除夕，張先生要返工，唯有從電話中學他一起倒數......原本打算去同事屋企玩，點知今日病情惡化，勁咳，為免影響佢地嘅健康，都係不去為妙，所以留係屋企，睇咗兩套電影，<童夢>同埋<魔法嬌妻>，兩套都唔好睇，前者就太誇張，後者就太無厘特別，一個字~~ '悶' 呀！但兩套相比之下，<童夢>好睇過<魔法嬌妻>，起碼講感情個部份都ok~~~~~
夜晚，電視無乜好節目睇，無綫依然做埋晒d無聊音樂節目，亞視就做姻脂扣，都係不感興趣的節目！幸好明珠做 '仙樂飄飄處處聞' ，終算有套好戲睇，消磨一下時間，同埋d歌好好聽呢~~
今朝一早出咗香港個邊，因為應承咗碧瑜做佢嘅考試model，點知佢搞錯咗時間，本來係約咗十一點鐘到達中環，點知十點左右收到佢嘅來電，告訴我佢搞錯咗時間，應該係十點，十一點係考筆試，但當時仍在屯門搭緊巴士出去~~最後我就去咗銅鑼灣，而佢就搵咗同事幫手做佢嘅model呢~~佢真係烏龍啦！haha......
之前買咗張512M嘅ScanDisk，但已經壞第二次，第一次壞，就係去吉隆坡旅行第一日就壞咗，幸好個次帶埋其他Memory Stick去咋，如果唔係一張相都影唔到，第二次就係早兩個禮拜，幸好transfer咗d相去電腦入面！今日趁住過香港個邊，於是自己去咗銅鑼灣換，我搵咗個女staff幫我，當佢問我用邊隻相機時，我咪攞出黎俾佢睇，點知坐係隔離個個男staff態度不太有善(樣子輕佻的)，話 ' 你部機都成三四年，張咭嘅速度咁快，要upgrade你部機先得 '，咁我咪問佢點upgrade，佢就話 '你去門巿問下，再唔係咪上去Canon個網度download囉 '，今時今日咁嘅服務態度點得架！！！=.='
今日與張先生上咗深圳行街、買書、揼骨同食嘢！去咗書城，好開心，個度好多烹飪書，價錢平，且印刷都唔差呢，但只買得兩本，因為俾張先生阻止呢~~
今日不太good luck，揼骨時頭一個鐘係腳底按摩，但由於人太多(可能新假期介紹過又識逢假期，勁多香港人去)，等咗差不多成個鐘都未有師傅到來，自己肚子又餓，叫咗個花生多士成半個鐘都未到，搞到心情極不高興，要搵經理入黎，多士到咗，但唔知係咪上面d花生醬好貴？塊多士好似無塗過花生醬似d，只得稀薄一層，肚子餓，唯有齋啃個塊 '齋多士' ，幸好個師傅手勢都不錯，如果唔係，恐怕心情會更差呢~~ 不過我地已決定以後唔去呢間揼骨(Black List)！
揼完骨，去咗食神滔滔介紹其中一間餐館度食晩飯，但滔滔推介o既白切雞、燒生蠔都沽淸，叫乜無乜，真的不太開心呢 (最衰揼骨個度，如果唔係白白等咗成個鐘，早d去到應該都未沽清~~)真的想一走了之，去第二間食就算！不過既然一場去到，無就食其他餸，幸好都唔差o既~~
今日與張先生交換聖誕禮物，他叫我摷他的褸袋，但摷勻晒都沒有，他告訴我沒有買聖誕禮物俾我，真的非常失望，但失望之際，張先生的禮物終於出現係我睇前，又係SWARPVSKI o既水晶，今次係一個天使掛飾！收到其實都開心，總好過無，但未如我所願~~其實我好想收到鑽石耳環或介指呢~~不過佢話貴，所以...... =.= (但水晶都唔見得平~~或者送個Precious Moment公仔俾我仲好呢！)
而我就買咗件衫同一個張先生之前睇中但唔捨得買俾自己o既腰bag送俾佢，佢當然開心啦~~haha......
