第一次攝影面試

11.10.2008

今日去咗沙田行街同埋B仔去interview... 由於時間未到, 一家三口去咗宜家"運吉", B仔勁開心呢~~ 好似大解放咁, 自己係sofa區四圍行, 又試坐sofa!

仲試埋床~~ 瞓係度勁開心, 係咁踢腳, 仲唔捨得走添呀~~

之後去咗玩具反斗城"運吉"

着完件衫自己走咗去呀~~~~~~~~

去interview之前, 醫飽B仔個肚先~~ 去咗一田個BB餐廳度食BB餐, 叫咗個菠菜白飯魚粥餐...

等咗一陣, 終於有得食.................

之但係................. 好睇唔好食, 超為食既B仔食到那口那面, 好似好難受咁........................

食到呆呆濟濟, 還是唔好食啦~~ 結果個餐食咗一半就無要!

話說早一星期時, 收到一田Yaya club宣傳單張, 見有攝影比賽參加, 咪幫B仔報名, 星期四下晝B仔媽收到個電話, 話sat(即今日)有interview, 3點半去interview, 話如果入圍就會參加一個helloween catwalk show, B仔媽第一個反應係: 下, 係咪要識行至得架, 我個仔啱啱至叫做識行咋喎~~ 個姐姐就話: 哦... 咁又唔洗, 好多bb都未識行! 跟住B仔媽又問: 咁interview要in d乜架?! 個姐姐就話: 都係影幾張相遮~~ 睇下bb多唔多表情!

就係咁, 影相前同B仔去咗視察環境, 都好多BB排隊即場報名影相呢~~ 我地約咗時間就唔洗排, 等一等就有得影~~

影相時, B仔媽放咗B仔係個backdrop前, B仔懶型咁一手禁住塊板, 個樣Cool cool地咁, 好似唔知發生乜事咁, B仔媽係相機旁拎住佢至愛個部車仔引佢, B仔笑住咁行埋黎個相機度添呀~~ 唔知個攝影師哥哥有無影到B仔咁開心嘅表情呢?!

影完相, 有個姐姐就黎問B仔媽B仔身高幾多, 都無度真係唔知, 就問着幾碼衫, 幾號鞋! 問個姐姐幾時會知入唔入到圍, 佢就話最快monday應該會知!

之後B仔爸話B仔影緊相時, 企係佢隔離個女人係咁讚B仔企得好有型, 仲讚咗三次添~~ hehe... B仔爸講返俾B仔媽聽時, 表情係沾沾自喜咁架~~

跟住同B仔去咗地下個層飲奶, BB餵奶室爆棚呢~~ 飲飽就係個度玩, 個度有3個甲蟲嘅物體俾小朋友捐入去玩呢~~ B仔見個哥哥玩, 笑到卡卡聲呢~~ 行埋一田超巿就回家LU~~