爛瞓豬B仔

29.6.2008

今朝天氣仍然唔多好, 天陰陰的! B仔尋晚十點幾飲完餐奶就瞓覺, 到第二朝七點至嘈食! 但係期間無啦啦喊兩聲, 真係唔知佢做乜, 搞到B仔媽好似無瞓過覺咁!

七點食飽又玩咗一陣又同B仔媽一齊瞓着! 到十點就瞓醒, 又係B仔媽床度爬黎爬去, 搞到眼瞓既B仔媽無得繼續瞓, 唯有叫B仔爸起身一齊去食早餐!

食早餐返到屋企, 整粥俾B仔食, 食咗幾啖, 唔肯食, 係咁扭, 應該係想瞓覺吧! 於是開支奶俾佢飲, 粥留返下一餐再食!

B仔自己捧住支奶, 食食下瞓着咗喎~~~~~ 似唔似飲醉酒呢!

B仔媽試圖放佢坐係度, 但不到兩秒就 "i" 咗去咕o臣度瞓! 呢張相, 唔識B仔既以為佢幾歲人仔囉~~

見B仔咁快瞓到豬的一樣, 還以為佢會瞓好耐, 點知...... 半粒鐘左右就醒咗! 瞓醒無嘢好做, 食蕉蕉啦~~ B仔係未識自己咬, 都係要B仔媽用匙刮佢食至食到呢!

食完蕉蕉, 又黎作反!

B仔, 你做乜着迷李裙呀?!?! 你唔係曳成咁架麻?!?! 大家有所不知..............

家陣同B仔換片着褲, 好似要同佢角力咁, 周度碌, 要同佢鬥快咁, 唔肯包片着褲架~~

有一回B仔爸走黎叫我睇下個奇景! B仔爸還以為B仔曳到將一隻腳伸到同一個褲管度! 問B仔媽係B仔曳成咁, 還是B仔媽幫B仔着成咁?! 但研究過, 佢無理由可以做到呢個高難度動作, 應該係B仔媽怱怱忙忙同B仔換片着褲時, 唔為意着咗同一個褲管呢~~ Hahahaha............... XD

沖完涼, 食飽粥粥, 又到午睡時間, 一瞓就個幾鐘, 瞓醒返婆婆度!

B仔, 你托奶樽托得咁有型架~~

公公返黎同公公又玩又笑, tum得公公好開心呢~~

B仔又想同Pizza妹妹玩啦~~

夜晚食飽飯, B仔媽同B仔爸去咗巿中心睇<功夫熊貓>, 都幾好睇喎! 好搞笑呀~~ 但配音就覺得配得唔係咁好!

好大雨呀~~

28.6.2008

今日sat又要返工, 12點放工咋咋臨同B仔爸一齊返屯門同婆婆飲茶.

B仔又要食埋一份, 食包包! 今日B仔試咗少少牛肉, 食完牛肉唔多鍾意食包包!

對面枱個師奶對住B仔拍手掌, B仔又跟住人拍, 好搞笑!

飲完茶就帶B仔返屋企! 第一時間試下個麵包超人水泡先! 好想帶B仔去游水呀!

之後一家三口去街巿買餸, 買完餸出街巿, 落狗屎!!! B仔媽孭住B仔急步走回家, B仔竟然笑到卡卡聲, 吹脹!

實在太大雨, 連B仔手仔同頭仔都濕咗少少呢~~ 返到屋企即沖涼食奶奶瞓覺覺豬!

● 心情 ● 差 ● 劣 ●

22.6.2008

係娘家食完飯, B仔飲埋支奶就返歸! 返到屋企, 竟然俾我發現咗, Toilet入面, 竟然有包煙同一個火機, 心情當然一沉, 原來B仔爸仲有食煙, 還以為真的戒咗, 原來只不過係個傻婆以為, 事實卻並非如此.

B仔爸返到黎只講咗一句: 沖完涼至同你講. 之後就不了了之, 乜都無講過!

