18 Sept 2007
第九日大o既B仔終於係洗完白白之後甩臍帶!
呢舊咁o既嘢黐係B仔個肚臍度都幾恐佈~~ 尤其是係甩與唔甩之間時, 真係呢~~~ 
家陣甩咗就清潔方便!
本來想留返呢舊咁核突o既臍帶俾B仔大個時睇下, 但係俾媽咪同張先生反對! 話唔衛生喎~~ 所以影張相就算!
2007年9月29日 星期六
爹哋洗白白 ~~ 失敗篇
14 Sept 2007
張B仔第五日人仔, 係媽咪(即係B仔婆婆)從旁指導下, 張先生第一次幫B仔沖涼, 不過最後都失敗咗! 點解?!
張先生一開始幫B仔洗面仔, 面仔都未洗完, 張先生自己本人就已經好似洗完面咁, 成頭大汗! 佢驚d汗滴落B仔度, 結果就俾返媽咪同B仔沖涼洗頭!
2007年9月28日 星期五
第四日大o既B仔
13 Sept 2007
今日我要出院啦~~ 無得再留啦~~ 但今朝見咗B仔o既兒科醫生, 佢話報告最快要聽日至有, 報告結果無問題最快聽日至出得院! 唉...... 真係要留底B仔自己添!
出院時真係唔捨得B仔, 唉.................
三點幾就同張先生返到屋企, 媽咪已係屋企煮定飯, 煲定水俾我沖涼!
到五點幾, 張先生突然同我地講, B仔出得院啦~~ 當時都唔知佢講笑定講真, 但佢個樣又好認真, 佢話係真, 跟住咋咋臨同媽咪出廣華接B仔返屋企! 我就睇火煲水俾B仔沖涼! 聽到B仔出院o既消息, 真係全家都興奮呀!
八點幾B仔至返到屋企, 返到屋企第一件事就梗係黎個白白豬先啦~~
早知B仔今日出得院, 我就係醫院hea到五點幾至走啦~~ 唔駛張先生走來走去咁辛苦啦!
由入院至出院, 張先生都好辛苦, 等生時又係醫院度一齊等, 入咗院又要屋企醫院四圍走, 依家出院啦~~ 張先生唔駛再左"滕"右"滕"啦~~
第三日大o既B仔
12 Sept 2007
張B仔仲係兒科, 朝早十一點半同張先生去咗見兒科醫生, 佢話仲未驗到B仔塊面個d係乜, 要等報告返至出得院!
今日B仔o既面黃指數合格, 唔駛再照燈, 面仔d一撻撻到好返好多, 但就仍然係個箱入面! 光禿禿淨係包條片o既B仔, 俾人困係箱入面, 又未知幾時至出得院, 心痛o既媽媽又忍唔住喊!
唉........ 我都知坐月o既女人唔可以喊, 有人話第時會眼矇, 又有人話第時會係咁流眼淚! 但見到個仔好似好可憐咁, 真係控制唔住呢~~
下晝張爹哋去咗餵B仔食奶, 係佢o既第一次呢~~ 佢話B仔單眼啤住佢! haha... 佢又話唔識得掃風, 所以餵完就交返俾姑娘掃!
到探病時間, 同張先生一齊去睇B仔, 佢終於唔洗係個箱入面, 瞓係床仔度, 但就騻咗部check心跳o既機~~
餵奶時間, 去咗餵B仔食奶, 佢終於打開眼仔四圍look啦~~ 第一次見B仔開晒兩隻眼仔呢~~ 好開心!
本來今日就出院o既我, 係朝早醫生巡房時同醫生講可否留多一日, 好彩醫生都好好, 肯俾我留多一日, 唔駛B仔自己係醫院! 希望B仔聽日可以一齊出院就好啦!
第二日大o既B仔
11 Sept 2007
張B仔出世塊面仔有一達達黃色o既嘢係面仔, 到第二日大變到紅卜卜, 經兒科醫生睇過之後, 加上面仔黃要照燈, 夜晚六點幾就俾人送咗去兒科!
兒科醫生黎問我之前有無患過咩病, 身體有無咩唔妥, 又問有無患過性病...... (心諗: 我不知幾咁健康!) 又話暫時未能確定佢面仔個d係乜, 於是要去兒科種菌觀察!
