家訪柏滔

29.5.2009

B仔媽今日請咗假, 一連放四日, 但B仔爸今日要返工, 所以得B仔媽兩母子度過~

11點幾蒸咗飯俾B仔食, 滾節瓜肉片湯, 又係用湯咋做餸, 不過加埋碎蛋, haha......

B仔, 你個樣做乜咁無奈咁呀?! 查實佢係好專心咁睇緊電視咋~ HAHA.......

食飽飽約咗柏滔媽食lunch~ 兩個小朋友係枱底互鍚, 又將個抺手紙既袋你俾我, 我俾你, 好搞笑~

之後就一齊去買餸, 然後就去咗柏滔屋企玩! 兩個小朋友仍然隔離飲香, 又係度爭玩具玩, 好彩B仔俾柏滔搶咗又無乜嘢! 又坐下車仔, B仔坐車, 柏滔就enjoy去推B仔, 好搞笑~~ haha......

之但係俾B仔發現咗柏滔盒小小愛因斯坦就不得了, 兩個小朋友又一齊搶!  今云B仔就唔讓步啦~ C都搶實盒DVD, 柏滔媽都怕咗佢呀, 咋咋臨開隻碟俾B仔睇呀! HAHA......

睇咗一陣碟兩個小朋友都有睡意, 於是我地就回歸! 柏滔屋企好多玩具呀! 得閒約埋柏軒一齊, 三個小朋友一齊去倒亂~ HAHA.......

--------------------------------------------------------------------------------

B仔媽最近又同B仔玩攝影比賽呀! 唔該幫幫手投B仔幾票丫! 每日最多投5票架~~ 感激感激!!!

http://www.baby-kingdom.com/customer/gsk/minisite/child_enlarge.php?pid=329

請幫幫手，投Ｂ仔幾票！謝謝！

Ｂ仔參加了「第2屆GSK 守護一生攝影比賽」，這是Ｂ仔的作品：

http://www.baby-kingdom.com/customer/gsk/minisite/child_enlarge.php?pid=329

 

請投Ｂ仔神聖幾票！每日可最多投５票架～

感激！感激！

端午節飛蛾山一遊

28.5.2009

端午節無節目, 天氣又唔多好, 無得去游龍舟水, 記得細細個時B仔公公年年都會帶婆婆、B仔媽、舅父仔同埋姨姨一家五口去蝴蝶灣游龍舟水呢~~ 今時今日既蝴蝶灣就咪搞囉~~~

瞓醒飲茶, 食飽拎d粽去嫲嫲屋企, 得爺爺係度, B仔唔單止見到嫲嫲會喊, 淨係見到爺爺都喪喊, 可能見爺爺令佢聯想起嫲嫲?!?!

坐咗一陣我地一家三口去咗飛蛾山食豆腐花~ 一落車諗住抱B仔落車, 嘩... 一開車門見到B仔瞓到豬咁, 個樣仲要好好笑, haha.......

 

一抱落車就即醒~ 但未有豆腐花食, 賣晒, 整緊第二桶~ 咁唯有四圍行下玩下, 轉頭至去食過~

係地上執起塊樹葉, 隨即拎俾B仔爸喎~

玩咗一陣, 回程行返去食豆腐花~ B仔跑緊過黎追B仔媽呀~ 好開心呢~~

返到去間店仔度仲要等十分鐘, 於是B仔爸叫咗碗餐蛋麵食住等~ 好好味呀! 同樣既一碗麵, 點解硬係俾錢人煮個碗零舍好味架呢?!

等咗一陣, 專程黎食既豆腐花終於出爐~ 熱辣辣, 好滑, 好正呀!!! 唔知川龍個d豆腐花係咪都咁正呢?! (去兩次都賣晒~ 激氣!!!)

食嘢途中已落緊大雨, 食飽見細雨返d就咋咋臨去攞車返屋企! (失策無帶遮)

是日晚餐係應節餐......