 

23.6.2008

尋晚失眠, 一早要返工, 好辛苦! 好攰! 成晚無同B仔爸講嘢咁濟, 佢都好無癮, 之但係, 我仲無癮, 俾人呃咗咁耐! 就算最近至食返, 點解要食返?!

食完飯返屋企沖完涼, 竟然仲有心情打機, 日打夜打, 無時無刻都打打打. 真係即刻火都黎埋!

星期日, B仔係度又唔同佢玩, 只顧打機, 個時已好不滿, 可唔可以我地係度時唔打嘅呢?! 已經少見B仔, B仔個傻仔又鍾意望住B仔爸笑, 之但係佢爸爸就只顧打機, 都無理個仔對住佢笑, 爸爸無反應, B仔唯有繼續買玩具, 個刻個心都幾痛架, 個仔想同爸爸玩, 而爸爸又唔理! 唉..........

見發脾四, B仔爸又貫徹佢嘅作風, 話之你! 當你發UP風! 問十句敷衍一句! 佢越係咁我就越"興" 真係好討厭呢種態度! 唔出聲又話我唔出聲, 到出聲又話我發脾氣! 想點?!

身邊嘅朋友食煙, 就食煙, 咁即係朋友去溝女包二奶, 又會一齊去溝女包二奶?! 朋友去死, 又一齊去死?! 丫... B仔爸嘅答案果然係好答案: 咁我就去死!

唉............................. 那種態度, 真的好難受呀! 成日覺得B仔爸好多嘢呃我, 瞞住我!

一心情唔好, B仔爸d唔好嘅嘢就係咁湧出黎... 太自我啦~~ 自私! 自私! 自私! 自私! 自私! 自私!

唉... 唔好以為第時你行先, 就有B仔陪我, 到時都係只得我一個, B仔有自己的伴侶, 仲邊得閒理佢媽媽我丫~~

又一晚失眠夜~~ 幸好實在太攰, 都只不過係半失眠夜!

 

24.6.2008

本來打算放工返娘家睇B仔, 但係心情唔好, 都係唔好返, 免得B仔婆婆問長問短! 加上話會掛8號風球, 屋企未關窗, 還是回家! B仔爸返工, 但全日一個電話都無! 心淡! 今晚仲要掛8號風球!

 

25.6.2008

半夜4點俾d雨聲嘈醒, 嘩....... 勁呀! 好大雨, d雨打落玻璃度啪啪聲添呀~~ 跟住繼續瞓, 瞓到鬧鐘響, 起身第一時間梗係開電視睇下係咪8號, 見仲係, 開咗收音機繼續瞓, 不過瞓下醒下, 瞓到九點左右就起床!

到收工時間都無個電話, 8號風球呀!!! 望咗幾云都唔見踪影, 到十點, 點解仲未返?! 唔通有嘢做未收工?! 還是出什麼意外?! 唔好講笑, 8號風球, 真係擔心架!!! 點知....................

打電話俾B仔爸, 竟然................. 篤緊波!!! 8號風球咁好興致篤波!!!

最吹脹嘅係, 竟然問返我轉頭係邊?! 大佬, 8號風球, 去得邊呀?! 唔通係條街同風雨博鬥呀?!

唔係唔知我係屋企麻?! 唔係唔知8號風球唔洗返工呀?!

唉... 真係仲有乜好講?! 無話可說! 又成個傻婆咁擔心個老公, 等佢返黎, 點知原來去咗玩! 唉...

心情好劣, 四日啦~~

睇黎B仔爸係一名唔應該結婚生仔嘅男人~ 無責任感! 自私! 朋友最好, 老婆最煩! 打機最好玩, B仔唔好玩!

可唔可以真係以後都唔食煙呢?

係我同B仔面前, 唔打機得唔得呢?

可唔可同B仔玩多d呢?

可唔可以做人有d交帶呢?

可唔可以態度好d呢?

幸福張師奶, 一d都唔覺得幸福! 以為有自己的家便會好幸福, 其實只得單方面, 又何來幸福!

