咀, B仔媽約咗大姨媽同埋人類朋友嘆茶呢~ 人類朋友既亞囡話咁快就已經六個月大, 圓碌碌咁, 好得意呀! 係咁望住B仔同朗哥玩, 好似想一齊玩咁呀~~
B仔就係咁漏朗哥玩, 但朗哥把口就話唔同BB玩, 結果又咪同B仔係度玩thomas, haha... 其實B仔都已經唔係BB囉~ 係小朋友黎架啦~ Haha......
飲完茶我地就上咗人類朋友屋企坐下, B仔入門一見細豬(人類朋友隻狗, 不過被籠困住咗)就指住細豬叫佢Sit, 又叫細豬 Hand, 好搞笑~ 又叫細豬做Pizza... =.=""" 不過細豬又聽B仔點喎! 叫佢Sit真係Sit, haha............
我地坐咗一陣便回家, B仔搭火車全程都唔肯瞓 (已經眼瞓到爆燈架啦~), 要望風景都唔願瞓............ 返屋企前買咗一底雞旦仔食, B仔好鍾意食, 不停話 "雞蛋" 好好味, haha...
成底雞旦仔俾B仔一人食晒咁濟..... B仔媽食咗五粒咁多啦~
晚上食飽飯無嘢做, 無聊既我地係屋企玩人肉騎牛牛, B仔非常開心, B仔爸就扮牛扮到膝頭哥痛, B仔媽就好驚B仔跌落地... 我地確實好無聊, wakakakaka....
第二個沒有奶咀的晚上, B仔如常十點幾就上床想瞓, 無奶咀... 今晚開始扭扭地計, "晝"晒眉係咁話要奶咀, B仔媽又提B仔自己掉咗奶咀, B仔就叫媽咪買, B仔媽就叫B仔望下出面, 天黑忟忟, d鋪頭關晒門, d人都瞓晒覺了~~ B仔瞓係床上, 又不停地講嘢, 拎住Thomas & Gorden, 之後又話要媽咪抱, 過咗大床瞓係度, B仔媽攬咗不到兩分鐘, B仔已熟睡中... 都已經係晚上十一點幾了......
2010年2月22日 星期一
大年初五 ~ 第一天戒奶咀
18.2.2010
年初五無節目, 天氣依然咁凍, 完全進入唔多想郁既狀態! 一家三口去樓下食咗午餐, 之後就去街巿買餸, d豆苗真係貴到無朋友呀! 98蚊一斤, 真係搵人買囉~
呢個新年假B仔媽已經好想好想同B仔戒奶咀, 下晝B仔媽拎咗盒鈣司寶黎飲, B仔見到, 眼前一亮, 不停嚷住要飲, B仔媽就趁住呢個機會, 叫B仔掉咗個奶咀, 以後唔食奶咀至有得飲, B仔以九秒九既速度走去放奶樽既盒度, 拎個奶咀, 然後走入廚房將奶咀自己掉入垃圾筒......
到夜晚要瞓覺既時候...... B仔又走去奶樽盒度拎奶咀去瞓覺, 此時佢望住個奶樽盒呆咗一呆 (B仔媽估計B仔發現點解無奶咀... 話說B仔係有兩個奶咀既~ 掉既時候只拎咗一個去掉..... 可能B仔見仲有一個, 所以咁順攤走去掉奶咀...) 跟住就講: 奶咀唔見咗?
B仔媽就提B仔自己今日下晝掉咗個奶咀, B仔爸又倒咗垃圾, 奶咀掉咗架啦, 無得食架啦~ B仔臉上帶點無奈, 但又無扭計.....
瞓係床上, 拎住Thomas & Gorden既B仔, 無奶咀, 不停係咁講嘢, 間唔使又講無奶咀, 之後又不斷叫: 媽咪! 媽咪! 叫咗一輪媽咪又話要媽咪抱住...... B仔媽就叫B仔黎媽咪床瞓啦~ B仔媽拍咗幾拍就極速瞓着~ (梗係啦~ 11點幾至瞓得着, 又無午睡, 眼瞓到爆炸呢~)
第一晚戒奶咀尚算平安渡過~
大年初四
17.2.2010
今日B仔媽本來要返工, 但請咗三日假陪B仔, 仲要天寒地凍, 兩母子瞓到十點半, 煮烏冬食, 玩下又睇下電視, B仔午睡過後就過柏滔屋企玩, 今回仲有栢軒添呀~
三個差不多大既小朋友, 最乖就係栢軒, 有主場之利既柏滔都唔嘢少呀, Wakakaka... 同B仔不斷大叫, 大笑, 柏滔屋企嘈到拆天咁濟, wakakaka.... 
