27.4.2009
429係B仔爸同B仔媽註冊三週年既日子, 當日B仔爸要返工呢~ 咁啱B仔又係度, 所以提早今晚慶祝!
本來想去食buffet, 之但係唔平, 唔多合乎經濟原則(呢輪洗多咗呀, 要慳d呀!!!) 結果去咗元朗泰屋食泰菜~~~
去到坐低無幾耐B仔就嘈要人抱佢行下, 唔抱佢就嘈, 於是搵嘢分散佢注意, 有得玩就係度笑, 仲笑得好開心呢~
之但係到開餐時, B仔超唔合作, 係都要人抱佢去行, 去睇車車, 嘢又唔食, 唔理佢就係度大叫, 好彩係坐室外, 好彩唔係去高級餐廳食咋~ 真係俾B仔激C啦~~~ 呢晚之後, 同B仔出街食飯都要考慮下去唔去呀! 無必要都咪搞啦~ 好樣衰呀! 
我地今晚叫咗.......
肉骨茶 (麻麻地~ 咸咗D~)
咖喱海鮮南瓜 (好好味呀! 又唔太辣, 啱晒我地, D汁沾印度薄餅一流呀!!!)
牛油薄餅 (正呀!)
蝦醬炒飯 (又係好正呀!)
馬拉箋通菜 (好香好好味! 呢碟菜都唔知有無半斤呀! 賺C佢啦~)
食飽飽就返婆婆屋企lu~~
27.4.2009
今日天后旦, 婆婆要去拜神兼食飯, B仔媽要放假湊仔呢~ 無聊又無地方好去, 唯有呆在家中玩~
眼瞓想瞓既B仔, 係床度碌黎碌去都未能入睡, 咁B仔媽又同佢影下相玩下先~
B仔, 你係度扮Model呀?! 之但係你個古靈精怪樣...................
越黎越瘋狂啦............
B仔: 睇住睇住, 我要運功呀! 唔好阻住我呀!
運完功就拉筋先~~ 要準備下一個"運動"
就係踩底個枕頭, 擒上床頭個櫃頂啦~~~
B仔: haha... 你睇, 成功咗! (個樣得戚到呢~~ 之但係公公婆婆見到實鬧爆B仔媽囉~~~~~)
又同B仔影証件相啦~ 嘩... COOL到佢呢~~~~~~~
轉個頭, 不到兩秒就..........................
影咗好多張至有一張成功呀!!!
早幾日B仔係婆婆屋企跑跑跑, 一嘢撞咗去個門度, 撞瘀咗之餘仲要損咗 =.="""
Hyper完一輪, 就坐定定學人上網check email呀! 幾有姿勢, 但無d實際! haha......
下晝, B仔媽期待已久既新電腦終於送咗黎啦~ B仔媽駁線, B仔就係度搞搞震無幫襯!
有新電腦用, 完全唔習慣, 部舊機一開機就"可可"聲, 非常嘈, 依家新機一d聲都無, 超靜, 成間房都靜晒, 唔多習慣呀! haha...... 仲有個mon, 闊咗好多呢~ 不過就靚咗好多呀! haha... 開心過後, 就是痛苦既開始, 遲下收到張月結單就金囉~ (又電腦, 又反斗城, 又牛仔褲... 大濟!!!)
26.4.2009
今日B仔爸要返工, 得B仔媽同B仔獨處~ 今朝一齊瞓到差不多11點(差不多七點時食咗支奶再瞓), 尋晚仲諗住同B仔今朝二人去食早餐, 點知大家瞓到咁晏~ haha.........
瞓醒食支奶, 玩下個新玩具先~~~
頑皮B仔係婆婆度又撞到, 係度跑跑跑, 撞咗去個門度, 瘀咗兼損咗 =.=
玩玩下做乜踎咗係度?! 哎吔......... 想痾屎呀! 咋咋臨抬B仔去踎馬筒先~ B仔教極叫佢開大要去廁所都仲未識 =.=""""""""
辦完大事就去街~ 落毛毛雨, 只能抱住B仔出街(無推車仔, 去街巿唔掂呀) 去咗火車站個頭食嘢, 係唐記買咗個菜肉包俾B仔食, 之後去大百佳買餸, 跟住就回家!
好頭痕呀! B仔呢輪唔肯食嘢呀! 奶又食得個100ml左右, 粥又唔多肯食, 飯又係唔多食, 水果又唔肯食, 今晚煮咗蕃茄薯仔肉碎通粉又唔肯食, 真係餵到B仔媽火都黎埋呀! 只係鍾意飲湯, 食包包, 多多包包都同你食晒佢 =.=""""
結果, B仔媽要出動包包, 至能叫做順利咁餵咗半湯碗通粉咋~ 真係人都癲呀! 乜都唔食, 淨係肯食包, 又驚B仔唔夠營養, 叫B仔媽點算好呀?!
25.4.2009
落好大雨呢~ 邊度都唔洗去囉~~ 係樓下飲完茶, 之後唯有返屋企坐, 睇電視, 玩玩具~
跟住黎個午睡~ 一瞓醒, 就扭計, 都唔明, 瞓醒咪瞓醒, 點解硬係要扭下計喊下 =.="""
邊扭計邊伸懶腰
瞓醒覺, 無落雨, 一家三口去買餸~ 買完餸返屋企, B仔媽忙住整餸, 叫B仔爸同B仔沖涼, 叫咗好多次佢至肯同佢沖, 之但係......
