Boxing Day @ 遊戲展+BBQ

26.12.2009

 

今日一家三口去咗遊戲展, 因為B仔爸又係打機迷一名, 點會錯過丫~ 仲要抬咗部PS3返屋企呀!!!

 

好彩遊戲展人又唔算好多, B仔媽仲同B仔玩咗個馬騮遊戲, 一齊同隻馬騮沖涼, 捽泡泡, 吹毛, HAHA... B仔好開心呢~

 

而B仔爸就同個仔玩咗一個game, 係咁搖個手制等隻雀向上飛, B仔又係玩得好開心~

 

 

兩父子連打機個表情都一樣呀!!!! =.="""

 

 

行完遊戲展去咗冬日購物嘉年華, 有免費飛麻~ haha... 入到去, 人多到呢~ 買咗件唐裝衫俾B仔就走人, 美食個層都無行, 淨係見到on the way to美食個層既人海至怕怕!

 

跟住帶咗B仔去坐渡海小輪, 佢好開心呢~~

 

去到尖沙咀食D嘢就返屋企, 勁攰呀! 散晒呀!!!! 返到屋企抖抖就出發去同B仔爸同事BBQ, 簡值攞命呀! 但B仔超級開心, 係咁跟住D哥哥姐姐跑呀~ 叫呀~ 興奮到唔肯返屋企呀! 之但係返到屋企... 唔肯沖涼... 喪喊... 起碼喊咗半粒鐘至瞓着! =.=""""""

 

 

是日Boxing Day都未有時間拆禮物添~~~

婆婆生日快樂

25.12.2009

 

朝早瞓醒又同B仔玩影相, HAHA... B仔表情多多呢... 真係好得意呀! (唔扭計個時咪得意囉)

 

 

 

 

係度扮吹bubbles...

 

 

一副嗲樣, 真係無乜幾何會見到B仔既嗲樣!

 

 

早餐時間舅父仔電B仔媽問返唔返娘家食飯同婆婆慶生日, 婆婆今日正日生日呢~ 唔返的話點對得住婆婆呀!!! HAHA...

 

返到婆婆家又同舅父仔玩到癲, d表情衰到呢~~~~~~~~~~~~

 

 

 

 

食飽飯, 又到砌蛋糕環節...

 

 

B仔又以為大家同佢慶生日啦~~ 又嘟長個咀仔吹爉燭, 同婆婆一齊切蛋糕, 仲拍晒手掌呀!!!

 

 

俾舅父仔整古, 餵B仔食一舊鋪滿Cream既生果, 食到B仔個樣呢~ 幾咁唔對路, 仲要吮晒D cream至吐返舊生果出黎 =.="""

 

平安夜 - 慶婆婆牛一

24.12.2009

 

平安夜, 公司下午Xmas party, B仔媽幸運地抽到獎, 萬寧50蚊Coupon一張, 好過無咁啦~ haha...... Xmas party食唔飽, 係自然定律黎架啦! 仲要等每個section表演/玩遊戲至走得, 咁搞一搞, 差不多四點至收工!

 

Katherine姨姨送咗一大支火箭(內藏好多顏色筆)聖誕禮物俾B仔, B仔一見支火箭超級開心呢~

 

 

係屋企等公公收工過黎...

 

 

是晚同公公婆婆仲有龍叔叔一家三口一齊去錦田金葉食聖誕餐...

 

魚翅火雞忌廉湯 (好飲)

 

 

蕃茄三文魚沙律 (好味)

 

 

Cheese cake (唔太好味)

 

 

竟然... 掛住食, 唔記得咗影主菜 =.="""

 

跟住婆婆就切生日蛋糕, B仔當咗自己係主角咁, 嘟長個咀仔吹爉燭, 切蛋糕, 非常開心~

 

 

晚飯期間, 餐廳有抽獎活動, 第一輪抽獎B仔爸抽到kenwood既飛碟機, 正呀! 好耐之前已經想買架啦~ haha...

