一篤又一篤

21.3.2009

今朝又要晨早起床去返學, 之但係...... B仔起身已一篤, 到臨出門口又黎多一篤, 本來諗住行路去返學, 結果都係飛的去返學!

B仔尋日就已經痾咗幾次啦~ 今朝又痾咗兩次, 一聽到"呠"一聲就知又黎料 =.=""" 本來諗住返完學湊佢出去佐敦睇醫生, 但得B仔媽一手湊B仔出去又有點兒麻煩, 同埋痾次數唔密, 又唔係痾水, 還是決定觀察多一日!

放咗學, 食埋早餐, 買埋餸就返屋企! 下晝珊契媽上咗黎同B仔玩, B仔媽趁珊契媽未到, B仔又熟睡中既時間, 整個朱古力慕斯蛋糕送俾珊契媽既遲來既生日禮物!

夜晚同珊契媽食埋飯就各自回歸! B仔九點就瞓咗, 但瞓到半夜十二點半, 無啦啦自己爬起身坐係度望住B仔媽, B仔媽咪抱下B仔, 發覺, e~ 點解個頭同埋手腳都咁慶既?! 探一探熱, 嘩...... 發燒, 燒到101度, 咋咋臨貼退熱貼同埋幫B仔抺身, 試下睇下會唔會降返溫, 觀察咗一陣就降返100.5度, 觀察到兩點B仔媽至安心眠一眠, 校定鬧鐘, 三點半鬧鐘響, e~ 點解咁臭?! 一望, 原來B仔又黎一篤, 探一探熱, 嘩... 嚇c B仔媽囉~ 102.5度, 咋咋臨搞清潔, 邊搞清潔B仔就邊喪喊, 唉... 睇見B仔個喊樣搞, 又唔知佢邊度唔舒服, B仔媽內心都好痛呢~ 

清潔完跟手餵退燒藥, 依家真係要格梗黎至餵到食藥, 食咗藥同B仔係廳度一邊食方包, 一邊開B仔至愛個套DVD一齊睇, 真係第一次凌晨四點幾兩母子係度刨電視呀! 食咗一塊半方包, 量一量體溫, 降返到100.2度, B仔媽就安心返d~ B仔又係B仔爸返工既晚上黎料,真係嚇c B仔媽!

到朝早六點扎醒量一量, 退咗燒, 真係安心晒~ B仔瞓到九點幾就起床, 成晚好似無瞓過既B仔媽真係唔想郁, 超想繼續瞓, 無奈B仔已經瞓飽咗係度搞搞震! 好囉~~ 識搞搞震B仔媽就安心好多好多啦~

B仔瞓醒, B仔媽唔想醒住無奈都要陪太子玩, 拎部相機要B仔貼埋牆, B仔媽同佢影証件相, 當然B仔唔會咁合作企定定俾B仔媽影啦~ 真係想影一張正經既証件相都難難難呀! 仲要表情多多, 古靈精怪呀!

跟住想唔離開張床都唔得, 因為又黎一篤細篤 =.=""" B仔媽發覺B仔食完奶個餐之後就會黎一篤, 尋日全個下午都無一篤, 因為下午食兩餐粥!

午睡時間, 見B仔午睡, B仔媽都頂唔住與B仔同睡, Haha... 真係要叉叉電至得, 頂唔住~ 坐係度眼都挈唔大咁濟呀! 之但係B仔瞓咗個零鐘就瞓醒~ 好過無咁啦~ 傍晚時份就返婆婆家!

B仔, 你要快d痾清d菌呀~ 唔好嚇B仔媽啦~ 乖仔啦~

 

Chocolate Mousse Cake (Special for 珊契媽)

21.3.2009

B仔珊契媽既Bday雖然過咗~ 但B仔媽諗爆頭都唔知買咩禮物俾珊契媽, 所以B仔媽遲遲都未約珊契媽, 咁啱今日大家都得閒, 珊契媽黎咗同契仔玩, haha..... 於是...... 一於整個cake送俾珊契媽!

側邊睇, 唔多靚 =.=""""""

咁樣睇, 靚d啦~~ hehe...

B仔媽既唧花技術真係有待進步呀~ Haha......

唔知好唔好味呢?! 都好耐未整過餅啦~~ 希望無退步, 食得落肚, 無肚痛啦! haha......

