hihi: 8月 2009

2009年8月29日星期六

又剪髮

23.8.2009

今日無節目, 唯一節目就係同B仔剪髮, 天氣實在太太太熱啦~ 係時候剪下佢!

剪到成頸都係, HAHA........

d頭髮碎痴晒係d手度, 好似有屎係身咁........

剪到坐係度發"牛斗"咁, haha..... 但其實佢係度睇緊thomas dvd呢~

剪到唔耐煩啦~ d頭髮碎又吉肉, 咁點?! 咪喊囉~

2009年8月28日星期五

一田Thomas展

22.8.2009

今日同B仔去咗沙田新城巿, 去之前上咗去嫲嫲度探佢地, 點知都未行到門口, B仔唔知係咪認得條路, 一去到條小斜路就卻步, 唔肯行, 仲想掉頭走添呀~ 唯有抱起佢繼續前行!

去到門口, 嫲嫲已企咗係度等我地, B仔一見嫲嫲當然即扯大個喉嚨喪喊啦! 嫲嫲咪又係依然不斷話B仔細膽, 又講叫婆婆要帶佢出多d街見下人壯大個膽, 當然B仔媽無出聲啦~ B仔爸就更加無出聲啦!

婆婆湊B仔係完全無問題, 仲湊得不知幾咁好呀!!! 婆婆間中都會帶B仔去同d師奶朋友嘆茶, B仔係見佢至會喊成咁之麻, 關咩婆婆事丫~ 不過同佢講都係晒氣, 講完佢都會依然固我係咁發表佢既"偉論", B仔媽還是慳返啖氣好過~

入到屋我地慣常都會裝香俾觀音祖先同地住公公, B仔都好乖, 收聲兼肯拜拜, 當然拜完又見到嫲嫲又黎喪喊過啦~ HAHA...............................

B仔爸都怕咗佢個仔, 佢都唔想個仔不停咁喪喊咁可憐, 所以逗留咗一陣就走人去新城巿Shopping~

適逢一田有Thomas文具用品展, B仔又點會錯過丫~ haha...... 去到B仔見到個模型, 望到眼定定, 仲想擒入去添呀~

之後有d Thomas玩具俾小朋友玩, d小朋友係咁拎住d火車係度玩, 玩到車不肯放手, 睇得出B仔個樣勁想攞黎玩呀, 之但係佢邊夠d哥哥爭丫~ 個個哥哥渣住部火車九年都唔肯放手讓俾d細bb玩~ 連B仔爸都忍唔住口同個哥哥講, 你玩咗咁耐, 不如讓俾BB玩一陣啦, 個靚仔當然唔so佢啦~ 把鬼火B仔媽咪嗌走人, B仔當然唔肯, 結果咪發爛咋囉~~~ =.="""

之後去咗睇thomas 電視至肯收聲呀~ 之但係又係睇到唔捨得走~ =.=""""""""""""

中緊電視Thomas毒.....

最後去咗一田睇返學鞋, 要買黎開學着呀! 點知......... B仔喪扭計要瞓覺, 之但係又唔肯坐車仔瞓, 想搵奶咀, B仔媽又忘記帶喎!!! 抱住佢攰到瞓咗, 但一放車仔又黎喊過, 激氣呀! 於是走人返屋企唔買啦~~

是日太攰, 天氣又熱, 無買餸, 出街食算啦~ HAHA......

2009年8月18日星期二

又投票啦~ Thanks!!!

B仔又玩投票啦~

麻煩各位幫B仔投票丫~

一人一票架~ (我諗係認IP架)

HAHA...

感激! 感激!

http://www.baby-kingdom.com/customer/kodak/minisite0906/kodak_bigphoto.php?id=62

2009年8月17日星期一

免費泳池游水樂

16.8.2009

今朝瞓到九點幾就醒, 接近11點去咗M記食早餐, 好彩仲來得切有早餐叫遮~ HAHA...

