賀朋友仔牛一

8.8.2010

 

今日原本約咗一班朋友仔去赤柱沙灘賀洛洛牛一, 點知... 天氣預告話會落雨, 安全起見就取消咗! 點知... 今日天氣好到不得了呀!!! 之但係又無節目, 想去泳池游水, 但B仔又午睡, 接近四點至起身, 食得嘢黎換得衫都無乜時間玩水, 因為收5點3......

 

咁啱得咁橋, 洛媽話入元朗食金田, 問一唔一齊, 橫掂順路就一齊去Dinner~ 順便之下就買咗個thomas蛋糕賀下洛洛牛一啦~

 

入到金田, 一坐底, B仔就問: 媽咪, 澄澄呢? ...... 原來B仔仲記得長隆之旅既朋友仔澄澄無黎呀~

 

晚飯期間洛洛突然扭眼瞓, 瞓咗~ 瞓到走都未醒... 個蛋糕唯有辛苦洛媽稱返屋企自己慶祝~ 點知... 洛媽話佢屋企有個thomas蛋糕 (當時都未知我買個個都係thomas)... 仲叫我地拎返屋企食喎! 梗係唔制啦, 話明送俾洛洛麻~

 

好彩... 洛洛醒咗, 就面矇矇咁去"B仔涼粉"度問下個哥哥仔可唔可以係度切餅啦~ 個個都飽到嘔都仲要叫杯嘢黎飲下~ (唔好意思白坐丫麻~)...

 

Ryan好叻仔, 第一個唱生日歌賀洛洛~ 仲要有beat架~ 叻仔!

 

戲玉黎啦...... B仔媽叫B仔唱生日歌賀洛洛, 一副醒字行頭既模樣, 話要企係張凳上面唱喎! 好啦, 咁企係度唱啦~ 嘩... 一唱, 放聲大唱個隻... 唱ABC song喎!!!!!!!!!!! 嘩........ 爆笑到無得頂呀!!!!!!!!!!!! 唱完ABC仲要緊接唱拿手飲歌太陽伯伯, 真係.......... 全枱大人都撻晒落枱底, 笑到見牙唔見眼呀!!!!!!!!!!!!!!! B仔爸媽完全估B仔唔到, 點解個仔可以搞笑成咁呀?!?!

 

聽完歌, 就到切餅儀式... 點知... 洛洛感動到喪喊呀!!!!!!!!! (查實佢未瞓醒扭計, 我地就當佢感動得濟, WAKAKAKA)

 

洛洛喪喊, 唯有母代子切餅啦~ Ryan同B仔都好唔執輸要切餅~

 

B仔就真係爆笑啦~ 切完一撩~~ 成舊桃飛起咗, 洛媽幾驚舊桃撻咗係B仔個頭度呀! 笑爆咀啦~~~

 

是晚Dinner好開心呢~ 充滿歡笑~

 

但... 離別時, B仔扭計, 又話唔要返婆婆屋企! 做媽咪真係少D急材都搞唔掂D細呀! 坐車返婆婆度時, B仔媽又同B仔講返婆婆屋企, B仔又黎喪喊過~ B仔媽話掛住媽咪, 即B仔婆婆, 所以要返婆婆屋企睇下婆婆先, B仔陪媽咪去睇婆婆, 講咗N次呀~ 到返到婆度又黎喪喊, 唔沖涼, 唔除鞋... 好不容易至搞掂B仔 @.@

 

 

 

新生家長會

7.8.2010

 

今朝去咗學校參加新生家長會, 期間溫校懂對"生日"既分享, 十分認同! 溫校懂話點解要同小朋友慶祝生日? 其實在小朋友而言真係無乜理由! 是誰帶個小朋友黎到呢個世界? 係父母! 媽媽一生人最辛苦就係生小朋友既時候, 咁小朋友生日係應該 "敬重感恩父母". 所以學校搞生日會係"敬重感恩父母"生日會, 係會邀請生日月小朋友既父母一齊出席, 讓小朋友去考敬父母.

 

聽咗溫校懂既呢斷說話, 真係好令人反思, 小朋友生日父母親人會替他慶祝, 到長大, 就同朋友去慶祝, 會忽視與父母一齊慶祝, 都忘記咗生日既意義~

「碧濤洗衣球試用計畫」

碧濤洗衣球

 

 

 

上個月有位blog友邀請參加為期1個月的「碧濤洗衣球試用計畫」，好耐之前都有聽過介紹，當時因為價錢貴之餘，亦滿心疑惑一個洗衣球，不用洗衣粉，衣服真係會洗得乾淨?!