買餸唔平

16.3.2009

家陣買餸真係唔平呀~ 放工去咗大百佳買餸都買咗五十幾蚊呀~~

今晚整咗肉鬆魚香茄子 (茄子煮得唔夠林添~ 用咗淘大個隻魚香茄子醬, 無乜魚香味, 但味道都可以)

翠肉瓜炒牛肉 (本來想加埋云耳, 點知唔記得浸)

呢輪返工返到好沒趣呢~~~~

有進步

14.3.2009

今朝晨早八點半就要起床, 係咪叫B仔起身, 之但係叫極都唔願起身, 好不容易至叫醒B仔去返學!

今日B仔媽同B仔爸一齊帶B仔去上堂, 可能第二次去加上由B仔媽帶, 比第一次上堂時乖, 姑娘同其他家長都讚B仔乖咗好多呢~ 怕且係B仔蝦婆婆啦~ 不過其中一個活動係坐係個板車上面, B仔媽用繩拉B仔行, B仔有得坐時常開心, 但其他小朋友玩緊, 佢又想玩就發爛咋! 呢一小時既活動, B仔媽覺得好勞動呀! 陪玩到出汗呀!

放學一家三口去食早餐, 之後閒逛, 然後買餸回家! 係街巿又咁啱撞到嫲嫲, 嫲嫲一叫B仔, 又喊到一發不可收恰呀!

趁B仔午睡, B仔媽整咗雞蛋糕, 等B仔瞓醒當小食!

第一盤剛焗起~

第二盤剛焗起~

晩上, 食飽飯, B仔係度玩Yoga呀?!

臨瞓前, 嘆返支奶奶先~~ 嘆奶之餘仲要腳多多

人生第一個"肥佬"

13.3.2009

又到歲半返健康院發展檢查既日子~~ B仔媽今朝嘈咗好耐, 至嘈得醒爛瞓既B仔, 嘈醒咗佢當然係度喪喊啦, 又要搵d嘢黎誘惑佢至收聲! 因為今朝約咗9點半去健康院, B仔爸今朝至放工, 唯有自己帶B仔出發, 係健康院會合!

嘩... 入到健康院, 超多人呀~~ 好多細BB, 亦好多國內人, 起碼一半以上都係國內人呢~~ 人又多, 又驚多菌, 登記完都係坐係大堂等叫名好過囉~~

等咗好耐至叫名去磅重, 入到去, 身旁兩個細BB女都係肥B, 光嘟嘟, 成個米芝蓮咁, 好得意呀! B仔10.17KG.

磅完重, 等咗幾個字就入去見姑娘, 嘩... B仔媽抱住B仔一入房呢到呢個四眼東菇頭黑口黑面唧都唔識笑既姑娘, 內心都一沉呀, 心諗: 乜呢個姑娘咁既?! (因為之前見親既姑娘都好nice, 好好笑容架~)

一坐底, 黑面神姑娘就拎咗4粒丁屎咁細粒既方型積木俾B仔玩, 等佢叠高佢, 點知B仔叠極都係得兩層, 叠到第三層又唔放手, 跟手仲要一嘢整冧晒d積木, 呢個動作B仔不斷重覆又重覆...... =.=""""

又係例排問邊個湊, 邊個同佢玩, 一日食幾餐, B仔媽答兩餐奶兩餐粥夜晚跟我地食一餐飯, 跟住就問食幾多奶? 240至280ml, 又問食幾多飯?! 3分1飯碗至半碗, 跟住姑娘就話啦~ B仔要減奶, 食150ml好啦~ 要增加五穀類, 跟手拎埋個營養金字塔俾我地睇! 又話3分1飯碗飯唔夠, 起碼食半碗食, 要有菜有肉有生果...... 我心諗, 你唔問下B仔食幾大碗粥, 一餐粥起碼大半湯碗呀!

又問屋企有咩玩具, 我又心諗, 咁多, 點數呀?! 咪隨口講幾樣, 跟住就問有無玩煮飯仔, 問佢切水果個d算唔算呀?! 佢就話都算, 又話玩呢d虛疑遊戲可以學到好多嘢! 又問B仔識唔識指嘢示意佢想要既嘢?! 識. 識行未?! (可能佢見我抱住佢入房) 識. 有無同B仔玩碌/傳波? 有. 識唔識你傳我我傳你? B仔爸就答唔識, 只會向後拋. 