今日係聖誕節，亦是媽咪生日嘅大日子，所以整咗個生日蛋糕送予她呢~~爸爸、媽咪同埋細佬都話好味，真係好開心呢~~~~~ ^o^
整完蛋糕，之後焗咗d薑餅應下節，味道都尚算ok，很重玉桂粉嘅味道，但如果用新鮮薑可能會更加香、更加正呢(因只用咗薑粉)！好奇怪，Pizza竟然鍾意食，反而對海綿蛋糕無興趣喎！
平安夜四圍都係人，見到人山人海都覺得好煩！
平安夜要返工，完全無mood做嘢，如果唔駛返就好了......中午放咗工去咗旺角新世紀睇 ，整體上都覺得套戲OK嘅，而且有點誇張，但描寫King Kong對女主角Ann的感情，確實令人感動~~覺得女主角都幾靚女，而King Kong對住女主角時個樣就好可愛呢~~
晚上沒有出外，與爸爸、媽咪、張先生、細佬同埋佢女友去咗打邊爐慶祝媽咪生日，因為張先生聽日要返工，所以提早同媽咪慶祝~~ ^o^
唔知點解，無端端左眼眼線位生咗粒'眼挑針'，尋晚開始發起，已經痛痛地，但到今日連眨眼都覺得痛 >.< 搞到個眼袋腫腫地，同埋隻眼好攰呢~~~~~
今日Department係hall度搞Christmas Party，今次係第一次去hall個邊呢~~Party其中一個環節就係抽獎，可惜沒我份，haha.....自從係機場保安做得唔太開心嘅時期開始至今，呢幾年都無乜抽獎運lu...唔知係咪有影響嘅呢？而係party最後嘅環節--交換禮物，就抽中May送嘅Hello Kitty朱古力曲奇，個盒都幾靚㗎，不過就有同事話我知d餅就唔係咁好食呢，要試過先知係真唔係真呢！Anyway呢份係我收到嘅第四份聖誕禮物！
Party係三點半左右結束，跟住就放工，尋日做冬又有得放早，今日又有得放早，真係好開心呢！之後與張先生去咗行街，俾d hints佢買聖誕禮物俾我，但有d實在太貴了~~寧願他買第二d禮物俾我呢~~ ^o^
今朝Jean突然走嚟我度，送咗份聖誕禮物俾我，係Winnie the Pool嘅檸檬糖，個盒仔都好得意，可以用嚟做裝飾！呢份係我收到嘅第三份聖誕禮物呢！
早排張先生send咗封電郵俾我，d內容好搞笑，我一邊睇一邊笑，因為呢d說話"似曾相識"，好似同張先生講過呢d說話，哈哈...
女友和其他異性約會，男友不滿時，女人會話：
1. 我同佢只係朋友，就算佢對我有意思都唔關我事，識朋友都無自由，大男人！(發皮四)
2. 你唔信我！(發皮四)
男友和其他異性約會，女友不滿時，男人會話：
我同佢只係…….(未講完)女人：係乜都唔得，總之已後唔準見佢！你地D男人無個信得過！(發皮四)
你唔信我！ 女人：係呀！你地D男人無個信得過！
女友和一班同性朋友約會時，女人會話：我地成班女人，係唔好去啦，我走就call你黎接我啦！
男友和一班同性朋友約會時，男人會話：我地成班男人……..
(未講完)
女人：你成班豬朋狗友，古古惑惑，唔同我去你都唔準去！
男友同女友及她的朋友一齊食飯，結賬時，女人：等我地黎啦！跟手比張單男友，事後會話：呢D野你要識做先得ga，張單黎到郁都唔郁，我好無面ga!
女友同男友及他的朋友一齊食飯，結賬時由男友比錢，女人：咁鐘意爭比錢，發左達呀？又話儲錢，都唔知幾時先儲到！(發皮四)
女友要男人買LV、PRADA、GUCCI、鑽石等等，男人話：我地宜家儲緊錢…….
(未講完)
女人：你又話會照顧我，宜家叫你買小小野就推三推四！(發皮四)
男人要(用自己錢)買野，如音響、表等等，女人：成日買D無為野，都唔知幾時先儲到錢！(發皮四)
尋晚整咗個8"的美式芝士蛋糕，今次焗得好靚，表面焗得無以前焗個d咁燶，金黃色的，但很失敗地，因時間關係，當我將個蛋糕移往枱面時，因為個蛋糕仍未凍，所以仍林林的，拿起蛋糕時，中間突然裂開咗少少，餅底有d餅碎散咗少少，拿拿臨放好個蛋糕，抺些creme在表面，放入雪櫃雪返實，好在今朝攞出黎時仍是靚靚的，鬆一口氣~~ 不過唔記得影返張相！
到三點三嘅時候，Linco負責切蛋糕，切蛋糕時聞到陣陣芝士香味，然後將蛋糕拿予各同事分享，他們的回應都是"好好味"、"幾時再整"、"可以開舖賣"，聽到他們都鍾意食真係好開心呢~~他們不停咁讚我自己都feel到自己塊面熱熱地呢~~整嘢食最開心就係有人欣賞，同埋見到食嘅人食得開心，自己就更加開心！haha...可惜唔夠分俾全部同事分享啦！
最尷尬就係竟然忘記攞一件俾Jean食，係走廊見到她才醒起她好似沒有在人堆中出現過，結果就係淨返最後一件（已被Cindy book咗）度切一半俾Jean，真係極度唔好意思同埋好尷尬呢~~ =.= 好在Cindy都體諒我嘅處境...唯有遲些再整蛋糕請他們食，不過就要記住留俾Jean同Cindy，haha...
