靠自己的第一個獎 - 天才搖滾之星大獎

19.10.2008

早幾個星期前同B仔參加咗一田舉辦嘅 "我們的YAYA主角招募" 活動, 上星期六面試, 星期一二都未有回覆以為落選咗, 點知星期三晚收到電話, 話入咗圍, 星期日就進行比賽, 分兩Part, 第一Part Fashion show, 第二Part Helloween造型比賽.

今朝11點要到達會場, B仔瞓到九點零就起身, 食粥, 沖涼, 執下出街用品, 搞到11點4至到達!

去到就換大會指定嘅衫, 換好衫B仔當然唔肯坐定定, 要四圍行...

B仔, 你個造型好搞笑下喎~~ 戴咗頂帽成條虫咁呀~~ 又似小偷咁~~ Haha......

B仔想搣甩人地朵花呀~~

等到12點幾終於開始彩排, 其實無乜特別, B仔係眾多參賽者最細個個, 行又未行得好好, 成日行去個Backdrop個熊貓度拍個熊貓, 一係爬黎爬去, 一係係度玩玩具同奶樽, 係咁拍奶樽落地, 一係掟完又執再掟, 自己笑到卡卡聲~~

彩排完就中場休息放食飯, B仔爸同B仔媽終於有啖好食啦~~ B仔又扭眼瞓, 但B仔媽又唔記拎埋奶咀出街, 俾支奶佢食諗住佢食食下會瞓, 但食完都仲係要搵奶咀, 搞到要買隻新奶咀, 去BB餐廳度洗乾淨再用熱水淥下佢, B仔啜咗唔夠2mins就瞓到豬的一樣~~

食飽飽就去玩具反斗城買helloween造型, 上次試時都話買南瓜look架啦, B仔爸又話唔好, 但今次揀無可揀, 咪試下囉, 試完B仔爸讚好, 又確實好得意啊~~

瞓到豬的一樣嘅南瓜小寶寶呀~~

兩點鐘集合, 但B仔唔洗化妝SET頭, 所以可以2點8至集合, 咁B仔就可以瞓耐d~~ 叉足電至去比賽~~

等到3點幾至開始比賽第一Part, B仔確實唔識驚架~~ 出到場仲要企唔穩碌咗係度呀! B仔媽要扶返佢起身呢~~ Hehe.... 跟住就四圍行, 又行去拍個熊貓, 跟住又四圍爬, 又拎奶樽黎拍, 又拎黎掟, 又自己係度自得其樂, 笑到卡卡聲呢! 莫可欣做嘉賓, 又扶起B仔行, Haha.... 到完咗呢part小朋友們就影張大合照, 莫可欣仲抱住B仔影相添呀~~ 影完相又四圍行, 之但係B仔媽抱B仔走時, B仔唔肯離開個台呀, 喪喊呀!!! 因為無得玩丫麻~~

跟住返返去換衫房準備Helloween造型, B仔着咗件南瓜衫好搞笑呀!!! 最衰相機係B仔爸度, 無影到相添~~ 係房到行黎行去, 同另一BB玩個輕氣球狗仔, 兩個BB笑到卡卡聲好開心!

不過中途發生咗小意外呀, B仔俾個大哥哥推跌咗落地呀, 大字型攤咗係度, 嚇C B仔媽呀~~ B仔喪喊, 勁擔心, 咁撻法知有無事, 又唔肯收聲, 人地父母就係咁講唔好意思, 有乜計, 唔撻都撻咗係度, 大家都唔想 =.=""" 之後問個姐姐俾塊餅餅B仔食至收聲咋~~ 好彩食完餅餅就無事, 繼續hehe haha咁玩, B仔媽至安心返少少咋~~

係後台等上台前, B仔又勁扭計, 要落地, 要行去後台上台個個門口, 要上台玩呀!!! 知道個門口可以上台呀!!! 唔俾佢去咪勁扭計囉 =.="" B仔媽見到YAYA公仔企咗係度, 咪抱B仔去同佢玩囉, B仔至肯收聲呀! B仔仲係咁捉YAYA隻手, 係咁拍人地個頭! 不知幾開心呀! =.=""""""

到第二Part開始, 一個個helloween小魔怪走晒上台, haha... 好得意呀~~ 成個台都係媽媽同小朋友, B仔又係台上面行來行去, haha... 佢仲要係後面行, 因為前面俾d大哥哥姐姐企晒, B仔只能係台角或台後面部份活動咋~~ 不過B仔媽都聽到好多人話B仔得意呀! hehe..........

等結果期間, YAYA公仔就同d小朋友係台上面跳舞, 我就抱咗B仔落台, 驚佢跌係度俾人踩到就大濟! B仔當然又唔肯落台, 係度扭計啦! 但B仔媽都諗住B仔應該無獎架啦~~ 仲諗住聽完結果就即閃去換衫走人, 因為B仔同B仔媽都好攰好攰啦~~

點知... 司儀姐姐宣佈 "天才搖滾之星大獎" 得獎者係........ 張峻僑小朋友! 台下嘅B仔媽呆咗一呆, 有無聽錯?! 會唔會第二個同名同姓小朋友?! 跟住司儀姐姐又叫多一次 "6號張峻僑小朋友" B仔媽至肯定咁上台攞獎, Haha.... 莫可欣頒獎俾B仔呢~~ 當然B仔係唔知發生咩事啦! Haha..........

頒完獎就留晒d參賽小朋友係台度係咁影相, 唉... 我地部相機B仔爸錄Video錄到頒獎後就無電啦~~ B仔媽前一晚唔記得叉電呀! =.=""" 之後就無影到相啦~~ 真係勁勁勁可惜呀!!! 大會同Mike雜誌就係咁影, 唉........ 跟住臨走前問咗Mike雜誌個姐姐, 問佢可唔可以send B仔d相俾我, 個姐姐就好好話無問題, 但要下個禮拜至得, 希望佢記得啦~~ 我記得Mike個攝影師幫我同B仔影咗張相架!

搞到成5點幾至走得! B仔都已經勁攰勁扭計架啦~~ 俾餅餅食至唔扭! 辛苦B仔爸啦, 一袋二袋搬返屋企! haha....... 雖然今日大家都勁辛苦, 但都值得!

呢個就係B仔靠自己嬴到嘅獎品啦~~ B仔返咗婆婆度, 無得一齊影返張相留念添! 下個禮拜補返至得!!!

盒thomas好大盒呀! 好正呀! 不過B仔有排都未識玩!