識講d乜?! 爸爸, 媽咪, 車, ...... B仔媽係度數數數.... 姑娘就問, 呢d係佢自己有意識地講? B仔媽唔明, 咪話即係點呀?! 即係佢見到個樣嘢係乜識自己講, 而唔係你講完佢跟你講, 個d唔算! =.=""" 又問識唔識叫爸爸媽咪?! 識講, 唔係對住我地叫. 姑娘就話, 咁即係唔係有意識地講啦! B仔媽就話唔係, 佢睇相識自己指住話呢個係邊爸爸/媽咪.

識唔識指眼耳口鼻? 識, 但睇佢心情. 咁心情好時佢識指邊度? 鼻, 耳, 腳... B仔媽都未講完, B仔竟然自己指鼻, 耳同腳! 呢關尚算合格! 全程個姑娘都無笑過! Cool爆~~ 結果, B仔本手冊仔出現咗個"F", 人生第一個"肥佬", 要兩歲返健康院檢查.

之後去咗食嘢, 跟住出佐敦同B仔爸個朋友飲茶, 跟住就去陳醫生度打針! 去到好多小朋友係度, 有個剛探完熱, 燒到104度, 咋咋臨叫B仔爸帶B仔出去門口玩, 好驚佢"lai"嘢~ 當然B仔唔肯出啦~ 因為要坐車仔, 臨到佢至俾佢入去, 有得坐車仔就開心晒~

今云一入醫生房就開始喊, 因為無得坐車仔, 醫生做檢查都仲係喪喊, 反抗磅唔到重, 好彩今朝已經磅過~~ 檢查完就打針, 嘩... 篤落去個嘢無喊, feel到d藥時就喪喊, 到支針都抆咗出黎都仲係喪喊, 於是B仔爸即帶佢出房坐車車, 即收聲!

打完針就上咗去探嫲嫲一陣,  又係一見到嫲嫲就喪喊, 大大滴眼淚~ 直至見到嫲嫲缸金魚就無喊~ 坐咗一陣就返屋企. 驚險既事就發生......

當我地駕車過咗大埔, 當時落緊微雨, B仔瞓到豬咁, B仔媽就閉目養神, 突然B仔爸扭呔, B仔媽攬實B仔, 另一手撐住前面Seat位, 挈大眼一望, 嘩... 真係嚇C呀! 眼見前面幾部車炒埋一齊(係快線), 慢線又有好似兩部車炒埋, 得返中間線一條剛好夠一部車過既位, B仔爸扭呔係呢條"la"閃過, 好彩當時我地車速唔快咋~ 如果唔係, 又炒埋一碟架啦~ 又好彩中間線後面個部車又係收慢咗, 如果佢車速快, 就炒埋黎架啦~ 仲要炒落我個邊車身添呀~ 真係好險好險呀! 閃過之後B仔爸即問B仔媽同B仔有無嘢! B仔仍熟睡中, 都唔知發生乜事, B仔爸就驚雲未定呢~

返到去去咗街巿買餸, 是間晩餐有......

清炒菠菜, 炒蛋 (唔落油炒, Special for B仔)

蕃茄豆腐滾大眼雞湯

煎金沙骨 (買現醒醃好, 煎好再加肉汁煮, 好味, 唔出聲差d俾B仔爸食晒, B仔媽要餵B仔食飯麻~)

張B仔18個月大啦~

10.3.2009

B仔歲半啦~~ 之但係仲未識得講嘢 =.="""

識得講既只有: 媽咪, Ba Ba(爸爸), wow wow(狗), 鴨鴨, 車車, 飛機(但發唔正個音), 鼻, bye bye, BB, 鞋, 踢, 拍, 曳曳, mum mum, 唔知呀, 無呀, 襪襪, 波波, 魚魚, 錫

重10.17kg, 高約83cm, 頭圍約50cm

係婆婆度成日"kit" BaBa同媽咪結婚相黎睇, 成日指住BaBa叫BaBa, 之但係唔會指住媽咪叫媽咪, 怕且媽咪無戴眼鏡化咗妝唔認得 =.="""""

拎住飛機玩識得舉高飛機扮係天空飛, 仲要配埋音, "we we"咁飛

車痴一名, 勁鐘意坐飛車同推車 (佢個部玩具車), 係街見親車都指住叫車車, 好唔得閒呢~ 係屋企有時又會望落樓下睇巴士

做錯事, 媽咪碌大隻眼望住B仔會知衰, 停晒手腳唔郁, 當然幾秒後就若無期事走去玩玩具, 扮無事發生, 一係對住媽咪點蟲蟲, 扮晒傻

歲半開始帶B仔返playgroup

乜都肯食, 但第一次食既食物會食到那埋口面

唔多願自己拎住d食物食, 除咗包包, 幾時至會好似洛洛哥哥咁拎住隻鵝脾係度食呢?!

