參觀幼稚園

28.2.2009

今朝要返工, 無無聊聊, 好不容易至捱過三粒鐘放工! 放工同B仔爸同婆婆飲茶, 之後去咗婆婆樓下間幼稚園, 睇下學校環境, 都算幾乾淨, 難得係正婆婆樓下近近地而又有N1, 又有得返半日, 價錢都算OK, 想俾B仔返下學, 學下紀律, 等佢唔好咁曳呢~~

B仔入到學校好開心, 見到入口處掛滿一條條同學仔d傑作, 想去扯佢呢~~ 之後見到學校入面咁多車仔, B仔想擒入去玩呢! haha... 果然係一名活躍份子呀!

睇完學校就返屋企, 趁B仔爸同B仔午睡, B仔媽就咋咋臨去買餸! 煲木瓜雪耳湯, 蒸咗條魚(一出街巿門口又唔記得條魚叫乜名), 烚翡翠螺(終於記得烚啦~), 仲有炒菜心!

B仔媽忙於煮餸, B仔爸就負責餵B仔飲靚湯, 飲咗大半湯碗嘅湯呀! B仔係一名好鍾意飲湯嘅小朋友呢~~ 所以B仔返屋企個晚, B仔媽一定會煮飯煲湯!

呢兩仔爺幾一致, 果然有B仔爸嘅電視精基因遺傳呀!

食飽飽, 輪到B仔媽同B仔嘅玩樂兼影相時間啦~~

嘩... 做乜嘟到個豬咀咁長呀~~ haha.......................

又黎打劫B仔媽間屋啦~~ (掟到四圍都係玩具 =.=""")

B仔一想瞓覺, 對雙眼皮至出現, haha...... 似B仔媽呀!

嘩...... 個條口水粗過韓國粉絲呀~ (唔係出牙, 係生飛滋呀 >.<)

唔知點解, B仔咁細已成日生飛滋, 同埋大便不太暢順, 頗硬, 令到B仔媽好頭痕呀!!! 已經無俾餅仔B仔食架啦~ 包包都少食咗啦~ 婆婆差不多日日俾橙汁飲, 又成日飲湯, 間中又煲竹蔗水, 開奶茶同粥水開奶, 熱底熱成咁?! 真係唔明解呀! 係咪應該帶B仔去睇下大夫調理一下呢?!

B仔, 你諗乜嘢諗得咁入神呀?! (查實B仔好肉酸地用手抺口水 =.=)

天氣唔好, B仔成身笠黐黐, 臨瞓前又沖多次涼, haha... 依家都未到夏天, 到夏天都唔知點算囉~

沖完涼就係B仔媽張床度玩, 一見B仔媽上網, 就會係床邊呢個私家電腦位坐定定...... B仔當然唔會咁乖只係坐定定, 呢個時候最忙係佢隻手呀~~ Haha...... 學人打字呀!

搞搞下又搞B仔爸部PSP, 唔識開, 隊黎俾B仔媽開, 當然唔會開俾B仔玩啦~ haha......