咸肉粽三隻...... (正! 正! 正! 正! 正! 正呀~~~~~~~~~)

脆皮咸肉粽一隻...... (貪得意用光波爐試下, 點知一返身就痴底~ 麻麻地, 都係烚熟好食好多)

鹼水粽兩隻........ (又係好好味)

滾冬瓜魚肉湯~

突登蒸砵飯俾B仔做晚餐, 冬瓜魚肉做餸~ 成砵食晒咁濟呀!

清炒油麥菜 (呢輪d油麥菜幾甜)

-----------------------------------------------------------------------------------

B仔媽最近又同B仔玩攝影比賽呀! 唔該幫幫手投B仔幾票丫! 每日最多投5票架~~ 感激感激!!!

http://www.baby-kingdom.com/customer/gsk/minisite/child_enlarge.php?pid=329

第一次學包粽

26.5.2009

今晚同同事去咗學包粽, B仔婆婆都識包粽, 但唔識包三角型, 所以B仔媽就走去學包三角型既粽~ HAHA.......

初初學真係覺得好有難度呀! 一開波都搞唔掂點樣將兩塊葉叠埋一齊~ 但摸清楚了解咗就好順利, 仲越包越似粽樣呢~

首先學包咸肉粽~ 第一隻, 又細又扁, 唔多掂~ 但包下包下, 越包越大隻, 包到第三隻見仲有米淨, 唔好晒, 係咁落料, 點知.... 差不多完成師傅話接住落黎我地學迷李一口粽, B仔媽至醒起, 係喎~ 仲有一口粽, 大濟, 無乜米淨添................

到包一口粽時, 所淨材料只夠包一隻一口粽, HAHA... B仔媽攞埋師傅D料黎包呢~~ 一共包咗五粒一口粽~

包完迷李一口粽, 又學包鹼水粽, 又包咗三隻~

學咗兩個鐘, 剛好九點搞掂~ 一共學咗三種包法~ 十一隻粽, 仲好好玩~ YEAH!

返到屋企咋咋臨放晒入個電煲度烚粽, 唔洗睇火, 夠晒方便~

超級巨粽

25.5.2009

B仔爸今日拎咗隻超級巨粽返黎, 今晚就當晚餐食咗佢至得~~ 呢隻粽真係超級大隻呀! B仔媽兩隻權頭黐埋都唔夠佢大隻呀!!!

煮咗碟腐乳通菜~

仲買埋豆腐花同埋西米露, 飽晒~ HAHA...

B仔近期至愛...

24.5.2009

B仔近期至愛.....................

咪就係個對膠鞋囉~ 一日到黑都拎黎着住通屋走, 婆婆放好佢又去拎黎着...... =.="""

今晚呢個造型真係夠晒爆笑啦~~ 唔着褲, 着住對膠鞋坐車仔! HAHA.......................

B仔仲好識嘆~ 拎個cusion放係車係背度 "i" 住黎坐車, 邊個夠佢嘆丫~~~

藍梅芝士蛋糕

23.5.2009

珊契媽今日到訪, 一齊整藍梅cheese cake~ 第一次買呢盒藍梅醬, 唔知好唔好味呢?!

焗製中...... 香噴噴......

焗完雪完剛甩模~ 今次焗得幾靚, 個面無燶到~ YEAH!!!

藍梅醬裝飾......

加埋粒士多啤梨更加靚~ HAHA.....

B仔睇到係咁吞口水呀~~ HAHA...

 

放假至黎落大雨

23.5.2009

今日大雨到丫~ 落不停呀!!! 放假至黎落雨, 真掃興呀!!! 瞓醒一家三口落樓下飲茶, 飲完茶就去街巿買餸, 之後就返屋企~

幾個禮拜前約咗珊契媽黎整cake兼食飯, 點知B仔爸有假放喎~ 兼且落大雨, 好彩珊契媽都照黎玩~ haha......

珊契媽黎到, B仔本仍午睡中, 唔知係咪知契媽黎咗, 嗒住奶咀, 拖住條毛巾走出黎笑晒口咁同珊契媽玩呢~ haha......