 

B仔都唔輸蝕, 抽到一支缷妝液, 送咗俾Katherine姨姨

 

 

討厭既人做D好討人厭既事

20.12.2009

 

今晚要同99一家做節, 游說到B仔爸可以唔駛帶B仔去食飯, 但日頭就帶B仔俾兩老見一見, B仔老遠見到兩老行黎, 淨係聽到99把聲已即變面, 由開籠雀變得鴉雀無聲, 黑晒面, 到99行到黎B仔想喊, 但唔敢喊, 怕且佢記得B仔媽之前講過佢唔乖thomas玩具送俾其他BB吧~~

 

之後車埋兩老去食飯地點, 全程車B仔都唔出聲, 完全不是平日既B仔呀! 佢仲要間唔使啤"骨"99, 99就當然全程車係咁望實B仔啦~ 全程車叫咗我2次帶埋B仔去食飯, 3次叫我叫埋公公婆婆一齊去食飯... d答案重覆又重覆咁答佢, 真係答到口都臭埋咁濟呀!

 

又話好耐無見過公公婆婆, 又話要見下, 好啦~ 聊幾聊臨走, 公公又好心得濟, 抱住B仔叫佢鍚兩老, 鍚都唔係問題, 至大問題係叫B仔用個咀鍚佢地, B仔媽不嬲都教B仔用手鍚其他人, B仔又好順攤咁鍚兩老, 應該係想快快離開兩老所以咁順攤吧! 公公又好心得濟, 鍚完一次又叫B仔鍚多一次, 99好不客氣主動嘟長個把咀埋B仔鍚佢度, 嘩.......... 睇到B仔媽眼都"king"埋, 有口說不出話呀! 當面話公公又唔得, 嬲B仔媽幾年都似, 當面阻止, 老人家們又唔高興, 唉... 呢鑊嘢真係至難受個個係B仔媽囉~ 你地識唔識咩叫做衛生架?!?!?!?!?!?!?!

 

到食飯, 個個問B仔媽做乜唔帶埋個仔黎食飯, 佢地又唔諗下上次佢地就快快樂樂開餐時, B仔媽自己一人抱住個仔係街溜蓮咗成粒鐘, 又話做乜B仔咁細膽, 又話B仔少見人所以咁... B仔媽好想大大聲同佢地講: B仔係見你地至係咁架咋! B仔日日返學日日都見人架! B仔唔係你地所想咁呀!!!!!!!!!!!! 當然... B仔媽並沒有這個勇氣向個班人講啦!!!!

 

佢地又唔諗下, B仔出世以黎, 難聽D講句, 毛都無條呀! 係出世時99送咗2件衫1套運動裝俾B仔咋~ 生日... 連利是仔都無封呀!!! 一歲生日又無, 兩歲又無... 唔係貪錢, 係個心意囉! 都莫講話聖誕禮物啦~ 亞嫂們又如何?! 只得三嫂B仔出世時送咗1套衫仔, 同埋曾幾何時送咗一部玩具車仔俾B仔咋~ B仔媽唔係貪心人地送嘢俾B仔, 只不過, 所謂咁親既人都咁表現, 抵B仔唔鍾意佢地啦!!!

 

幾時生返個女? B仔媽心諗唔洗錢養咩?! 有人仲好笑, 叫B仔媽生啦生啦, 個大仔俾佢養喎! 呢D咩笑話黎架?! 好好笑咩?! 真係唔識笑喎!!!

 

呢生人其一至憎就係要同D唔想見到既人一齊做節既日子!!!!

星期六, 好凍呀!

19.12.2009

 

天氣實在太凍, B仔兩母子凍到唔想出門口, 但又要食, 於是食完早餐就去買餸, 然後就回家!

 

 

出門前, 初初唔肯戴帽, 但B仔媽不停在鏡前讚B仔戴咗帽好靚仔呀! 企鵝係頭度好得意呀! 佢至肯繼續戴, 唔反抗! HAHA......

 

 

有前, 有後... 頂帽都唔錯~ HAHA...

 

 

係M記食午餐中......