今日屋企樓下泳池開放日, 免費入場, 一到兩點鐘一家三口就落泳池浸水, HAHA... 唔洗錢喎~ 去到竟然無乜人喎!!! SO GOOD!!! 不過就超晒呀!!!

B仔當然又超興奮啦~ 又係唔肯用水泡~ 係BB池度行來行去, 亦試過未企穩, 成個坐咗去水入面, 嚇C B仔媽呀! 好彩無浸親咋~~~ 浸完又黎行過, 真係膽生毛架!!!

玩咗個幾鐘就返屋企, 唉... 係會所大堂, B仔係度跑, 一嘢又仆咗係地上, 唉.......... 又"cup"到個咀, 呢鑊仲要幾深下, 唉.................... 尋日就"cup"到偏右, 今日就"cup"到中間同偏"左", 係咁流血, 腫咗, B仔就係咁喪喊, 喪喊到入屋都仲喪喊, B仔媽真係肉都痛埋呀!!! 呢鑊B仔個咀有排痛囉~~~~~~~ 沖完涼食支奶就極速瞓咗! 怕且頭先仆一仆係因為眼瞓企唔穩吧!!!

瞓咗兩個幾鐘都唔多願醒, 焗住被整醒當然又喪喊一大輪啦! 無計, 要返婆婆家食飯啊~~~

B仔今個禮拜跟口水尾講嘢叻咗呀! 仲要自己讚自己叻仔呀! HAHA... 好搞笑呀! (因為B仔做完B仔媽叫佢做既嘢, B仔媽都會讚佢叻仔架) 叫牙刷做牙齒, 呢個有待改正佢呢~

禮拜六無節目

15.8.2009

今日無節目, 諗住同B仔兩母子去游水, 但下午竟然落起大雨, 仲要落對差d望唔到對面屋呀!!! 太過份啦~ 仲諗住兩母子落樓下泳池浸水消暑架麻煩!!!

下午柏滔上咗黎玩, 玩咗一輪我地就落去公園度sir滑梯, 個迷李滑梯剛好孖住兩條, 佢地可以一人一條, 點知無啦啦又多咗個哥哥走黎玩! 本來都好地地, 三個小朋友sir滑梯, 但玩玩下, 個哥哥輪係B仔後面, B仔坐係個sir滑梯頂時坐咗陣至sir, 之但係, 個哥哥無啦啦踢B仔一腳囉~ 嘩... 都慶慶地架啦~ 不過見佢都係好細力, B仔又無反應, 應該唔係點踢到佢遮~ 所以B仔媽都無出聲!

點知B仔sir咗落去, 都未離開個sir滑梯, 個哥哥二話不說就sir落黎, B仔媽真係火都黎埋, 至離譜係個哥哥個爸爸仲坐係度郁都唔郁, 又唔走埋黎了解咩事! B仔媽當時已好嬲咁同柏滔媽講件事, 人地個爸爸都仲唔C埋黎, 嘩... 點做人老豆架! 養不教, 父之過, 咪就係呢D人囉~ 咁唔負教仔既責任, 咪學人生仔啦!

柏滔媽好勇呀! 話返個細路, B仔媽就唔敢囉~ 現場環境又咁靜, 人影都無隻, 仲要一個男人對住兩個稱住兩隻馬騮仔既師奶仔, 真係惡鬥唔過呀! B仔媽唯有叫走人, 丫~ 點知個衰人又稱佢個仔走喎! 衰得佢咁Q衰呀! 兩隻馬騮仔有得玩當然唔捨得走啦~ 結果我地都玩多一陣至走人!!!

B仔初初一去到公園, 太曳之過~ 係sir滑梯底意圖爬上頂, 結果爬咗兩步就冼腳扒咗係度, 結果... "cup"損個咀囉~~ 好彩傷得唔算好深!