B仔有B仔自己玩, 我地就係度整蛋糕~ 整完蛋糕都差不多要煮飯! 是日晚餐唔記得影相添~ 不過得粗茶淡飯, 希望珊契媽唔嫌棄啦~ haha...... 是日晚餐有: 蕃茄薯仔滾大眼雞、炸菜蒸肉片、叉燒韮王炒蛋、清炒油麥菜!

B仔媽準備晚餐, 珊契媽就幫手睇住B仔同陪玩~

晚飯過後我地就同個cheese cake裝飾一番~ haha...

為食B仔又黎趁墟, 人地係度裝飾, 佢又係度搞搞震~

搞掂晒~ 為食B仔望住個蛋糕不停咁吞口水呀........ 笑C B仔媽囉~

是日新發現<一>, B仔識得由地下擒上B仔媽張大床(B仔媽張大床都幾高下架~), B仔將隻腳指"鉗"住個櫃桶上面個條罅, 兩隻手係咁扯住床單, 就係咁用力就爬上大床... =.=""""""""

是晚新發現<二>, B仔識得由地下擒上佢自己張床仔入面呀!!!!!!! 危險程度超極高! 一邊床欄校咗去至底個格, 佢就係呢邊底床欄度, 好似蜘蛛俠咁, 兩手捉住d柱, 兩隻腳板同腳指唔知係咪有吸管架?! 係咁"鉗"實條柱就"lee lee 林林"擒咗入床仔, 仲要卡卡笑, 睇到B仔媽目定口呆, 珊契媽都親眼望住呢個頑皮仔有幾反斗呢~ =.=""""""""""

少少感觸

17.5.2009

 

今個週末接返B仔返屋企, 覺得B仔又大個咗~ 講多咗嘢~ 不過都仲係BB話多, 但一輪咀係咁"UP" BB話時, 又確實好得意~ HAHA... 見B仔媽飲嘢, 又係咁話飲! 飲! (因為佢想飲呀~) 唔合佢心水時又係咁講 "唔要! 唔要!" 想人抱時又係咁講 "抱! 抱!"

 

同埋曳咗好多呀~ 四圍擒, 擒到既地方都唔會放過~ 包括窗台, 轉個頭咋就已經坐咗係窗台... 真係俾佢嚇C~

 

除咗窗台, 又成日擒去個搖搖椅度~ 所以要連塊食飯板都要拆埋佢~ 如果唔係, 呀大少會坐係塊板度! =.="""""

 

間唔中都會同B仔爸睇返B仔細細個時既相, 唔經唔覺, 個仔開始大個啦~ 再唔係以前個個肥嘟嘟成舊飯好得意既BB! B仔爸成日話B仔個樣無乜點變, 但係細個時得意好多, 點解依家唔得意?!

 

B仔一日一日長大, 話咁快又話要返學~ 唉... 都唔知點幫B仔揀學校?! 點為知識合個仔呢?! 讀錯學校會有幾大影响?! 入唔到好學校點算?! 返學又要改英文名, 改咩名好呢?! 一連串煩惱又要開始面對啦~~

 

將來日子唔知會點呢?! 都好想B仔快d跟返B仔媽生活呢~ 之但係, B仔返B仔媽身邊時, 又是大家痛苦日子既開始~ (因為要返學做功課麻~)

 

B仔手作仔~

16.5.2009

話說B仔星期一(11/5)婆婆帶咗B仔去協康會上playgroup, 第一次呢~ 之但係上堂喪喊~ 怕且B仔仲未識咩叫規距吧~ 仍然按自己意思, 想點就點, 唉... 老師俾餅餅都竟然唔要, 簡值就係神奇呀!!! 結果, 上堂1hr15mins, 佢就喪喊咗成粒鐘咁濟~ 最尾15mins有蛋糕仔食至肯乖乖坐定唔喊食蛋糕... =.=""""""""

星期五晚, 返婆婆家接B仔, 見到有個好有趣既手作仔, 原來係上堂時做的~ haha... 雖然99%係婆婆做, 但婆婆話B仔有幫手架~ 就係幫手搣膠紙, haha...... B仔媽見到B仔所謂既手作仔, 覺得好得意呢~ 唔知B仔幾時至識得做佢第一件手作仔呢?!?!