是晚我地叫pizza, 三個媽媽各有各忙住餵飽個仔, haha... 到三位大少食飽飽, 三位媽媽就慢慢嘆凍晒既pizza同埋意粉... 三位大少唔知幾時先識得唔好淨係玩, 自己食呢?!
唔經唔覺玩到九點幾便回家, 天氣真係............................. 勁凍!
2010年2月17日 星期三
大年初三 ~ 感動
16.2.2010
今日仍然天寒地凍, 又無地方去拜年, 食咗午餐就去街巿買餸, 是晚打邊爐! 嘩... 街巿d餸貴到呢~~~~~ 買近蝦大拿拿64蚊一斤, 平時應該三四十蚊搞掂~ 不過自己買嘢打都抵過出街打既! 聽婆婆講, 買斤菜心都廿八蚊斤~~~~~ >.<
今日仲煲咗清保涼湯, 呢排又煎年糕, 又煎蘿蔔糕, 要飲返d湯水潤返下至掂~
傍晚時份, 維納斯契媽放咗佢亞囡上黎一陣, B仔見到姐姐黎同佢玩, 異常興奮呢! B仔越大, 就越覺佢自己一個人玩好悶蛋, 情況就好似好需要多一個玩伴~ 之但係...... 中咗六合彩至生囉~~ HAHA...
夜晚拎埋D火煱餸菜落樓下龍叔叔屋企一齊打邊爐~ B仔見到澄澄妹好好開心呢~ 澄澄妹妹係房食奶奶, 又走入去騷擾人, 妹妹食飽奶奶, 又八掛唔肯瞓~
烚下烚下不經不覺都差唔多11點, B仔媽湊B仔返屋企先, 但一出門口, B仔就叫"BaBa, 一齊返屋企!", B仔要叫埋BaBa一齊至肯走~ B仔爸唯有咋咋帝一齊係Lift口等lift啦~ 跟住同B仔講要去買d嘢, B仔至肯呢~
B仔爸回家後同B仔媽講, 個一刻, 真係好感動!!!
B仔媽成日都同B仔爸講, 唔好以為B仔乜都唔識, 唔好以為B仔唔要B仔爸就等如唔愛B仔爸, 其實佢乜都知, 佢都會知除咗媽咪, BaBa都係至親!!!
2010年2月16日 星期二
2010年2月13日 星期六
2010年2月11日 星期四
B仔爸家人團年
12.2.2010
本來明晚至食團年飯, 之但係... 原來大排檔明晚唔開, 臨急改咗今晚食...
放工準時即閃, 仲要返屋企攞d嘢俾99同埋亞嫂們, 再飛的去大排檔, 七點鬆d就趕到, 當時佢地已齊人lu~ 佢地見到得B仔爸媽到好似好錯噩咁~~ 仲問B仔呢? 大佬~~ 唔駛返工咩?! 你間公司無得放早咩? 間公司你開就好囉~~ 仲以為B仔爸會車B仔黎? B仔爸都要搵食架~~ (以上既答完全係B仔媽心諗, B仔媽未有咁勇咁答人, HAHA)
之但係... 佢地好似都覺得我特登唔帶B仔出現咁~ 算吧啦~~ 有佢地講無人講咁濟~
食飽飯, 又到派利是時間, 呢個環節真係尷尬到呢~~~~~三哥話唔見B仔唔俾利是, 咁OK啦~ 無所謂啦~ 之但係三嫂又照俾B仔爸, 三哥又係B仔爸手上拎返, 來來回回兩次之多, B仔媽就好尷尬地開口話: 你等見到B仔先俾佢啦~ (心諗: 好好玩咩?! 玩到咁)
一場飯局就此完畢, 各自回歸~
訂閱：
意見 (Atom)