開始學習拎匙自己餵食, 當然搞搞震多啦~ 叫B仔俾BaBa/媽咪"um", 會配埋音餵我地食

去完街返到屋企叫B仔除襪, 自己識得除, 之但係除完四圍掉

好鍾意睇小小愛因斯坦, 媽咪一拎出黎話俾B仔睇, 就會乖乖坐定定係私家凳/sofa睇, 直至睇完至開始搞搞震

B仔雖然曳, 但都叫做聽話既~ 放B仔係大床, 同佢講媽咪要做d乜做d物, 轉頭至入黎, 佢就乖乖係度培養感情瞓覺, 唔會搞搞震, 唔會爬黎爬去, 有時叫佢放返好d玩具, 識得放返入箱, 當然睇佢心情啦~

未敢自己由媽咪張大床滑落地, 滑一半, 半天吊咁, 跟住就大叫求救, 好搞笑, 但係婆婆度佢又滑得好輕盈架喎! 婆婆張床都唔見得矮丫~~

成日擒凳, 擒sofa, 總之佢擒到既都會擒

好輕易咁由自己張床仔跨欄過大床, 但個床欄要校低一格至跨得過, 校至高個格未夠高同未夠力, 腳能夠long上欄頂, 過唔到又係度發爛咋~

返到屋企勁鍾意黐住媽咪, 唔黐BaBa, 搞到媽咪想沖涼都難難難!

識指鼻, 耳, 眼, 腳

叫B仔錫錫, 會用手細細力摸人面一下, 邊摸邊講鍚鍚

B仔爸炒飯

10.3.2009

呢輪好想飲青紅蘿蔔湯, 尋日的起心肝去買定煲湯料, 今朝早d起身煲定湯! 放工返到屋企就飲得~~ yeah!

是間晚餐

青紅蘿蔔蠔士豬展湯 (可能係焗咗成日既關係, 都好好味喎~ 好似明火煲咁! good 呀! 但就迫晒d油份出黎)

香蔥煎豬扒 (醃咗一日一夜, 鹹咗d添~~)

登登登登~~ B仔爸炒飯! (有芝士腸, 火腿丸, 蛋同蔥花, 每逢炒飯都係B仔爸負責炒, 因為B仔媽無B仔爸炒得咁叻呢~~)

椰汁馬豆糕

10.3.2009

椰汁馬豆糕, 記得細個時媽咪有整俾我地幾姐弟妹食架~ 大肚時唔知撩起邊條筋, 突然好想食, 但係大姨媽話大肚唔食得, 所以無食, 閣置到尋晚~~ 尋晚又係無無聊聊係屋企無嘢做, 放工去咗超巿買嘢, 見到有馬豆買, 於是買材料, 整椰汁馬豆糕!

邊煮邊聞到好香呀~ 煮好, 入模~~ haha... 又用焗蛋糕d模黎整!

今晚終於食得~~ yeah!!!

賣相都唔錯!

d馬豆好似梗咗dd~~ 甜度剛剛好, 唔太甜, 都幾香!

B仔爸就話椰汁味唔夠香, 梗係啦, 一嘢塞成個入口食, 咩味都搭唔真啦~~~~~~~~~~  >.<

嘆維他仔仔

8.3.2009

今日瞓醒落街食埋午飯就返婆婆度! 食飯時B仔好曳呀! 係度扭計, 搞搞震呀! 對面枱個食客都望咗B仔幾云, 真係尷尬, 之但係B仔都唔算係大叫大喊好嘈遮, 個位洗唔洗望咁多云呀!

返到婆婆度玩咗一陣, B仔媽就約咗火星太去Physical跳舞, 跳咗半粒鐘已頂唔順, haha... 真係老啦~~

跳完就返婆婆度食飯! 俾咗盒維他仔仔俾B仔慢慢嘆, haha......

飲到個樣咁醜怪呀~

古靈精怪~

B仔: e~~ 咁快飲晒既?!

B仔: 哦~~ 原來係俾B仔媽吮咗兩啖已經無咗大半!