 

 

 

食開心樂園餐, 換咗隻馬仔俾B仔, 佢好鍾意, 好開心呢~

 

B仔真係好得意, 自從生日去過迪士尼樂園玩, 自此一見到米奇又話迪士尼, 一見電視賣廣告, 即放低手頭既玩具, 以9秒9既速度跑去電視機前一邊睇, 一邊講: 嘩! 迪士尼, 好靚! 煙花, 好靚! (B仔真係好犀利, 淨係聽聲已知係迪士尼廣告, 即衝去睇電視)

 

打敗仗 + 覆課

14.12.2009

 

B仔打仗打咗成十日有多, 真係擔心C人, 初初喉嚨發炎, 發燒, 咳, 流鼻水, 開始退咗燒時又突然高燒, 真係嚇C人呀! 好彩一高燒時又返陳醫生度睇, 原來喉嚨發炎都好返好多, 但就演變到氣管發炎, 好彩決定黎睇一睇, 一陣延誤咗醫治變肺炎就大濟~

 

B仔幾日都keep住沒精打采, 唔願食, 唔願玩, 只管瞓, 真係... 令人好擔心! 婆婆好辛苦呢~ 應該無晚有覺好瞓, B仔媽真係無限感激婆婆耐心照顧B仔呢~

 

個幾禮拜無返學, 劉老師同莫老師都有打電俾B仔媽關心一下B仔情況~ 莫老師話李主任都好掛住B仔呢~

 

B仔今日至開始返返學, 婆婆話B仔好開心呢! 放學排隊行出黎時, 望到婆婆超開心, 笑晒口咁呢! B仔好鍾意返學架!

 

 

16.12.2009

 

今日B仔係學校打邊爐, 婆婆準備咗d丸俾B仔帶返學烚烚烚, HAHA... 婆婆話, B仔今朝自己稱住袋丸返學, 入到學校唔肯俾老師拎, 自己拎到返入課室呢! B仔媽放工打電俾B仔, 問佢今日係咪打邊爐, 佢就話"打邊爐", HAHA...

 

依家D學校都幾得意~ 好多元化, 好多嘗試, 俾小朋友邊體驗邊學習都唔錯~

郊遊樂

29.11.2009

 

今朝B仔爸放工就買早餐返黎食, 之後去咗馬安山公園踩單車, B仔媽肚子依然痛, 但好彩又唔係肚痾個隻, 係郊野公園至黎肚痾的話就真係澤洗囉~ HAHA......

 

B仔有單車踩, 當然勁開心啦~

 

 

依然唔用腳踏踩單車, 依然用腳黎行 =.="""

 

 

B仔幾咁用心+用力"踩"單車

 

最後一單K1面試日

28.11.2009

 

尋晚B仔媽發燒, 真係... 好少可呀!!! 成晚由B仔爸負責照顧B仔, 今日B仔爸要返工啦~ 全日就由B仔媽一人照顧B仔囉!

 

今朝10點半去咗interview, B仔一入學校見到個座廚房玩具, 佢就自動波除鞋走去玩, 懶理B仔媽係度辦手續, 等候期間, B仔搞笑到抱住Bear Bear, 攞盒奶餵Bear Bear飲, 又放Bear Bear玩千揪, 跟住又放佢去床搖佢瞓覺......

 

好快就可以入課室interview, B仔既表現都唔錯, 原來一入課室B仔已同老師講早晨, B仔媽唔為意仲叫B仔同老師講早晨, 老師仲話B仔已經叫咗, HAHA...... 老師問B仔乜, 佢又肯答, 唯獨是老師問黃色杯係咩色, 佢係都唔答掛住玩, 因為... 佢唔色黃色囉~~ B仔媽真係滴汗呀! 到尾升老師同B仔媽傾計, B仔就係課室走來走去玩, B仔媽係咁叫B仔返黎坐, 老師都話由得B仔, 話佢仲細係咁, 希望老師唔會Mind啦~ 離開課室前, 老師要B仔推返凳, B仔又好聽話, 兩張都推晒, 跟住仲同老師講Bye Bye, 叻仔!!!

 

Interview完, B仔媽都wing wing地, 咋咋臨買d餸就速速返屋企樓下睇醫生! 跟住柏滔媽上咗黎拎嘢玩咗一陣, haha... 兩個小朋友都玩得好Happy呢~~ B仔又成日走去搶柏滔玩具啦!!! 至搞笑係... 柏滔媽鬧柏滔時, B仔扮晒矇仔咁走去撩柏滔媽, 搞到柏滔媽d火氣洩晒, haha.......... 柏滔媽, B仔媽鬧B仔時, B仔就係咁既樣架啦~ 咋傻扮矇! 一係指東畫西引開你注意! 係咪好吹脹呢~ HAHA......