唉.......................... B仔手多多, B仔爸又唔睇實佢, B仔自己拉起水喉個制, 花灑d凍水就咁射到佢, 嚇到佢喪喊, 忙碌既B仔媽放低手頭上既餸, 走去睇下咩事, 唉...... 搞到B仔唔肯沖涼呀~~ B仔媽同B仔要係度角力咗一輪, 搵咗個玩具至分散到B仔, 至可回復平靜地沖涼呀~
是日晚餐......
蕃茄薯仔粟米豬骨湯
泰式豬頸肉 (用咗新玩意~ 光波爐黎整, 一滴油都無落, 仲迫晒d油出黎, 效果都唔錯~ B仔爸就嫌沾個d汁酸咗d, 但B仔媽覺得都OK喎~
蒸水蛋 (special for B仔)
蒜蓉牛油焗帶子 (急凍帶子唔知係咪雪得太耐, 唔多掂~)
馬拉箋炒通菜 (掂呀~ 係街巿印尼鋪頭買咗磚馬拉箋, 用咗少少已經夠晒味, 好香呢~ 下次加少少辣椒應該仲野味)
其實今晚本來想用光波爐整炸乳鴨, 之但係街巿凍肉鋪45蚊兩隻, 仲要係未醃既乳鴨, 絕對唔多抵買呀! 咁既價錢買現醒食得都得啦~ (買隻雞都係廿幾蚊咋~)
22.4.2009
今朝請咗假, 地鐵遊呀~ 話說B仔媽今朝晨咁早六點起床, 六點三就出門口 (早過返工呀), 出發去鰂魚涌(鄉下B仔媽未去過鰂魚涌呢~), 山長水遠去做乜?! 咪去做北角政府合署做電腦測試囉~ (晴晴媽, Keep secret呀~~ 唔好爆俾任何一個"大家庭"成員知呀~)
今朝搭東鐵, 九龍塘轉觀塘線, 跟住係油塘再轉將軍澳線去鰂魚涌, 未到11點就test完, 再由鰂魚涌站坐上環線係金鐘轉荃灣線往尖沙咀, 嘩... 今日真係地鐵遊呀~ 爭香港線同西鐵無搭咋~
未夠鐘返工(攞咗半日假), 適逄今日玩具反斗城第一日開倉, B仔媽又無嘢好做, 走咗去行一趟, 咁就出事啦............................
見到個Car seat, 原價1599, 家陣699, 買滿600仲有100蚊減, 即599, 抵呀! 之但係無得送貨, 以B仔媽一人之力, 抬唔到返公司呢~ 好彩, 有得買咗放低件貨, 放工至叫埋B仔爸黎攞~ Haha.....
去到唔止買咗個car seat, 仲買咗個畫板...
話原價700幾蚊(唔知B仔媽有無眼花睇錯), 家陣100蚊(大size 20寸), 見咁多人圍住, 咪加入睇下有乜so囉~ 丫... 睇完個哥哥仔示範, 又幾有趣喎, 用水溶性筆畫, 畫完d筆踪係有得閃燈, 用紙巾就咁抺就抺得甩, 100蚊, 買塊神奇畫板都要七十幾蚊啦~ B媽唔執輸, 咋咋臨攞返塊先啦~ 大size個款好快就俾人搶晒, 得返細size(14寸), 細都70蚊呀~
搶完塊畫板, 繼續四圍搵好嘢~ 睇下有乜啱B仔玩, 想買部搖控車, 但都過二百, 唔抵~
最後買咗呢d玩具俾B仔! 有Thomas彈珠台(30蚊), 一盒車車玩具, 有埋車軌(120蚊), 米奇釣魚玩具(50蚊)同埋泥膠玩具(30蚊)
盒釣魚玩具就唔多抵, 之但係B仔媽細個時都有個(當然係好普通, 唔係米奇黎啦~) 好想買返個俾B仔, haha...
加埋幫同事買個兩塊畫板, 剛好千二蚊, total減咗大拿拿二百蚊呀! B仔媽買咁多嘢, 埋單都係八百蚊搞掂~ Yeah!!! B仔媽好耐好耐無未試過買嘢買得咁開心咁暢快啦~ (可能最近返工不是太開心吧, 有點兒放肆添~)
放工咋咋臨同B仔爸去攞戰利品就回歸, 食埋飯返到屋企仲同B仔爸係度玩釣魚, haha...... 係自己老啦~ 還是個玩具轉得快呢~ 釣到B仔媽暈暈地, haha......
13.4.2009
話咁快就放完個復活節假, 今朝瞓醒返去同婆婆太婆飲茶, 依家B仔一到酒樓就嘈住要食架啦~ 一有嘢食就會乖返, 尤其鍾意食包包呢~
飲完茶就係商場度同隻復活蛋影返張相, 應下節先~
跟住就返婆婆度, 係樓下影咗一打証件相, 用黎報playgroup同埋遲下報學校用~ 大拿拿30蚊一打, 算啦~ 誰叫B仔媽成個假期都唔得閒同B仔自己影咩~ B仔非常不合作, 好不容易至影到呢~ (相片記得就後補返啦~)
影完相, 婆婆俾包包B仔食, 邊食邊拖住婆婆返婆婆家, B仔爸同B仔媽就北上享樂一番~ haha... 好好好耐無去行街揼骨食嘢啦~ 去咗華強北個外貿批發, 都唔平, 一對大人crocs賣百二至百四蚊, 仲要佢話係正貨, 搵你信囉~ 仲要走時落大雨, 又無帶遮, 頗狼狽呢~
食埋晚飯就返屋企~ 就係咁就過咗個復活節!