 

經試用後，又覺得同用咗洗衣粉洗既衫無乜分別，都乾淨，洗完既衫亦無任何味 (我沒有放柔順劑)，同埋洗衣機可以用慳水模式洗衣，確實慳咗時間同用水量!

 

 

哥哥?!?!

7.6.2010

 

唔知點解B仔最近成日話自己係哥哥?!

 

問親B仔叫咩名? 佢就答: 我係哥哥黎架!!!

 

B仔係細佬黎咋, 佢就答: 我係哥哥黎架!!! 你至係細佬呀!!!

 

咁你細佬/妹妹係邊度呀? 佢都係答: 我係哥哥黎架!!!

 

.

.

.

.

.

.

B仔間唔使仲要無啦啦指住自己個大肚DUM話: 有個BB係呢度呀! BB肚餓呀!

 

@.@

.

.

.

.

.

.

唔知個D人以為B仔媽大肚呢~ WAKAKAKAKA………………

大棠荔枝山莊

6.6.2010

 

今日見天氣唔錯, 有太陽又有風, 同B仔去咗元朗大棠荔枝山莊遊玩!

 

去到見到大魚池, 我地去咗睇人餵魚呢~ 隔離個姨姨仲俾咗d麵包同魚糧俾B仔餵魚呢~ D魚好似餓咗十年咁, 一掉D食物落去, 成堆咁湧住搶食, 場面非常恐佈呢~~~~~ >.<

 

 

B仔係度扮大力士, WAKAKAKAKA................

 

 

仲有扮牛牛...

 

 

路途中有繩網攀爬, 好動既B仔又點會放過有得俾佢擒黎擒去既機會丫~

 

 

 

 

爬完繩網, 去咗打井水...

 

 

之後去咗餵兔仔同埋山羊... 個杯仔紅蘿蔔真係發C佢呀! 大拿拿15蚊~

 

 

 

 

餵完兔仔同山羊, 四圍閒逛, 途中見到三隻駝鳥~

 

 

玩到三點幾就走, 去咗洪水橋大發飲奶茶食個Tea, d奶茶真係好香好滑呀!!!!!!! 正呀!!!!!!!!!

 

嘆完下午茶就去咗巿中心閒逛, 期間B仔扭計, 不停話要返媽咪屋企, 唔返婆婆屋企! B仔媽話B仔要返學, 媽咪要返工, B仔就話唔返學, 叫媽咪唔好返工, 不停係咁扭, 不停叫媽咪唔好返工, B仔要返媽咪屋企! 唉... 個一刻, 內心真係好難受! 難受係因為自己俾B仔既時間實在太少~

 

B仔, 過多兩個月就可以長期跟住BaBa同埋媽咪架啦~ 到時可能你會扭計要返婆婆屋企! 公公婆婆亦會非常唔慣同掛住B仔吧~

 

學校要交父子合照同埋要作首詩, 話明係父親節麻~ 作詩呢D工作就梗係交俾B仔爸搞掂~ (好彩母親節唔駛, HOHOHOHO...) 估唔到B仔爸都有少少急材, 唔駛5mins就作咗句咁既嘢出黎......

 

 

真係笑爆咀呀~~~~ XD

趣事...

22.5.2010

好耐之前聽婆婆講峻僑唔肯食粥, 俾佢食喊晒口, 話說近日學校茶點食粥, 劉老師一"畢"俾B仔, 佢即大大滴眼淚咁喊...... 但隔咗一陣就肯食粥, 可能見其他小朋友食佢又食啦~ 放學時劉老師講返俾婆婆知呢~ 自此之後, 婆婆間中午餐煲粥俾B仔食都肯食呢~

今晚B仔爸沖完涼出黎, 無着衫, B仔一望即話: E~~ BaBa唔着衫, 好肉酸呀!....... 此話一出, 笑到我地碌地呀! B仔爸仲咋咋臨去着返件衫呢~

B仔依家成隻鸚鵡咁呀~ 我地講乜佢就跟住講, 連D表情語氣都學埋, 就黎勁過扮嘢天王架啦~

潮流玩意

22.5.2010

 

最近B仔勁鍾意玩陀螺, 就係因為電視做緊爆旋陀螺吧!

 

 

B仔玩時一拉條繩, 會大叫 "果削", 初初B仔媽都唔知佢叫乜?! 還以為係自己發出既配音... 但原來... 有次係公園見D細路係度玩, 個個一拉繩時都會大叫 "果削", B仔媽才知道... 原來係術語黎! HAHAHAHA............