玩到咁上下我地都走啦~ 我地一個行東, 一個行西, 太家抱住各自既馬騮仔, B仔媽偷望佢地, 見到B仔同柏滔都係咁大家互相望住大家呢~ HAHA..... 唔知係望住大家定係望住個sir滑梯呢?! B仔就係咁同柏滔bye bye, haha... 好得意呢~~~

今晩本來想滾節瓜湯, 點知買咗舊爛節瓜 =.="""" 結果用咗d豬肉剁肉碎蒸蛋, 仲有蒸咗條斑仔, 烚碟菜心, 咁就一頓豐富晚餐! 晚餐後B仔極速瞓咗! HAHA...... 梗係啦, 全日都唔肯瞓!!!

好耐無北上啦~

14.8.2009

今日下午攞咗假, 同B仔爸一齊北上揼骨, 上到去食麵點王, 好味又抵食! 食到差不多走時竟然落起大雨上黎~ 於是就去瑪雅城咗揼骨, 揼完都已經六點幾, 咋咋臨返香港返婆婆屋企食飯, 跟住就湊B仔回家~

B仔好似知道我地帶佢返屋企咁, 見我地話走, 自己拎鞋着定等我地一齊走, HAHA...... 臨走前仲向公公婆婆逐個say bye bye!

2009年8月11日星期二

42蚊既三餸一湯

11.8.2009

又係時候煮下飯啦~~ 呢個禮拜既晚上都頗full呀, 今晚唔煮就真係... 成個禮拜都出街食架啦!!! 雖然B仔爸指明今個禮拜B仔媽要煮飯的話, 佢係唔會洗碗, 因為太攰, 咁B仔媽都明白既~~ (因為平時係一個煮一個洗架麻)

是日晚餐........... 呢餐大拿拿用咗42蚊呀! haha... 出街食起要一個double或triple呀!!!

焯菜心 (呢期d菜心好甜呀! 好味!)

甜梅菜蒸肉餅 (咸咗dd, 怕且係梅菜浸得唔夠耐~ 但撈飯一流呀!!!)

洋蔥炒蛋 (正!!! 買咗紫色皮個隻洋蔥, 好爽呀!!!)

夜香花滾豬潤廋肉 (正!!! 但豬潤滾得過咗龍, 變得唔好味~)

張B仔23個月大啦~

10.8.2009

話咁快就23個月大啦~ 仲有一個月就兩歲啦~ 生日會, 唔搞囉~ 都仲係太細邊識丫~ haha......

B仔近呢個月講多咗嘢, 個咀無停咁, 一係不斷大叫, 一係不斷講嘢, 講得至多咪就係車車、火車、飛機、巴士、的士, Be Bu車 (即係警車/消防車), BaBa車, 呢D都係B仔鍾意既嘢呢~ 搭車時又不停見到咩車就係度不停講......

識叫人開電視、讚自己叻仔、叫牙刷做牙齒、開/熄燈、廁所、尿尿、痾屎、沖涼、快D

一唔見咗佢想搵既人就會講: 媽咪, 唔見咗! or BaBa, 唔見咗! or 婆婆, 唔見咗! or 公公, 唔見咗! or 舅父, 唔見咗! haha.... 好得意~

識得講, 媽咪返工 or BaBa返工 or 公公返工 or 舅父返工

食飽咗識講: 飽飽! 示意唔好再餵佢食嘢

識示意要/唔要, 好/唔好, 乖/唔乖, 有時問B仔乖唔乖, 佢會答乖, 有時又會答唔乖, 答唔乖, 跟住個句就係話BB喊, haha... 佢又知自己喊係=唔乖喎!!!

問B仔開唔開心, 佢會答: 開心

勁鍾意跑, 跑得好快個隻, 仲要邊跑邊講: 跑! 跑!

見到英文字就會講: A,C,B,E,X,O =.="""""

婆婆教佢講爺爺嫲嫲, 佢就會跟住講, 之後個句就係: 喊! 喊! haha... 佢知見親兩老佢都係喊喎~

一提帶佢見爺爺嫲嫲好唔好, 一定會話唔好! 問佢點解?! 佢會答: 喊! 喊!