結婚只不過兩年, 生活便已經這麼枯燥, 沒一點情趣, 雖然有B仔, 但都唔覺有乜轉變, 都仍然係咁枯燥乏味, 往後日子點過?!

無聊星期日

22.6.2008

尋晚B仔發癲呀! 凌晨三點嘈食奶~~~ B仔媽成點至瞓, 三點就俾B仔嘈醒去沖奶, 仲要抱住佢黎沖呀! 點解?! 喊到唔識收聲呀! B仔爸又返咗工!

八點鐘就醒咗, 又係度四圍爬黎爬去, B仔媽又無覺好瞓!

今朝煲咗瘦肉菜心粥俾B仔做早餐! 食飽飽B仔爸就放工返黎!

識得四圍爬既B仔, 好鐘意爬去張凳度捉住兩條柱, 又係度 "tum tum" 轉, 然後 "i" 向後!

好彩B仔爸接住佢咋~~~

爛玩精, B仔媽係度跳, 佢就係度笑到 "卡卡" 聲.......

下晝返咗婆婆度, 婆婆落街買嘢, B仔就拉咗一大篤屎, 於是順便沖埋涼, 跟住就暗B仔瞓覺覺豬! 瞓咗唔夠一個鐘就醒咗~~

係衫仔係矇姨婆送架~~~ 正呀!!! 多謝矇姨婆!!!

 

母子共處天倫日

21.6.2008

今朝B仔七點起身嘈食奶, 都好過五點幾嘈食~~ 食飽又瞓, 瞓到十點就起身! B仔媽當然又好不願意地起身啦!

起身後既B仔又係B仔媽張床度四圍倒蛋..........

十一點食奶奶, B仔媽要train一下懶精B仔自己拎奶樽飲奶奶, 唔自己拎就無得食!

 

食食下唔通手軟, 托咗個奶樽底?!

食飽飽就帶B仔去街巿買餸煲粥仔! 去到菜檔B仔唔知發咩癲, 無啦啦勁喊, 要抱一陣至肯收聲! 抱都不是辦法, 會買唔到餸, 於是掉轉個手柄黎推, 等B仔望住我, 佢就真係成日望我, 一望我就笑, 真搞笑呢~~~

三點鐘, 約咗B仔個朋友仔柏滔一齊去公園坐, 柏滔細B仔七日呢~~ 佢好白淨架, 眼仔又大大, 頭髮又黑, 好得意呀! 柏滔係斯雯仔黎, B仔泊埋去, 真係零舍牛精呀!!! (本身B仔已是牛精仔)

公園坐咗一陣, 實在太熱, 我地去咗食TEA呢~~~~ 食完TEA就各自回歸!

返到屋企咋咋臨沖個靚涼! 用花灑射去B仔個身度, 笑到卡卡聲~~ haha.... 笑C我囉!

B仔係唔驚花灑架, 之前抱住佢黎開去, 第一次捉佢手去花灑都, 佢驚, 試多兩次就自己伸手埋去囉~~ 自此之後, 一見我開水喉/花灑就要伸手!

白白豬完梗係嘆返個B仔媽愛心靚粥先啦~~ 粟米茸瘦肉粥

食飽粥粥, 繼續刨緊電視呀~~

刨咗陣電視就扭計要瞓~~ 一瞓就瞓咗個幾鐘!

十點幾, B仔媽又俾咗支奶佢飲, 當然又要train下啦~~

B仔, 你又幾時撞紅咗個額頭架?! 你腳仔都已經瘀咗幾撻啦喎~~~

B仔媽饅頭

18.6.2008

究竟幾時先落完雨呀?!

本來B仔媽今日放工打算返娘家睇B仔, 點知......................

放工時候屯門落超勁大雨呀! 落大雨都唔係問題, 最怕一落雨, 遇着屯門公路塞車的話, 到時真係無幾粒鐘都返唔到去!

於是, B仔媽選擇返屋企, 食自己! (B仔爸返工呢) 出火車站時, 駛唔駛咁大雨呀?!

買完碗麵就咋咋臨返屋企囉~~

食飽飽, 又見無聊, 於是試下整饅頭! 第一次整咋~~ 唔知成唔成功!