 

 

之後就同B仔大覺瞓, HAHA...... 一瞓就瞓咗起碼三粒鐘呀! haha...... 夜晚蒸個肉餅飯烚碟菜就一餐! 食飽睇宮心計結局篇, 玩下自拍, haha...... 咁就一day啦~

 

 

做運動.....

 

 

幾專心咁睇書, 不過只係呢一刻咋, 跟住個一刻閃咗去玩啦~

 

勁耐無update blog添~

27.11.2009

 

*** B仔媽篇 ***

 

原來都隔咗好耐無寫blog啦~ 之前因為B仔學校既事而煩惱咗好耐好耐, 其實到目前個煩惱都未得到解決, 雖然已交咗一間留位費, 至起碼有個學位先, 但B仔媽又同B仔幫咗另一間, 不過無學卷, 會好"那脷", 但即管interview咗再決定~ 明天就in啦~ B仔媽無之前咁緊張啦~ B仔更加唔洗講啦, 一直都唔知發生緊咩事架啦~ HAHA......

 

B仔媽呢期既煩惱係... 想繼續返工, 但B仔出年返學又會跟返我, 學校最遲又要六點要接走, 根本趕唔切返去接B仔, 請工人B仔爸又唔會, 同埋多個人係屋企又幾煩既~ 日常開支又會大咗~ 如果請鐘點, 又唔知搵唔搵到個好人黎照顧B仔, 又唔知B仔跟唔跟佢, 又如果B仔打敗仗返唔到學時, 又係麻煩~ 學校假期時又點算?! 婆婆又已經講咗幫唔到B仔媽湊, 要出去搵嘢做呀~  真係九萬幾個問題..... 好煩呀!!!

 

B仔媽又唔捨得份工, 雖然人工唔係高, 但勝在福利好, 時間穩定, 自由, 同埋至重要係直屬上司對B仔媽好好丫麻~ B仔爸都話B仔媽咁後生唔做嘢的話, 又確係有點兒晒咗! 又補咗句: 你唔做嘢都可以應付到! 咁即係... 最終決定還是B仔媽自己諗!!! 唉... 多一份人工, 一個家庭就會鬆動d, 輕鬆d~ 真係... 好煩呀! 有無粉嶺區相熟有愛心好保姆介紹俾B仔媽呀?!?!?!

 

B仔媽又要決擇, 究竟應該揀一間課程深還是課程淺既學校俾B仔讀?! 讀得淺, 雖然呢三年B仔會返學好happy, 但一上小學又驚佢適應唔到而對讀書失去興趣, 咁B仔媽就真係噴血~ 讀得深, 又驚佢吸收唔黎, 又驚佢辛苦, 但上小一就應該唔會有大問題, 兼咁唔好彩要叩門時就可能會有幫助... 又係另一煩惱呀!!!

 

 

*** B仔篇 ***

 

B仔由十月尾至十一月頭一連串既面試活動經已完成, 當然佢係唔知發生緊乜事! 結果係點, B仔都唔識得在意~ 依然繼續吃喝玩樂瞓兼扭計, HAHA......

 

14.11.2009 B仔媽同B仔爸報B仔去咗參觀一間無學卷既幼稚園同埋交報名表, 向我地講解既原來係校長, 學校/課室佈置不及有學卷學校色彩繽紛, 入到去氣紛好書卷味, 接待處掛住兩幅對聯, 環境方面就真係有點兒打咗少少折扣, 但呢間係呢區口碑都唔錯, 課程相對地較有學卷既學校深, 如果想入區內TOP小學應該問題唔大, 學費就當然好金啦~ (所以B仔媽唔返工點搞得掂丫~) 不過聽完校長講解, B仔爸都好buy校長所講既意見, 亦好中B仔媽心中所想, 所以如果收B仔, 入讀呢間機會都大~ 希望咁既決定會對B仔將來係好, 希望B仔媽無同個仔揀錯啦~

 

17.11.2009 B仔班主任劉老師打電俾B仔媽, 提B仔媽今個星期五有親子活動日, B仔媽當然唔放過機會, 問下劉老師B仔係學校點啦~ 劉老師話B仔仍然咁活躍, 但規矩咗, 以前食完茶點會即閃咗去玩, 依家識得收返d杯碟入書包, 然後坐係位休息一陣, 等其他小朋友食埋茶點~ 至搞笑係... 劉老師話近期唱歌時, 老師邊唱邊做動作, 其中一個動作係伸出對手, 劉老師一伸手, B仔就衝出黎攬實劉老師, 其他小朋友見到又跟住B仔攬老師, HAHA... 佢地好得意呀~ B仔媽仲問劉老師: 咁你咪好冧!!! 劉老師甜絲絲答(B仔媽feel到): 係呀!!! haha... 教小朋友唔勞氣時都幾開心! 佢地d行為有時又真係幾令人快樂!