之但係佢一連串o既問題, 再加上佢o既回應, 真係搞到我好擔心個仔, 打電同張先生講, 喊過不停呢~~
之後同張先生一齊陪B仔去兒科, 但去到門口唔俾入, 唯有係門口等! 等咗一陣我地就入去睇B仔, 見佢係個箱入面照緊燈, 隻手又拿住支嘢, 問姑娘原來個支嘢係幫助打抗生素!
唉................ 見到B仔咁o既樣, 咁細個就俾人插支嘢係手仔度, 真係好心痛! 又忍唔住喊過不停! 張先生都辛苦, 又要擔心B仔, 又要安慰我!
晚上沒有B仔係身邊o既我, 就叫咗姑娘教我用奶泵, 於是泵咗半安初乳, 第二日一早拎去俾B仔做早餐!
小寶寶出世記(下)
10 Sept 2007
由半夜12點打後, d陣痛越黎越勁, 3、4分鐘痛一次, 都唔係咁頂得住, 姑娘就俾咗"笑"氣我聞, 初初係咁識點用, 用咗等於無用, 一樣咁痛, 後來經姑娘指點過就識得點用, 就用d咁啦~~ 雖然都係痛!
到3點15分至穿水, 真係好突然咁 "her" 一聲, 成埋水湧出黎! 個刻好驚啦~~咪大聲叫姑娘! 幾個姑娘走過黎睇咩事!
到4點幾, 個醫生姐姐又黎檢查, 話開到8度, 又叫我試下用力痾下, 隔咗陣就推咗我入產房! 跟住老公就入黎陪產!
無耐隔離床個孕婦都推咗入黎, 點知人地五點幾就生咗! 我就仍在博命中!
開咗十度o既我, 陣痛都唔算密, 2-3分鐘至大痛一次, 真係深呼吸都抵擋唔住呀! 係咁吸"笑"氣, 吸到wing wing地添呀~~
個助產士係咁叫我出力痾, 查實都好出力架啦~~ 之但係唔夠長氣呢~~ 初初又唔識點運氣! 個助產士見我痾極都唔得, 就話再痾唔出就要叫醫生吸或者箝出黎! 聽到佢講呢句, 自己又痾唔出, 真係想放棄!
之後又痾幾次, 都係痾唔出, 個助產士又話就算醫生吸或箝出黎, 你都一樣要用力痾, 一樣要運氣架~~ 痛到咩都理唔到o既我, 心諗: 吸或箝出黎都係一樣靠自己, 咁駛乜吸或箝出黎遮, 分分鐘影響到張B仔.
於是, 一於靠自己, 每當陣痛黎時, 張先生就話黎啦黎啦準備啦出力d呀, 我就再用力d, 啖氣吸深d, 臨尾兩次心裡面係咁叫住張B仔、張B仔, 呢股動力真係強勁, 張B仔終於痾得佢出, 之但係一痾出黎, 個助產士係咁叫我吹爉燭, 唔好痾住, 個下嘢真係幾難頂! 真係好難忍!
我就死忍難忍, 係咁吹爉燭, 係咁話忍唔住啦! 而張先生又陪我一齊吹爉燭, 個助產士就同其他姑娘係度執"架撐", 雖然佢地都好快手, 但係對於一個快將忍唔住o既人黎講, 都叫做耐, haha......
終於痾得o既時候, 好順暢地, 一個成身紅紅地色喊到拆天o既張B仔係六點幾出世啦~~
姑娘第一時間抱俾我問我仔定女, 跟住包好就俾我抱下仍然喊到拆天o既張B仔! 但實在太攰啦~~ 大拿拿成30個鐘無瞓過o既我, 同姑娘講: 我唔抱啦! 好攰!
於是姑娘就俾咗張先生抱, 好奇怪, 張先生一抱住張B仔, 佢竟然收晒聲! 唔通怕咗爹哋?!
之後助產士就幫我推個胎盤出黎, 跟住聯線! 原來聯線都痛架喎~~ 俾佢剪返而無乜感覺! 搞下搞下都成八點幾至上病房呢~~
事後張先生同我講知我生得好辛苦, 同埋睇住張B仔出世感動到流淚呢~~
所以呢~~ 有得老公陪產一定要佢陪, 等佢知老婆生仔係幾咁辛苦! 同埋有老公係身邊支持自己都非常重要呢!!!
小寶寶出世記(上)
9 Sept 2007
瞓到半夜兩點, 發現做乜濕濕地, 於是衝去廁所睇下發生咩事?! 唔係見紅, 又唔係穿水, 發現好多分泌, 之後嘈醒張先生話佢知, 大家都猶豫去唔去醫院, 因為不嬲都有分泌, 但又不至於成條底底都濕晒!