材料好簡單: 麵粉、砂糖、泡打粉、乾酵母、水

剛搓好兼切好等發既饅頭......

剛蒸好既饅頭............ 咁樣衰既?! "豆"皮既?! 唔皮光肉骨架?!

同本書既差幾遠!!!

B仔媽咬咗幾啖之後...................

味道都OK, 可以再甜返少少! 但係實實地咁, 唔夠鬆軟!

記得好耐好耐之前, 試過一次整壽包, 個樣又係 "豆" 皮, 又係唔得鬆軟......

Um........ 究竟點至做到酒樓咁正呢?!

唔通要用暖水黎搓麵團?!

多層豬扒包

17.6.2008

今晚B仔爸有事要辦, B仔媽要食自己, 但又唔知食乜好..............

今朝同鼠鼠傾計時, 講開食, 鼠鼠話想食豬扒包, 搞到B仔媽食引發作, 加上屋企仲有個蕃茄未食, 於是放工走去大百佳買豬扒同包, 仲有芝士, 想買埋生菜, 但唔靚無買!

返到屋企解凍豬扒同醃埋, 醃到咁上下就係時候炮製我既豬扒包~~~~~~~ YEAH!!!

呢個就係B仔媽既晚餐 ~~ 美味豬扒包

仲要係豬扒打孖黎! HAHA........................... 好味! 如果豬扒再醃耐D仲正!

B仔爸11點幾至返到黎, 辛苦咗一日, B仔媽當然要準備B仔爸既宵夜啦!

嘩... 嘩... 嘩... B仔爸個仲勁! 幾厚! HAHA.................... 有蕃茄淨麻, 唔好晒, 夾埋落去食埋佢!

結果, B仔爸話厚得濟! 一塊豬扒都夠~~~ HEHE.................

西蘭花豬仔脾扁意粉+蕃茄炒蛋夾包包

16.6.2008

今午CITIBANK信用咭個邊打黎話我未找咭數, 至醒覺唔記得找, 打去問有無得豁免late & admin. charge, 佢話我12月時豁過一次, 要隔最少一年至可以豁.....

有無搞錯, 咩銀行黎架~~ 我又唔係個個月都遲找, 都唔知咩銀行黎架! 第二間銀行都有得豁免, 係佢至係隔一年至有得豁! 真係谷鬼氣想CUT咗張咭, 又無SO, 積分換嘅禮物選擇又唔係好多.........

但係...... 供緊部電視, 唔CUT得添~~  唉... 誰叫自己唔記得找咭數咩!!!

本來興致勃勃放工去買餸煮飯, 俾佢搞一搞無晒MOOD.

放工約咗景明媽交收隻跳跳鹿, 比預期早咗到, 仲有成20mins, 企係度等又好無聊, 於是, 摩打腳行咗去街巿買餸, 邊行邊諗今晚食乜餸, 5mins行到街巿, 10mins 買餸, 再5mins行返去火車站 haha... ... 真係要俾個勁自己呀!

用10mins買咗乜嘢餸?! 西蘭花、蕃茄、豬仔脾骨, 仲有1/4邊西瓜(個西瓜好重呀!)

是日晚餐................

西蘭花豬仔脾扁意粉 (好味, 扁意粉好食過圓意粉呀!!!)

蕃茄炒蛋夾包包 (包包係買嘅, 食之前用焗爐烘一陣, 變脆包包, 好好味)

爸爸節快樂

15.6.2008

今年B仔爸第一次過屬於佢嘅爸爸節, 但係............................. 佢要工作中渡過囉~~~~ 所以無慶祝活動!

B仔一早九點就瞓醒, 但係B仔媽仲未呀...... ......

皇帝仔...... 媽媽4點扎醒, 原來落緊勁大雨, 跟住你7點起身喊食奶, 然後9點就瞓醒, 瞓醒仲要係媽媽床度四圍爬, 媽媽無得瞓呀~~~~

於是打電俾婆婆問去唔去飲茶, 今日特別日子, 想搵到位飲茶都幾難, 於是去咗樓下間酒樓, B仔媽即刻彈起身梳洗兼搞B仔, 跟住去搵位! 樓下都要等住, 想係第二度有位都幾難, haha......

