深圳睇相記

尋日上咗深圳睇相，本來懷着一顆興奮嘅心情去睇相，可能希望越大，失望真係好大，覺得影得唔係好靚，麻麻地，尤其是外影個輯，真係唔係好靚，好在無去海灘轉咗影印度風情，整輯相影得最靚都係印度風情，其他就真係唔係好靚呢~~ 仲話係其中一位首席攝影師... =.= 可能係我同張先生要求高，眼角又高吧!

我諗佢地影咗二百幾張相，第一輪我地揀咗一百零九張，跟住篩選咗好幾次，由百零張減至九十幾張，再由九十幾張減到82張，揀到淨返九十幾張時，我覺得已刪無可刪，因為我覺得有d都唔差，可以唔落相簿，但可買相底自己晒，25蚊張都仲可接受(由29蚊講到25蚊)，但張先生又話我係又揀唔係34ert6321`wsxdcv65rdf6gtb 又揀，淨係睇自己個樣靚就要，唔睇成張相嘅意景，咁我覺得個d ok自然想要架啦，況且我都已經割愛咗十多張，都係俾22張相底錢遮...最後搞到我發晒脾氣，叫佢覺得邊d唔好自己刪晒佢，刪淨60張唔洗加錢買相，唔駛煩!

同時，另一邊廂因為水晶相架整細咗，俾多2張銀包相連相底，但銀包相對我地黎講真係無乜用，問個職員可唔可以唔要銀包相換兩張相放落相簿(因為張先生都唔用銀包嘅)，又打死都唔肯換，自己心情已經俾張先生搞到唔多好，咪同個職員講人地個plan又平過我，送d野又多我好多，我都算，人地唔借衫可以換多5張相，佢地又唔俾我地咁都算啦！

張先生又搭嘴話俾錢之前就乜都得，俾錢之後就乜都唔得，個時我已 經面黑黑，咪叫跟開個個主管甜甜黎傾，甜甜依舊個句，唔同時期有唔同優惠，我地過年個排又話係最多優惠，都係佢地講晒，初初都係因為想唔要銀包相換2張相底遮，佢地就以為我地想攞多d着數...最後甜甜就話送8張銀包相俾我地，但我地都已經話咗銀包相對我地黎講無用，最後佢話送本7寸相簿俾我地，張先生睇過個版就話無厘特別，話要銀包相就算，我就話無用，最後要咗本7寸相簿!

深圳始終係深圳，影完相又話一星期內會電話通知睇相，但等咗幾日都未有電話到，已經特登打電話上去約，約下晝又話安排唔到睇相，好啦唯有約夜晚，但去到又問返我地轉頭有無約到，話搵唔到我地預約嘅資料，之前約改期影相個日又係咁，又係遺忘咗我地張單，結果原本個化妝師幫唔到我化妝，都唔知d人點做野...

原本滿懷高興嘅心情去睇相，最後變成發脾氣收場(其實係發張先生脾氣)，可能係要求高眼角高，所以覺得d相影得麻麻地，都好嘅...唔駛用咁多錢買靚相，依家都係用500蚊買22張相底! 仲有多一本7寸相簿同埋多一個水晶相架!