再隔一陣, 又一大堆分泌, 於是張先生去泊架車係留下, 以備一有動靜就即刻行動! 期間都間歇性多分泌, 依然無見紅, 無穿水, 又無肚痛, 又唔係桂花糕物體, 但又好似唔多對路, 所以3點幾都決定起行去醫院!
4點左右出到旺角, 肚仔餓, 去食咗碗豬扒雞翼米線, 填下個肚至入院! 估唔到臨生前食o既嘢, 並唔係自己鍾意食o既嘢!
4點46分入院, 入到去就去咗待產房檢查, 朝日六點肚子開始微痛, 醫生黎檢查時話開咗2度!
係待產房時, 瞓係斜對面有位孕婦, 佢痛到叫到依依牙牙, 成個待產房都聽到佢叫, 佢係咁索"笑"氣都痛到話唔生, 又叫亞媽救命, 幾位姑娘都建議佢打止痛針, 但佢又唔肯打, 但就係咁係待產房又喊又叫, 又話想見老公......
啱啱入院見到咁o既情形o既我, 本來唔驚o既我, 突然變到好驚, 係咪真係咁痛?! 係咪痛到咁恐佈?! 突然好想張先生係身邊, 睇見個孕婦咁, 真係忍唔住喊咗出黎! 係待產房已經夠孤獨, 要孤身作戰, 遇着呢d叫生叫死o既孕婦, 真係好影響到其他待產o既孕婦o既心情呢~~~
觀察咗一輪就俾人送咗上婦科病房. 到夜晚七八點左右, 叫姑娘幫我睇下開到幾度, 結果仍然係2度! 聽到無進步過, 真係............ 
於是問姑娘可唔可以去坐波波, 姑娘又好好, 幫我問待產房個邊, 因為要有床位至可以落去坐! 落到去檢查一輪就去坐波, 坐到11點幾, 痛得勁咗, 檢查時已開到5度, 坐波波果然有效!
2007年9月21日 星期五
萬眾期待
萬眾期待o既張B仔終於係9月10日朝早出世啦~~
大家覺得佢會早出世時佢就唔早俾你睇, 諗住911摧生, 點知佢就提早一日出黎! 呢個寶寶真係呢~~
佢出世時有3.49kg, 仲以為佢足晒月會有成8磅, 原來d重量都係留返俾我!
Day 1
Day 2
Day 3 去咗兒科, 所以無影到相!
Day 4
Day 5
Day 6
Day 7
Day 8
Day 9
Day 10
Day 11
Day 12
張B仔呢12日以黎個樣變化都好大! 越大越似張先生, 成個餅印咁, 得個鼻似我!
自出院以黎, 真係難頂, 唔係張B仔難湊, 其實我都唔駛點湊, 因為日頭有媽咪幫手, 夜晚就有張先生! haha......
難頂o既係, 成對小腿都痕到爆炸~~ 用金銀花藤煲水洗腳又唔掂! 睇第一個醫生, 話係胎毒, 但食咗藥, 查埋藥膏都唔多掂, 連腳板底都痕埋一份! 跟住去咗睇第二個醫生, 話係敏感, 食咗藥, 呢兩日好返好多, 雖然仲有少少痕, 都叫做有返d心情! 所以咁耐都無update blog就係咁解呢~~~
2007年9月7日 星期五
悶到爆炸o既日子
7 Sept 2007
眾人都緊張小寶寶究竟出世未呢?! 仲未?! 咁幾時呀?! 小寶寶就依然闊佬懶理, 繼續係巨肚入面食同瞓, haha...... 孕婦放咗剛剛好兩個禮拜假, 開頭個兩三日都易過, 因為好忙, 但之後o既日子, 一日比一日悶, 唉...... 真難頂! 都係返工好, 雖然返工唔忙, 但起碼有d人見下, 傾下計, 開開心心又一day!
張先生都開始放假啦~~ 兩個人又係得個悶字, 行又唔行得遠, 本來今日想去沙田睇<戀愛大爆髮>, 正當行去火車站搭車時, 又打消念頭! 因為大家都擔心, 小寶寶中途或者睇緊戲時作動咪大濟!
結果係屋企附近閒逛, 食個下午茶, 買咗套<我愛蘿霸>返屋企睇!
<我愛蘿霸>好好笑! 笑到我同張先生丫~~ haha....... 