今日確實頗無聊, 瞓醒食過早餐就同B仔去買餸~ 買完餸行超巿, 買買下餸B仔瞓着咗, 最後, B仔部戰車變咗做貨車, haha......

午睡醒來, 趁B仔坐定定係度睇電視, B仔媽就要佢拎住佢既手作仔黎影返張相留念~ B仔個樣洗唔洗咁無奈呀?!?!

睇睇下電視無啦啦彈起身指住個電視叫... =.="""

呢輪唔知係咪想出牙, 成日塞D手指入口度撩下撩下~

夜晚九點幾, B仔其實好想瞓, 吮住奶咀拖住條毛巾走出廳, 都唔肯瞓......... 所以...... 搞到B仔好似亞拉丁咁, haha...

又拎B仔爸鑰匙黎玩, 係度鎖緊門呀~

今晚B仔爸對住四圍走, 四圍擒既B仔頗勞氣, 但又無開口鬧B仔, 之但係一副忟薑樣, haha......

是日晚餐有......

合掌瓜粟米甘筍湯 (正, 好清甜~ B仔都好鍾意飲)

粟米蝦餅 (今次好味過上次)

蒜蓉蒸貴妃蚌 (廿蚊有六粒, 都幾好味~)

甜酸魚柳 (失敗之作, D汁味道無問題, 之但係D魚柳醃得太...... 咸, 同埋B仔爸係唔鍾意食呢個汁~ 所以出街都幾難至食到生炒骨)

張B仔20個月大啦~

20個月大既張B仔................

 

依然未識講好多嘢, BB話就仲係主要語言, 最叻講"唔要", 成日"喂" B仔媽 =.="""

 

終於識講公公婆婆~

 

ABC淨係識講A, B, E, 仲要係亂咁"up"個隻~ 123都未識數, 真令B仔媽擔心~ B仔, 你要加把勁啦~

 

識聽指令, 叫佢執玩具, 都肯放返好, 當然又係睇大少爺心情

 

B仔爸有個迷李搖控直升機, 個直升機唔開唔郁, B仔就好鍾意玩, 之但係一用搖控黎控制, B仔竟然驚到捉住B仔媽黎喊, 好膽小呀 =.="""

 

去街食飯B仔爸媽唔洗指意有安樂茶飯食, 喪喊, 扭計要落地, 達到佢目的為止 (家陣出街食飯可免則免)

 

好衰, 唔肯食生果, 乜生果都唔肯食, 橙汁就肯飲, 唉... 真麻煩~

 

奶又唔多肯飲, 沖160ML奶都可以飲淨20-40ML, 有無搞錯~ B仔希望你得B仔媽真傳, 飲奶飲到六歲~ 你肯飲, B仔媽一定俾你飲~

 

只鍾意食包, 餅, 麵, 但總體都係唔太愛食嘢~ 唉... 似B仔爸, 唔係掛?!

 

識擒上大床床頭櫃上面, 仲要上到去好自豪地笑 =.="""""

 

一去公園就喪跑, 婆婆怕咗佢~

 

婆婆湊B仔返Playgroup超唔合作, 上堂1hr15mins, 可以喪喊1hr, 仲要老師俾餅餅都唔要

 

識自己着涼鞋

 

沖涼叫B仔捽肚腩, 捽手, 佢會自己捽! 沖涼最鍾意將個細盤仔既水倒咗佢~

 

唔知點解由細到大到依家, 都唔多鍾意婆婆家樓下個看更姨姨, 到依家都係, 唔肯同人SAY BYE BYE, 而B仔屋企樓下個看更叔叔, 初初都抗拒, 但依家一出lift自己走埋去, 跟住就閃咗去, 要次次提佢至同人bye bye兼飛吻, haha...