B仔媽: B仔, 媽咪驚你飲得多肚痾呀!

第一次上Playgroup

7.3.2009

今朝B仔媽要返工, 婆婆尋晚係度過夜, 因為今朝B仔晨早9點半要去上第一堂Playgroup呀~

B仔爸放工返到黎就去咗接B仔同婆婆放學, 婆婆話B仔上堂上一個鐘, 喊就喊咗8個字 =.="""""""

唉... 人地要佢坐係地墊度排排坐, B仔就唔肯, 要走人, 見到車車又要走去坐, 但人地又唔係玩車, 唔俾佢做想做既嘢就喪喊 =.="""""

不過, 老師同婆婆講, 初初返係咁, 上多兩三堂會好D架啦~~ 希望啦! 一班6位小朋友上堂, B仔最細, 其他都2歲至2歲半架啦! 個個都聽話上堂, 係B仔係度喪喊! 下個星期六輪到B仔媽帶B仔上堂啦, 唉... 真係有d怕怕呀! B仔婆婆仲叫B仔媽到時唔好當咁多人面前鬧B仔=.=""

可能晨早起床, 11點幾就瞓, B仔媽放工買埋餸返屋企都未瞓醒, haha...... 瞓醒覺就玩, 又係搞到間屋好似俾人打劫黎咁!

玩玩下又同B仔爸係sofa睇電視, 睇到幾入神~

發現B仔媽影相添~~

B仔條疤無咁凸啦~ 但就仲係紅紅地, 好彩有眉毛生返! 不過都仲係好稀疏!

依家d天氣真難搞, 着得衫少又驚凍親, 着得多又出汗, B仔有陣"縮"味, 夜晚都冒險同佢沖多次涼~

今晚又扭計扭玩至11點幾至肯瞓, 吮兩吮個奶咀就瞓到豬的一樣, HAHA....... 好BB樣呀~ 同細細個時個瞓覺樣一樣架~

炒丁丁晚餐

4.3.2009

放工去街巿買餸, 點解d西蘭花價錢可以差一半既?! 有檔12蚊一斤, 另一檔6蚊一斤, 個樣好似差不多... 真係唔明解喎!

今晚煮咗蒜蓉西蘭花同埋炒丁丁, 炒丁丁就多料囉~~ 有甘荀粒、西芹粒、芝士腸粒、腰果、雞腎、火腿丸! haha......

第一次炸腰果, 失敗咗添~~ 變咗非洲腰果! haha......

芒果小蛋糕

3.3.2009

放工無嘢做, 見同事話整芒果小蛋糕兼俾埋個食譜B仔媽, B仔媽無無聊聊又手痕, 又黎焗小蛋糕! Haha......

第一盤焗製中~~

第二盤準備拎去焗~~

個食普話要芒果茸, 但懶惰既B仔媽唔想洗多一個攪拌機, 於是將一粒粒既芒果肉溝埋落粉漿度~ 焗完出黎賣相唔多靚啊~~ 同埋可能用芒果茸整會香d~

品味蛋糕仔: 唔太甜, 成粒放入口o趙, 芒果汁混埋d蛋糕食, 味道都唔錯喎~~ haha...... 明晚要問下B仔爸既食後感先得!

 

雜錦上海年糕 + 木糠布甸

2.3.2009

哎吔......... 真係黑仔呀! 尋日自己湊B仔返婆婆度時跌咗張八達通呀! (夜晚返歸至發覺) 辛辛苦苦儲落個廿幾蚊日日賞怕且都無晒啦~ 仲有站站賞, 幾十蚊車費又無晒, 仲要無埋個50蚊按金, 跟住又要申請返張八達通(我個張係個人八達通黎架), 又按金又手續費, 呢獲好傷呀!  好彩無自動增值, 如果唔係仲大濟!!!

今晚B仔爸有事要辦, 好夜至返, B仔媽要食自己啦~ 放工無嘢做, 走咗去大百佳買餸, 是日晚餐係..........

雜錦上海年糕 (材料都幾豐富下: 有芝士腸、金菇、云耳絲、蛋絲、甘筍絲、白菜仔同埋上海年糕)

味道都唔錯, 但咸咗d~ B仔爸返黎時, B仔媽又炒咗碟俾B仔爸宵夜, haha......

B仔媽食飽又無所事事, 手痕整咗木糠布甸! 但要雪, 唯有留待明晚慢慢嘆~~