勁鍾意踩單車

第一個識叫人個名就係: 柏滔! 第一次游水時識叫, 知道誰是柏滔, 到依家都記得!

依家叫做成功戒片, 識急時叫尿尿, 搵你同佢去廁所, 但行緊去廁所時會叫你: 快D! 快D! 出街包片片好多時都唔痾落片片度, 依家出街就要同佢搵廁所!

仲有依家識叫: 痾屎! 痾屎! HAHA..... 好搞笑呀~~~~~~~~~~

2009年8月9日星期日

公園一遊

9.8.2009

今日B仔爸返工, B仔媽就要自己湊B仔返婆婆屋企~ 晨早十點半就整咗瑤柱節瓜肉片湯飯俾B仔做早餐, 跟住天氣咁好, 咋咋臨洗咗兩機衫就出門後返婆婆家~

上車無幾耐B仔就開始有睡意, 但又要捉住小巴窗個條扶手棍, 又唔肯捱係B仔媽度, 之但係自己係度釣魚, 真係呢...... 最後當然爬咗係B仔媽度瞓到豬的一樣啦~ HAHA......

返到婆婆屋企度就半開合(眼睛), 婆婆第一時間塞個奶咀俾B仔, 唉............ 咁我又衰, 無同婆單聲嘗試同B仔戒, 之但係呢一嘢塞入咀就真係返返轉頭囉~~ 夜晚又係, B仔喪扭想瞓要奶咀, B仔媽又係唔俾, 公公又第一時間拎個奶咀俾B仔, 唉......... 睇黎, 有排都未戒得甩!!!

B仔唔午睡, 公公又午睡醒, 我地同埋公公婆婆去咗公園度行下~ 公園有個大型吹氣玩具, 俾小朋友入去彈下跳下, B仔睇人彈好開心, 但公公抱佢埋去彈時, 佢竟然驚, 縮腳, 係咁話唔玩唔玩........... =.=""""" 呢D咪叫做應驚時唔驚, 唔應驚時就走去驚囉~ 衝出大海又唔見B仔你話驚 =.=""""""

B仔係公園四圍跑~ 玩下大算盤, 搖下車仔... 邊跑邊叫"跑! 跑!", 真係搞笑~~

公公就係度練氣功咁做運動, HAHA... B仔跟住公公FING手, 真得意~~

玩到攰就坐低抖下~~

飲啖水先~~

嘩... 天氣真係超熱呀! 熱到B仔大汗搭細汗呀~ 一行四人濕晒兼臭晒~ HAHA... 玩咗一輪就返婆婆屋企!

返婆婆屋企前去買咗張枱仔俾B仔用, 希望佢肯用啦~

踩單車 + 游水

8.8.2009

今朝B仔又晨咁早起身, 八點..... 就嘈食奶!!! 食飽仲要唔瞓...... =.=""""""" 之後一家三口起床梳洗, 出發去大尾篤食早餐! 去咗間食店嘆茶...... 篤牛肉食, 食到樣衰衰的, HAHA.......................

食飽飽就去踩單車, B仔爸教B仔踩單車, 但... B仔隻腳仔唔夠長, 踩唔到, HAHA......

B仔恨有部單車恨咗好耐架啦~ 係公園見到人地玩單車走咗去, 佢就好唔客氣咁坐係人地部單車度玩架啦~ B仔媽都盤算緊買部單車俾佢, 點知有日有個同事問我要唔要單車仔, 佢仔已唔啱踩, B仔媽梗係nur飯應話要啦~ 慳返三百幾蚊呀~ HAHA..... 仲要好快唔啱踩~

今日有部單車俾B仔踩, B仔不知幾幾幾咁HAPPY呀~~~~~~

不過天氣實在太太太...............熱啦! 熱到個人都唔想郁(B仔爸媽), 連相都無心機影啦~

玩咗差不多一個鐘就返屋企, 臨走前, B仔媽話走啦, 單車放返去車尾箱啦, B仔就係咁話唔好唔好! 到部單車放埋入車尾箱, 嘩... 不得了, 喪喊! 仲要兩行眼淚係咁流, 大大滴既眼淚添呀...................

