爺爺牛一飯聚

8.11.2008

今朝B仔爸有事要辦, 所以得B仔媽同B仔玩, B仔瞓醒又通屋行! 家陣好搞笑呀~~ 一問B仔, 邊度有巴士呀?! 佢就會走入細房個窗邊望落下有無巴士! Haha... 好得意呢!

B仔爸買咗部搖控車俾B仔玩, 又係咁轉車轆! 但當B仔發現禁個搖控部車會郁時, 好快就識自己禁!

煲咗菜心瘦肉粥! 今日試下俾B仔自己拎匙羹自己食, 當然佢仲未控制到, 但都肯去試.......

一"畢"起時個咀識得挈大口配合!

食飽飽, 心思思想去沙田行街, 但又懶懶地, 正想出門口買餸, 點知.......... B仔爸打返黎話嫲嫲打黎話爺爺生日今晚食飯............ =.=""""" 佢唔今晚至打黎話開飯?! 鑊鑊都係咁, 個個真係坐係屋企等佢開飯咩~~ 真係唔急屎唔開坑呀! 好討厭呀! 仲要連續三個禮拜都見, 更加討厭呀!!!!!!!!!

同B仔爸反映(急屎至黎開坑)問題, 佢就話佢屋企人不嬲都係咁, 佢唔覺有問題!!! 激C!!!

到夜晚, 我地去一去街巿買南瓜俾B仔第二日煲粥仔食, 點知係街巿門口都會撞到二伯娘一家同嫲嫲! 到買完嘢我地自己行去酒樓, 一落商場又撞到佢地, 有無搞錯呀! 係咪咁有"緣份"呀! 嫲嫲知我地買南瓜, 又問買咗咩南瓜, 又關佢事嘅?!?!?!

去到酒樓B仔爸坐係嫲嫲隔離, B仔就跟住坐B仔爸隔離, 但一抱佢坐BB凳時, 嘩... B仔登到兩條腿直一直, 係都唔肯坐, 隻眼就"骨"住嫲嫲個邊 =.=""" 好啦, 坐開一個位啦, 依然唔肯, 要坐開四個位至肯擺休呀!!! 嘩... 真係第一次咁黎反抗呀!!!

食完飯就返屋企！