 

20.11.2009 今日B仔學校搞親子活動日, B仔媽同B仔爸都出席唔到, 唯有靠婆婆代為出席, HAHA... 唔知玩成點呢?!

 

撞咗埋牆?!

11.11.2009

 

今日婆婆湊完B仔放學, 即向B仔媽報告, B仔係學校撞親個額頭, 紅咗~ 到Lunch hour, 劉老師打電俾B仔媽, 告知B仔係學校撞咗埋牆, 撞到額頭紅咗, 事緣係咁......

 

話說臨放學, B仔同埋同學仔們已經着好鞋等放學, 坐隔離個同學仔望到佢爸爸媽咪係課室窗外望佢, 個同學仔就大叫: 爸爸! 爸爸! 仲向窗邊行過去! 極度貪玩既B仔, 以為人地同佢玩吧~ 又跟住叫爸爸! 爸爸! 一齊向窗個邊行去, 怕且同學仔係大隻B吧~ 唔小心撞到B仔埋牆~ 實際情況係點, 劉老師都無望到~ B仔當然有喊啦~ 但"乙水"兩"乙水"就好快收聲~

 

劉老師話B仔依家返學好開心呀! 做體操又跟住做得好開心, 唱歌又會跟住唱, 但就未識全首唱~ HAHA... 唔怪得之今個星期返B仔媽度時, 成日係度唱ABC歌啦~ HAHA... 真係好得意~ 佢又唱得開心, B仔媽又聽得淘醉, HAHA...

 

尋晚B仔仲打電俾B仔媽呀! 婆婆話B仔要打俾B仔媽喎~ HAHA... 當然應該係婆婆知B仔媽心情唔多好(婆婆好潮架, 有睇FB架~) 話就話B仔要電媽咪~ HAHA... 不過, B仔第一句: 媽咪~ 嘩... 真係冧晒呀! HAHA......

 

大局已定...

10.11.2009

今日係1st choice學校放榜日子, 結果係點?! 衰埋啦~

雖然內心都預咗唔收, 但內心仍感到沮喪, B仔表現雖然唔係最好, 但又唔係好差遮~ 唉......

算吧啦~~ (唔算唔得啦~) 或者間學校唔適合B仔呢~ 又或者B仔都唔鍾意呢間學校呢~

B仔呢方面真係無乜運氣, 真係無辦法! 希望B仔媽揀個間學校, B仔會鍾意啦~ 希望佢讀得開開心心!

No mood... No mood... No mood

31.10.2009

 

萬聖節, 完全No mood的一日!

 

今朝B仔要去三間學校Interview, 第一間9點, 去到聽咗校長講嘢十分鐘左右, 等in期間, B仔係度玩Puzzle, 有老師觀察, 好快就入去課室見老師! 一入去B仔就俾個大型珠串吸引住, 老師問佢十問九唔應, 掛住玩 =.=""" 老師唯有等佢玩一陣, 同B仔爸媽傾下計, 了解下B仔日常生活, 之後拎咗個蘋果、包包、杯同碟俾B仔, 老師拎住個蘋果問佢咩黎?! 佢都唔答, 佢識架~ 但... 俾個包包吸引住! 係咁話包包! 全個面試過程都好快, 老師都好似好鍾意B仔咁! 希望收佢啦~~

 

之後去咗食早餐, 11點去第二間見, 呢間係B仔媽既2nd choice呢~ 去到B仔都無乜嘢, 但一入面試既課室, 就爬晒地發爛咋, 點引誘佢都唔得, 好無助... 亦好失望... 一group 6個小朋友, 係得佢一人係咁, 唉... 無行囉~ 衰硬啦! 小朋友們坐埋枱個邊玩玩具, 個老師一對二, 都無乜點理B仔, 理都係好敷衍個隻, B仔媽都已經心裡有數, 玩完玩具又坐返埋位, 又黎發癲, 唉............. 原本諗住呢間應該好大機會入到, 但..... B仔咁表現, 諗都唔洗諗啦!!! 見完B仔媽真係好嬲, 好唔開心!!! 嬲... 點解個個小朋友都咁乖坐定定聽老師話, 係B仔咁唔合作?!?!