時間關係, 無同B仔換衫就出門口, hehe... B仔着住條瞓覺褲去飲茶添~~

飲完茶就返咗屋企執嘢, 一齊返婆婆度!

B仔又黎扭眼瞓, 超級眼瞓都唔肯瞓, 唔知發咩癲, 最後同婆婆一齊午睡!

食過晚飯B仔媽就返歸!

弊... 唔記得咗代B仔同B仔爸講: 爸爸節快樂!!! B仔你自己黎啦~~~

 

B仔爸湊仔呀~~

14.6.2008

今朝要返工啊~~~~~~~~~~ B仔又返咗屋企, 得B仔爸湊住B仔, 好擔心呀~~~

B仔爸好耐無單獨湊B仔呀, 同埋B仔越大越難搞, 唔知B仔爸湊唔湊得掂B仔?!?! 本來想同同事掉week, 點知無同事得閒同我掉, 咁唯有靠B仔爸!

返工時, 兩仔爺瞓到豬的一樣......................

到11點左右打電俾B仔爸, 聽到B仔喊到拆天咁, 好好好擔心呀! 究竟B仔爸搞唔搞得掂個仔?! B仔做乜喊得咁犀利?! 快d放工就好囉~~ (放12點)

一夠鐘即閃人呀! 返到屋企, B仔熟睡中呢~~

問B仔爸湊唔湊得掂?! 佢話無乜嘢呀!

問做乜喊得咁犀利?! 原來頭先喊係扭瞓覺! B仔扭得好勁, 抱住又唔瞓, 要一邊抱一邊行, 行咗十幾分鐘B仔至瞓得着!

B仔媽返到屋企無幾耐, B仔就醒, B仔爸出咗去整d嘢~~ B仔媽無時間煲粥仔, 唯有食住糊仔先~~

B仔, 你睇下你食到幾樣衰~~~ haha......

B仔連食嘢都無時停架~~ 咁點算?! B仔媽開咗之前買嘅ABC碟佢睇住黎食, 當堂定晒, 淨係望住電視同挈大口食!

好勁呀!!! 食咗大半碗湯碗嘅糊仔呀~~~~~~~~ (B仔媽用7安奶黎開糊仔)

抺乾淨個嘴仔, 仍然睇緊電視!!! 叫佢都唔理B仔媽呀!!!

B仔爸好好呀~~ B仔凌晨5點嘈食奶, B仔爸自動波去開奶兼餵奶, 仲要換埋尿片呀! 等B仔媽可以瞓下~~

夜晚去咗沙田食飯, 同B仔爺爺慶父親節! B仔仍然嫲嫲一抱就變面 =.="""

提早慶公公節

13.6.2008

點解係公公節, 因為B仔媽嘅爸爸升級做咗公公麻~~ 父親節咪變咗公公節囉~~

今晚約咗公公、婆婆、舅父仔同未來舅母MING姐姐去咗上水食日本菜 (青森), 慶祝公公節啊~~~ 但係B仔爸公司食飯, 佢又唔早講, 約好晒佢至講, 所以唔理B仔爸啦~~

叫咗好多嘢食呀~~ 好味! 好第呀~~~

仲有.............

要多謝舅父仔呀! 因為係舅父仔埋單架~~~ hoho.............................

公公節, B仔媽掛住食, B仔唔記得同公公影相呀~~~

好忙嘅B仔呀~~

12.6.2008

B仔媽放工返咗婆婆度睇B仔~~

依家好難同B仔影到靚相呀~~

一係掛住睇電視~~~

掛住玩~~~

掛住食~~~ (食緊白方包)

鍾意玩電話, 一俾佢聽IQ博士(日文版)首歌就定晒, 跟住就搶電話!

成日都古靈精怪咁~~~~

B仔, 你食完飽飽未抺嘴呀?!?!