 

叫B仔唱歌, 好得意, 細細聲, 高八度, ke lee koo lu幾句就收工, haha......

 

發覺B仔唔笑時似B仔爸, 笑時似B仔媽, haha......

 

擒得到既地方必擒~

 

見人飲嘢, 佢想飲, 就係咁講 "飲! 飲!"

Happy Mother&#39;s Day

10.5.2009

20個月大既B仔, 適逄媽媽節, 不過對佢黎講, 都係平凡的一天, 依然懞醒醒, 繼續佢既吃喝玩樂, 又點會識同B仔媽慶祝一番丫~~

星期五晚同公公婆婆係雅仕餐廳剧扒慶祝媽媽節, B仔又係食飯期間搞搞震係度發癲 =.=””” 好彩B仔媽個扒餐叫咗意粉, 因為婆婆俾飯B仔食, 合到個咀實一實話唔要 =.=””” 但就指住B仔媽個意粉示意要食! HAHA… 咁都好d, 肯食意粉都好過無~ 之但係食飽佢又黎癲過 =.=”””

星期六買晒餸, 三伯伯兩點至打電俾B仔爸話夜晚食飯, 獲獲食飯都玩即興, 唔好同B仔媽講今日至知道明天係母親節呀麻?!?!?! 做節又係咁! 食生日飯又係咁! 唔通B仔一家坐定定係屋企等你餐飯黎開咩~ 鑊鑊都係咁, 真係難頂~  難聽d講句: 鑊鑊唔急屎都唔開坑!  結果, 因B仔爸當晚有嘢搞唔得閒, 所以無同佢地一齊慶祝! (叔公叔婆又係玩即興同太嫲食飯慶祝, B仔婆婆又係買晒餸佢地至話食飯, haha… B仔媽無能為力啦~ 自己點湊B仔返屯門食飯, 餸又買埋, 結果又係缺席!)

今日, 按照慣例日頭應該同太婆飲茶慶祝, 但又無收到姨婆們通知, 怕且係怕四圍都係人, 豬流感又肆虐, 所以無同太婆慶祝~ 咁查實有心既, 日日都係媽媽節架啦~ HAHA….. 同人迫又確實頗無謂!

今日, B仔玩嘢~ 九點就瞓醒, 精力無比, 係都唔再繼續瞓, 仲要搞搞震, B仔爸媽無得瞓! =.=”””  唯有彈起身煮早餐食, 嘩… 都不知幾耐無係屋企煮早餐食呀! B仔就食好甜既粟米肉碎粥!

食過早餐, 又係無所事事, 又係唔知去邊樹威好, 結果都係坐係屋企hea~ 12點幾B仔又睡魔急call佢午睡, 趁B仔午睡, B仔媽就動工整芒果忌廉蛋糕!

B仔瞓醒, 蛋糕亦完成, 跟住就一齊返婆婆家! 返到去, 一齊去咗公園玩~

臨出門口, B仔爸媽各有各忙, B仔就自己去咗拎涼鞋, 自己着喎~ 第一次咋~ 不過當佢着咗一個隻鞋, 見B仔媽係度望住佢, 佢又指意返B仔媽同佢着=.="""

B仔爸泊車, B仔媽同B仔係公園等B仔爸呢~~

玩 “sir” 滑梯, 唔係由樓梯上, 而係由底擒上頂, 再 “sir” 落黎, 呢個動作不斷重覆又重覆!

"sir” 落黎幾咁happy~ haha…

B仔爸同B仔媽分別都攬住B仔一齊“sir”落黎呢~ 又確實幾好玩! HAHA… 好彩無“sir” “冧”人地個“sir”滑梯~ HAHA……

玩咗個零鐘就返婆婆家等開飯! 食埋飯9點左右B仔就想瞓, B仔爸媽未食蛋糕就回家~

呢個就係慶媽媽節既~~ 芒果忌廉蛋糕 (唔知好唔好味)

Cream唔夠~ 裝飾頗為樣衰衰的~ HAHA… 有待進步呀!