平靜咗幾天嘅抗議活動，在今日開始進一步的抗爭，從電視新聞中，看到香港警察與南韓農民的對峙，覺得場面很恐怖呢~~南韓農民真的很團結，亦非常之有計劃，分批行事，令香港警察防不勝防，得兩三排的人牆又怎能對付到一大群的抗爭者？真戥那班警察辛苦、危險呢！今晚原本與張先生及他一位當警察的好朋友食晚飯，但因為他要做支援，所以晚飯要臨時取消！慶幸當年伯母反對張先生加入警隊，否則這幾天一定會擔心死我呢~~~~~
但從那些農民的角度看，他們真的很慘，世貿令到他們不能維持生計，有些向自己政府借貸渡日，可惜每年只償還到利息；有些每月只能賺到港幣百幾蚊，要養活一家大細；有些棄農為娼，以肉體賺取金錢...他們是肯用勞力去賺錢，但很可惜，因為外來進口的農產品較本地便宜，本地貨卻無人問津，嚴重影響生計，難怪他們會如此不顧自己的生命，拼死也要強烈反對世貿！
香港人真的是好幸福，暫未受到世貿所帶來的負面影響，有工作能力嘅繼續領取綜緩唔駛做，富有嘅就越來越富有，貧窮嘅就越來越貧窮......
尋晚與幾位舊同事去打邊爐，有英姐兩公婆、卿姐、Phoebe同亞仔Anson、May Wong一家，係入去酒樓門前，自己實在太論盡了，被門前個一級click一click，成個人爬咗係度，雙膝跪地，好在無雙手插袋，隻手撐一撐都無咁傷，哈哈...好在唔係好多人係度，但都無人過黎扶我，有些香港人實在太冷漠了~~ =.=
今晚，與亞婆去咗美心食飯，慶祝她生日！時間過得真係快，睇住表弟們由bb仔到依家都已經讀中四了，更覺得自己年紀大啦，哈哈，說不定下次再見面時已高過我了...
今晚終於有機會借d以問下媽咪如果我同張先生結婚會收幾多禮金，她給我的答案，其實我都一早已估到，就係 '我唔識呢d嘢㗎喎，唔知喎！' 這就是她給予我的答案！唉~~ >.< 到我已鼓起勇氣對她說我和張先生打算出年結婚時，她又忙於 '煲粥'...... 唯有再找個機會再講吧！ -.- #
今晚放工後去咗做facial，順便問下碧瑜餘下的course能否轉予我做facial，點知就出事...
開始做facial時，有位staff介紹我做另一個facial，但要扣我原先的兩次，本着試下無訪，所以一試，試完之後又俾個staff說一輪，其實自己都唔想加錢轉，又不是便宜，但個位staff真係好煩，聽下聽下加多五千幾蚊有30次，分六期都係每月五百蚊有找，都算啦~~一問到碧瑜個d可否轉埋落去我張單度，點知個staff話要join 60次個course先可以轉，真係諗咗好耐，大拿拿每月要俾成七百五十蚊，仲要12個月分期，真的不太想，但又諗唔到點好，所以......
之後，悶悶不樂咁，又咁啱得咁橋，張先生打電俾我，我知道若將此事告訴他一定會俾佢話，但唔講我又唔開心，最後都告訴他，他都講得啱，成日為人地諗而唔為自己諗，個四千蚊都係碧瑜嘅遮，反而自己俾多咁多錢出去，幫人地諗埋......
今次真係俾碧瑜玩死，以後都係唔好同佢一齊試呢類嘢~~見過鬼仲唔怕黑咩~~~~~
昨晚，與Olive入天水圍探Carmen，她在十二月一日生了一位千金，BB女叫巧妍，很好聽的名字，起初還以為是Carmen改的，但原來是由爸爸改的，估唔到雄哥都可以改到一個咁好聽的名！Haha......