之後就返屋企樓下泳池浸水, 去到有個大叔係度游緊水, 佢游咗無幾耐就走人, 跟住就B仔一家三口包場游水~ (星期六, 竟然無人黎游水?! 又唔係好晒!) B仔非常HAPPY呢~~~ 成日係度喪叫, HAHA...

B仔唔肯用水泡, 係BB池度行黎行去, HAHA... 仲要想學人去大人池度, 仲要係唔用水泡個隻... 真係膽生毛呀!!! 安全至上, 都係去返BB池玩算!!! =.="""""

今晚B仔媽嘗試唔俾奶咀B仔, 試下佢會點, 結論係... 好似D人毒癮發作咁!!! 係咁係度EE 哦哦, 係咁係床度碌黎碌去, 係咁係度同你搏鬥, 挑戰你既耐力, 挑戰你耳仔可承受幾多既煩音!!! HAHA...... (B仔又唔係喪喊喪扭, 但就成日"縐"住眉係咁EE 哦哦) 大家折騰咗都起碼個幾鐘呀~ (都搞到11點半呀) 最後扭多幾扭, 自己頂唔住瞓咗, HAHA...... 今晚算係成功咗!!!

校服誘惑

7.8.2009

放工返婆婆屋企食飯, 同B仔試下套校服, 一試... 嘩... 好可愛呀!!! HAHA...... 着上身, B仔就話唔着唔着~ 唔着都要着架啦~ haha... B仔媽要影相麻~ 好多朋友仔見到B仔呢張相, 話佢成個女仔咁呀! HAHA... 出世至今, 就係呢張相至有人話B仔似女仔呀!!!

舅父仔做臨時攝影師, 用益力多利誘, B仔唔多合作, 又想要支益力多, 結果俾舅父仔好惡咁話咗兩句...... 扁咀仔...... 但唔敢喊...... (舅父仔當時確實好惡呀)

最終見B仔媽係度, 就忍唔住喪喊出黎......

俾支益力多佢即時變面, 笑晒......

喊 -> 笑 -> 喊 -> 笑...... 不繼係咁變面...... 都係影唔到張靚既學生相!!! 算啦~ 唯有放棄!!!

跟住換咗套運動裝, 好醒神呀!!!

B仔媽將個相機袋俾B仔孭住, 話孭書包返學, B仔好開心咁孭住個"書包"四圍行, HAHA... 好得意呀!!! 希望你返到學校都係咁HAPPY啦~~~

唉... B仔媽開學日攞唔到假陪B仔去返學呀!!! 話晒係第一次麻~~~ 真係好遺憾呀!!! 唯有將呢個神聖任務交託俾B仔爸!!!

2009年8月5日星期三

好冧冧呀~

4.8.2009

今日放工如常打電話俾B仔同佢傾計, B仔今日心情算靚, 係咁ge lee 古 lu講BB話多, 但都有講dd 正常詞語, haha........ 好多時, B仔都會講講下即變臉發忟憎唔講, 佢真係話唔講就唔講, 會大叫發脾四 =.=""""" 唔講咪唔講囉, 駛唔駛發脾四呀!

傾計期間, B仔叫B仔媽 "媽咪" 呀~ 今回唔係婆婆係身邊提佢呀! 係佢自主地叫媽咪呀! 仲要叫咗兩次呀!!! 嘩... 開心到B仔媽呢~ 真係好鬼冧架~~ 所以要記錄一下!!! HAHA......

交學費+買校服

3.8.2009

今日B仔婆婆幫B仔媽去學校交學費、雜費同埋買校服! B仔媽要返工, 唯有靠婆婆幫手!