之前係網上面買咗個度高o既小玩意, 今日終於收到貨啦~~ 好靚呀~~ 唔知小寶寶出世時有幾高呢?! 
2007年9月5日 星期三
好多BB陸陸續續出世啦~~
最近好多媽媽o既BB都陸陸續續咁出世呀! 真係高興呀~~祝你地o既BB健健康康! 快高長大! 
但點解小寶寶你仲唔願出世呀?! 係咪係個巨肚入面好食好住, 舒服得濟, 你唔記得咗自己都要出世呀?! 
39週產檢
3 Sept 2007
今朝去咗廣華產檢, 其實以廣華計o既預產期, 小寶寶今日已經40週啦~~ 張醫生個度已經無返去產檢啦! 因為檢過幾次都係咁, 好似無乜意思, 同埋次次都等得太耐啦~~ 所以都係淨係去廣華檢算囉!
十點鐘去到, 已經好多孕婦! 39週o既孕婦成179磅, 勁呀! 比起38週時磅(當時176磅), 重咗大拿拿3磅呀!!! 實在太恐佈啦!
過去一星期都要幫小寶寶計住每日郁第十下係幾點, 呢個就係佢郁動時間啦~~ 每日都要o衣o衣哦哦提小寶寶仲有幾次至合格(即係郁第十次), 佢唔覺煩, 我自己都覺煩! 但唔數又唔得, 12小時內郁唔夠十次就要入院呢~~~~~~
等咗個幾鐘至入房見醫生, 又係聽下心跳同埋度下肚皮! 問咗醫生, 今日係小寶寶預產期, 但仍然未出世, 咁點算?! 醫生就幫我約時間, 若小寶寶今個星期仲唔願出世, 下星期一就要入院, 星期二就要催生啦~~
醫生仲俾咗份引產資料我睇, 叫我睇下............
唔知到時會點o既呢?! 有點兒緊張添~~~~~
問咗醫生, 過咗40週會唔會驚胎盤老化?! 佢話42週前小寶寶出世就無問題! 臨走前, 醫生又寫紙要我入院聽小寶寶心跳, 上個禮拜至聽完, 又要聽?! 醫生話聽心跳都知胎盤有無老化喎! 都唔知係咪?! 唯有入院聽下!
駁晒機, 瞓咗係床, 在心中叫小寶寶生生性性, 唔好好似上次咁頭半個鐘聽得唔多好, 搞到要聽多半個鐘, 因為佢媽媽我今朝食咗個飽咋, 肚仔好餓~~ 瞓係度無耐就心知不妙, 因為佢靜如止水呀!
好彩有個經驗老到o既姑娘走黎睇下, 話小寶寶想瞓喎~~ 我就即刻要求坐係度聽, 因為我瞓係度, 佢就瞓架啦! 隔離床媽媽即刻好羨慕咁同我講: 你就好啦, 你瞓時佢就瞓, 我個b每晚唔踢佢半粒鐘都唔駛止意瞓到呀!
唉.... 我都想我個小寶寶活躍d, 因為佢實在太懶啦~~ (我覺得)
今次小寶寶都好合作, 姑娘都話個report好靚! 咁我都安心d~~ 等埋醫生睇完報告無問題就走得!
2007年9月4日 星期二
張先生送俾小寶寶o既第一份禮物
2 Setp 2007
今朝同張先生、媽咪仲有亞婆飲茶, 亞婆之前幫我買咗十幾扎樹葉俾我坐月時沖涼用, 但唔知個d係咩葉(無問亞婆, 媽咪又唔記得飲完茶去咗吉之島買床單俾小寶寶! 都唔知點解d bb床單無乜選擇, 款式黎黎去去都係個d, 都唔出下d新款既~~
), 不過想當年媽咪坐月都係沖呢d葉涼呢~~ d葉好清香架!!!
之前同張先生係度研究, 究竟爭d咩?! 小寶寶仲未肯出世, 我地o既結論係, 張先生仲未買第一份禮物俾小寶寶! haha...... 
結果, 張先生同我一樣, 買俾小寶寶o既第一份禮物係玩具! haha...... 呢個玩具我地睇中咗好耐架啦~~ 上次BB展已睇中! 但係太貴啦! 原價成699蚊, 唔捨得! 今次係吉之島bb用品展睇見, 折咗五百幾蚊, 雖然都好貴, 但張先生諗唔到買咩送俾小寶寶, 所以就買咗呢個俾小寶寶玩! 買完佢自己都肉赤, haha...... 
訂閱：
意見 (Atom)