BB個樣好似哥哥俊軒細個的時候，她很乖，好少喊，沒有奶蘇味，有很清香既bb皂液味，食飽眼仔睩睩，睩睩下又瞓覺，最好就係哥哥嘈嘈閉，她仍能睡得甜甜的！
與Carmen都相識了十多年了，由中二開始認識，在朋友當中，她是第一位結婚生bb的朋友，大家都沒料到第一位出嫁的會是她，仲要係奉子成婚個種。到現在她已有兩名仔女，生活簡簡單單，湊下仔仔返學，間中在琴行返下part-time，老公又鍚她，多麼簡簡單單、幸幸福福的生活啊！而我地就仍然未嫁得出呢~~ haha......
好耐沒有入去天水圍，記得上次去探Carmen的時候都已是大約兩年前的事了。天水圍發展得非常快，又天瑞村、天逸村、天耀村、天悅村、天......多到都唔知邊度打邊度，又人生路不熟，四圍向路人甲乙丙丁問路，而Olive的遭遇與我一樣，大家都好不容易才到達她屋企呢~~haha...
今日是跑馬日，又是留在張先生屋企陪他睇馬仔，雖然悶就悶d，但其實都幾有趣，估下每場會跑出那幾隻馬，睇下自己的眼光，嬴咗張先生更加開心呢，他左度右度，攪盡腦汁度出黎最後都輸，反而自己馮直覺，不用費神都掂過他呢~~我就純粹娛樂，而他就為了賭，雖然他每次都不會賭太多，最多兩三百蚊，今日返屋企前已去咗投注站買，另外又入咗錢落投注戶口，第一場羸咗幾百蚊，他在第二場就落重注(大拿拿五百幾蚊，對我黎講用係呢方面係好多架啦)，俾我發現，於是他說買少d，但都買咗三百幾蚊，轉過頭係我面前又買多百幾蚊，即是都係投注咗五百幾蚊，好嬲呢~~ >.< # 我唔介意陪他睇馬仔，同埋又唔係唔俾他買，但都要適可而止，不可太過份架......
完全當我無到，買咗就算啦，仲要再買，雖然係之前羸咗，最後又咪只會連本都輸埋...每逢跑馬日都幾百貢獻俾馬會，每星期跑兩日，每個月八日，貢獻出去的錢都幾千蚊，到頭來乜都無，都唔明點解d人仍然咁鍾意買，用d錢買件衫都起碼有件實物係度，可以著上身！ =.=
昨日放工後，入東涌探亞Ling，同英姐一齊飲下午茶，之後上咗Ling屋企教她整果撻呢~~她很開心呢，因為果撻既容易整，又好味，其實煮嘢食嘅人最享受煮嘅過程，同埋品嚐者嘅回應。品嚐嘅人有好評語，煮食嘅人就覺得好開心、好滿足、好有成功感！真的很喜歡這種感覺呢~~~~~見到Ling今日充滿成功感嘅開心，真的好開心呢~~特別是能與朋友一齊整，互相切磋，更加開心呢，同埋唔駛自己一個整咁悶！
我都好希望有一天張先生同我一齊整甜品呢，那種感覺應該會好溫馨吧！(但以張先生的為人，應該無乜可能會發生吧！)
與朗朗玩咗差不多一個下晝，小朋友嘅精力真係充沛，真係唔夠佢黎，好攰，哈哈...真戥亞Ling辛苦！湊細路真係要好多精力、體力呀！應該係一個不錯嘅另類減肥法呀，哈哈...！睇住朗朗由細細個嘅bb，直到依家都兩歲幾了，下個月重開始讀書添，識講好多嘢，嘴gel gel，成日笑騎騎，最鍾意他古靈精怪的模樣，真係好得人喜歡呢~~雖然好少見他，但他仍然記得我呢個詩敏姐姐呀！
我覺得朗朗係一個好堅強嘅bb，要面對定期嘅抽血、輸血，每馮到醫院入那間抽血的房間他便會喊，但一抽完血，支針一取出來，他便會收聲，並不像其他小朋友哭過不停，但作為父母嘅，尤其是媽媽，眼見自己嘅寶寶受著這些皮肉之痛，真的寧願被吉針嘅係自己呢~~希望朗朗早日康復啦！
至於朗朗嘅媽咪~~亞Ling，她經常讓自己背著重重的擔子，這實在給自己太大太大壓力呢！好希望她懂得放鬆些，有時間的話可以做些能令自己開心嘅事，抒壓一下，就好似今日整果撻咁，多麼的快樂~~
