影婚紗相 ^o^

今日上o左深圳繼續影埋餘下o既婚紗相，一大清早就起床(仲早過返工...)出發，不知是否影相個度忘記咗我地約今日影相，所以原先幫我化妝o既Lucy好忙，幫唔到我化妝，搵咗另一位junior d o既staff幫我化，幸好都化得唔差! 而攝影師David就要同另一pair輪住影，不過咁都好，係等待o既時候可以同張先生自已用digital影，haha......

今朝上到去就揀外影着o既婚紗，但款式唔多選擇，最後揀咗件金色o既衫，唔駛成日着婚紗咁普通! 化好妝就去錦繡中華影外影呢! 我覺得其實個度都好多中國特色可以影，如果着住件旗袍四圍影都幾靚 (不過影咗o既景就唔係好多)，可惜肥得濟，着唔到旗袍，幸好都揀到套近似旗袍o既衫，hehe...

不過全程最搞笑就係當另一pair影緊相o既時候，隨行o既一位攝錄師就幫我地拍movie，真係好搞笑，影我同張先生拖住手仔, 行黎行去，成日叫我地一路行一路傾下計，唔駛理佢，我地兩個都唔知講乜好，唯有係度講下d無聊嘢，haha...個攝錄師哥哥又叫我地坐係草地上猜梅，若我嬴咗就扭張先生耳仔(佢唔鍾意人地扭佢耳仔，hehe...終於可以名正言順而佢又無得選擇o既情況下俾我扭咗2次耳仔，hoho... ^o^)，若張先生嬴咗就可以鍚我一啖，haha..都幾好玩喎~~~~~

係朝早等安排時，張先生睇咗本相簿，全本相簿都係影印度風情，影得好靚，張先生因為鍾意印度王子件禮服，其實海灘相唔係好靚，所以我地決定唔影海灘相，轉影印度風情，雖然影出黎唔知係咩效果，唔知靚唔靚，但係個造型都幾得，張先生變印度王子都幾有型，haha...而我o既造型都唔差喎，都有幾分似印度西施，hoho......^o^

好緊張呢~~因為個度話一星期內會有相睇，希望可以係黎緊星期六有得睇啦! 唔知影得靚唔靚呢？唔知會唔會影到我塊面成個發水面飽咁呢?......

係深圳發現咗 '新大陸' 呀! 因為係行去火車站期間，見到有間婚紗攝影公司，櫥窗d晚裝好靚呀! 於是同張先生入去睇，睇下d款式同價錢，係個度影婚紗相都唔平，租衫都唔平得去邊，租一件成$1080，但d款真係唔錯，香港暫時未見到有，好過金馬倫道好多間婚紗鋪，有好多直身同a-ine款式, 心思思想係個度租呢~~ 真係好靚好grand架，但張先生嚴貴... =.=