 

12點去第三間見, 唉... 又係唔肯入課室(遊戲室), 係大廳玩佢又肯, Warm up咗好耐都唔肯入課室, 老師唯有係大廳觀察佢, 到入去面試課室時, 又係喪扭爬晒地... B仔媽真係火都黎埋, 同老師講我同佢出去冷靜下先, 其實個一刻真係想走人, 算啦~ 唔想in啦~ 真係好嬲, 第二間又係咁, 呢間又係咁, 無學校收架啦~~ 好嬲, 但又好擔心, 唉................................. B仔爸出黎睇我地, 話老師話可以係大廳度同佢面試, 觀察佢d專注力, 咁我地返返學校, 入返面試室B仔又無嘢喎, 老師問乜答乜, 唉... 不過如果我係個個老師, 都唔會收B仔啦~ 算吧啦~ 又係無行多架啦~~ 除非佢未收滿學生遮!

 

呢云真係一鋪清袋咁濟, in 3間, 2間B仔媽未收信都已經預測到結果會是如何~ 幸好第一間無發癲, 三間都癲時我就真係要入青山避靜一下啦~~ 唉.............................. 下個星期六見1st choice個間, 唉....................................... B仔媽都不望入到架啦, 個間咁多人考, 又難入, 都入到多架啦~ 叫做即管一試啦! 只望B仔到時乖乖地, 唔好扭計爬地就乜都得啦~~

 

唉................ 真係.......................... 好驚無一間收B仔時點算好?! 係咪應該報多幾間學校?! 唉............ No mood既一週呀!!! 好擔心呀!!! 好驚呀!!! 點算好呀!!!

 

School Halloween

30.10.2009

 

今日攞咗假去B仔學校參加Halloween活動, 家長們十點半就係學校門口等小朋友出學校, 準備大夥兒去巡遊, HAHA.....

 

小朋友們個個都俾老師畫到花面貓咁, B仔同學仔呀, 好得意呀!!!

 

 

B仔出場...

 

 

 

巡遊隊伍...

 

 

呢個哥哥仔好搞笑呀!!!

 

 

巡遊完就返學校派糖/攞糖, B仔唔知發生咩事咁, 人地俾糖佢, 佢就係佢個兜度拎粒糖俾人交換, 好得意~ HAHA...

 

 

B仔好似係度盤算緊自己有幾多粒糖...

 

 

與班主任合照

 

聖詩頌唱遊戲日

15.10.2009

 

尋日臨放工劉老師至confirm B仔媽明天1045時家長可以入學校睇小朋友們表演唱聖詩, 學校校慶節目呢~ 好彩B仔媽可以臨時臨急都攞到半日假睇B仔表演啊~ HAHA......

 

今日仲叫埋舅父仔幫手影相呢! 舅父仔又肯SO B仔媽呢下至出奇喎!!!!!!

 

 

學校一開門, B仔媽仲唔九秒九急步去霸返個頭位睇表演咩~ hoho...... 一開始係K1班表演, 都有三分二小朋友跟住唱歌做動作, 之後就K2班, 大一歲果然又唔同, 全部都有唱有做運動, 之後就輪到N1班......

 

登登登登... 小綿羊們搭住膊頭出場......

 

 

個個都矇盛盛咁, 唔知發生乜事?! 唔知做乜咁多人係度望住佢地?! 唱歌... 更加無一個跟住唱, 實行話之你~ haha... 好得意呀! 又可愛! 個個都細細粒, haha.....................

 

B仔全程黑面, 無笑, 只係當見到B仔媽同舅父仔時就有笑~ 之後一直保持黑面......

 

 

 

B仔既同學仔呀!

 

 

表演完就排隊返課室...

 

 

 

N1班表演完就到K3班~ 表演完畢就舉行燈籠投票, 投票完就開始攤位遊戲!

玩完遊戲就SIR滑梯...

放學係公園SIR咗陣滑梯就返婆婆屋企, B仔媽都要返工LU~