快樂是自己去安排、自己去製造、自己去拿著它、是與喜歡的人分享！
晚上張先生告訴我蔡仔就快做爸爸啦，係bb女，聽到呢個消息，真的替人家開心呢！哈哈......這陣子身邊都幾多人生女，自己認識嘅都有Carmen、蔡仔，仲有舊公司都有幾位同事係陀住bb女呢！
昨晚，與張先生、亞龍同埋佢女友Catherine係上水打邊爐，張先生話亞龍會同佢女友求婚，所以會遲些才到，我問張先生，亞龍點同Catherine求婚，張先生話亞龍配合咗天時地利人和，有日亞龍同Catherine行街經過間竉物店，佢睇中咗一隻貓仔，於是亞龍係晏晝買咗個隻貓仔，等Catherine返到屋企，隻貓仔走去佢身邊，俾個surprise佢同佢求婚呢！直到佢地黎到，當然第一時間恭喜他們啦！亞龍講返Catherine話無花佢係唔會帶介指，於是佢落樓下買束花，哈哈...Catherine講得啱丫，求婚又點可缺少一束花呢~~好多女仔就是那麼享受每刻的過程、那種溫馨感覺，尤其是值得回憶時刻呢~~~~~
好幸福啊~~好羡慕啊~~ 
問張先生會點樣同我求婚，佢話本來想搵隻椰菜娃娃送俾我(因我曾經同張先生講，細個個時有隻椰菜娃娃，好得意好可愛，依家好想擁有一個，但香港無得買lu)，但搵唔到，問過亞楠都搵唔到！哈哈...估唔到張先生都有做過下嘢架喎~~
都已認識亞龍好耐lu，同張先生拍拖六年就同亞龍識咗咁耐，但佢ex-女友已唔記有多少個，佢終於肯定下來，成家立室，佢地將係五月結婚，真戥佢地高興呢！打邊爐的時候，睇見佢地兩個講起黑咪同亞拔(新成員)開心表情，真令人羡慕佢地有共同話題、喜好(因為佢女友好鍾意貓)。而我同張先生，好似都無共同喜好，我鍾意煮嘢食，佢就唔鍾意，我鍾意狗，但佢除咗馬之外，什麼動物都唔鍾意，仲叫我死心，佢係唔會養竉物的！！！ 
今日同一位朋友傾計，她說她媽咪將會收取八萬八千蚊禮金，並計劃於07年3月結緍，所以她與男朋友要係呢段時間努力儲錢呢~~唔知媽咪會收張先生幾多禮金呢？！如果她好似佢媽咪一樣收咁多的話，明年一定嫁唔出吧！
明年雙春兼潤月，結婚的情侶一定多的是，但我同張先生仍未開始籌備，所以如果要擺酒都未必會訂到酒席啊！其實心情都幾矛盾，又想擺，可以留住美好o既回憶，同埋可以有咁多親友一齊分享喜悅。但當諗到要搞好多o野，又要諗下那一日、去邊度擺、請那位親戚朋友、試禮服......咁多林林總總的事要辦，又唔太想擺，乾脆找個地方同d朋友開個party慶祝一番都幾開心o丫~~都唔知點好......唯有睇下訂唔訂到酒席啦~~~~~
今晚約o左小學同學Cathy去尖沙咀一齊食飯，因為我放五點幾，而Cathy就放6:30pm，所以有空檔，無無聊聊，於是放工由紅磡火車站行去尖東海旁，沿路行星光大道睇下近排開幕o既李小龍像，路人、遊客行到此處均舉機拍攝，我亦不例外啦(自己都幾無聊)，哈哈哈哈...不過得我自己一人去，就無得同李小龍銅像合照lu~~
可能時間倘早，兩岸都無乜燈飾睇，就算有都唔見有什麼特別~~同張先生一齊咁耐，只有兩次出去尖東睇燈飾，第一次就係拍拖無耐時，而第二次就係上年o既聖誕，就與張先生、亞楠及其女友一齊去尖沙咀睇燈飾，尖東海旁o既燈飾又唔多，只見人山人海，左擠又湧，又遇著封路，但擠在人群之中，已別無他路離開，唯有迫到尾便走都走唔切~~~~諗返起都怕怕~~~~
今年想去中環睇下個個聖誕村，好似好吸引咁，當然，唔選擇聖誕個幾日出動啦，見過鬼都拍黑lu...