聽婆婆講返, B仔入到學校又第一時間去玩車車, 玩到唔捨得走呀! 婆婆要引誘佢話去睇下隻雀仔做咩?!?! 至可以成功帶B仔離開學校呢~

開學之後唔知B仔會點呢?! 會唔會掛住坐車仔唔肯入課室呢?! 唔肯聽老師話離開部車仔, 會唔會扯大喉嚨喪喊呢?! 唔受老師控制, d老師會點泡制佢呢?! 唔知去廁所識唔識得自己去?! 會唔會射濕晒條褲架?!

唉... 9月1日開始返學, 好想請假湊佢返呀!!! 話晒B仔人生第一次返學丫麻~~~ 但...... 唉.............. 九月攞假, 確實超超超..... 有難度呀!!!!! 今年唔放, 都希望出年可以放到丫~ 話晒出年九月係真真正正去返學丫麻~~~ 確實勁想親自湊B仔去返學呀! 硬係覺得係一個遺憾黎! 到時真係攞唔到假, 就真係要靠B仔爸啦~~~~ B仔, 返學你要乖呀!!! 聽老師話呀!!!

遲下B仔媽要幫B仔買黑皮鞋同白波鞋啦~~ 又要破財啦~~

好無聊既週日

2.8.2009

今朝B仔又晨咁早七點幾起床, 跟住瞓返, 但八點幾又醒, 以為佢肚餓, 開支奶又唔飲, 又唔瞓, 淨係吮個奶咀... =.=""" 差不多九點B仔爸個好友龍叔叔走黎借嘢(乜佢又咁早呀?!), 想撻係床度都唔得, 焗住要起身~ 梳洗好就一齊去飲茶!

飲完茶又無地方好去, 本來打算去西貢游水, 但天氣實在太差, 又翳焗, 都係留係屋企好~ 跟手B仔又午睡, 瞓醒去咗M記下午茶, 食飽飽見有時間, 不如去樓下泳池玩下水, 落到去都4:50PM, 諗住都玩到40分鐘, 因為佢收5:30PM, 去到接待姐姐話, 救生員5:15PM就會趕人上水啦喎~ 你地仲入唔入去呀?!?! B仔一家梗係唔入啦~ 一入一場都要30蚊架麻~

出門口時, B仔仲超級興奮咁出發去泳池, 仲要係都要自己拎返佢個水泡, 點知又原路折返, B仔都唔知發生乜事?! 搭lift時個樣當時真係見佢頭頂好多問號咁, B仔爸媽真係忍唔住笑, 加上B仔一家確實無聊至極, 一心諗住去游水點知要原路折返, HAHA....................... 一入屋就知啦~ 喪喊!!! 係都唔肯除鞋!!! 係都唔肯放返好個水泡!!! =.="""""" 放好d嘢就唯有出發返婆婆度, 等B仔忘記佢~ HAHA...

路過公園, 見人唔多, 諗住俾佢去玩下跑下, 點知B仔係都要由個"sir"滑梯底下爬上頂, 個滑梯都唔矮架~ 仲要旋轉形個隻, 上面有人"sir"落黎真係見唔到佢架~ 抱佢上頂"sir"落黎又係度喪喊喪扭, 仲要扯大個喉嚨係度喊 =.="""""" 結果, 由B仔爸強硬抱住佢走人! 扭計~ 自然無得去玩架啦~

返到婆婆度, B仔好眼瞓但又唔肯瞓, 食飽飯自己係度玩, 玩玩下, "嘭"一聲, B仔成個扒咗係地下喪喊, 膝頭跪咗係地上, 個額頭又黐咗係地上, 食緊飯既B仔媽極速抱返起佢, B仔當然喪喊不停啦~~ 唉... 眼瞓又唔去瞓, 自己又企唔穩!!! 於是B仔媽極速食飯跟住陪瞓, 之但係...... 陪到B仔爸媽要回家都未肯瞓! =.="""

就係咁, 過咗一個又熱又無聊既星期日~