 

 

沒想到一個未到三歲既小朋友, 已經識得小朋友界既潮流~ HAHA... 有D媽媽唔會俾小朋友睇呢D, 但其實我都唔知俾佢睇俾佢玩呢d "潮流", 對佢黎講是好事還是壞事?!

 

依家仲要父子在家中對戰~ HAHA...

玩到癲

21.5.2010

 

今朝同B仔去M記食早餐, 遇到栢軒一家又係去M記開餐~ 栢軒大個仔咗, 無咁怕醜!

 

食過早餐就同B仔去買餸, 今晚維納斯契媽、契姐同埋翠思姐姐過黎一齊Dinner~

 

買完餸, 本來都想自己同B仔落樓下泳池玩水, 但見天氣又麻麻, 結果還是係屋企開缸水俾B仔玩下算~ 第一次係屋企開缸水俾B仔玩呢~ B仔好開心~

 

浸得耐, 見到自己隻腳浸到"CHOU"晒皮, HAHA...

 

 

係咁拍水, 拍到成廁所地下都係水~ @.@

 

 

夜晚, 契姐黎到, 兩個玩到癲咗~

 

 

趣事一則

13.5.2010

今日放工B仔媽如常打電俾婆婆同B仔, B仔今日好晏至瞓, 仲午睡中呢~~

婆婆就同B仔媽講, 今日同B仔玩時, 婆婆咬佢手指, 有兩個牙齒印係度, B仔喪喊呢~ 大大滴眼淚個隻~ 仲係度不停話: 手指穿咗窿!

Hahahaha... 婆婆邊講邊笑呢~ 又真係好搞笑呢~

這就是小朋友既天真無邪呢~

晚上食飽飯就打電俾B仔...

B仔媽: B仔, 你食咗飯未呀?

B仔: 食咗飯啦

B仔媽: 食飯開唔開心呀? 有無食餸呀?

B仔: 有食餸, 好開心

B仔媽: 食咩餸呀?

B仔: 食咗飯...... (食咗乜餸呀?) 有食菜...... 食Fish...... (有無食豬肉呀?) 有食豬肉

B仔媽: 你手指做乜穿咗窿呀?

B仔無答..... 跟住不停講陀螺對戰... 又無啦啦係度講 "哦~ 澤", 跟住又有D我聽唔明既說話... 我諗係爆旋陀螺既術語吧~

唔通B仔媽需要刨下爆旋陀螺呢套卡通片?!?!?!?!

母親節快樂

9.5.2010

 

今日係母親節, 瞓醒食過早餐, 同B仔去街巿花檔買花送俾婆婆、太婆同太嫲!

 

 

呢扎花係送俾婆婆的啊~~

 

 

下午同姨婆佢地一齊去咗藍地季紅紅食lunch~ 點知婆婆聽錯時間, B仔一家最早到, 係度呆等~

 

太婆一到, B仔就將盤花送俾太婆, 但急急腳就閃人, 都未黎得切影返張靚相 =.="""

 

 

Lunch期間, 無着尿片既B仔, 竟然唔出聲嗌去廁所, 係度賴尿...... @.@ B仔媽又忘記帶多條褲出街, 結果... 要係一千零一檔賣出口衫褲既鋪頭, 搵條啱着既褲... 多麼的有難度! 結果搵咗條紅色既女仔褲, 唯有叫老闆娘拆咗褲腳兩隻蝴蝶頂住先~

 

食完lunch一家三口一齊去咗剪髮, 跟住打算去探嫲嫲, 點知... 嫲嫲等唔切我地就去咗街, 結果無出到去~

 

剪完髮就返婆婆家, 到晚飯時間就出發去同太嫲食晚飯~ 一到酒樓就叫B仔送盤花俾太嫲, 太嫲好開心呢~

 

 

晚飯過後便回家! 今日行程非常緊湊~

與B仔媽賀媽媽節

8.5.2010

 

今日係舊同學Rachel結婚大日子, 帶咗B仔一齊去觀禮, 新娘子好靚啊~ 禮堂好大, 坐無虛席, 好犀利啊~ 祝Rachel同honey百年好合, 永結同心, 快d三年抱兩~

 

觀禮完畢, 一家三口便北上閒逛兼食晚飯! B仔第二次北上, 對上一次係返B仔媽鄉下參加堂舅父既婚宴!

 

B仔第一次坐深圳地鐵, 竟然有好心人讓位俾我同B仔坐喎! B仔坐地鐵都好開心呢~

 

 

夜晚去咗四海一家食Buffet, 一家三口慶祝媽媽節~ 由於無book位, 所以都等咗大半個鐘~ 等位中既B仔, 四圍騰, B仔媽就要人釘人跟到實一實~

 

 

呢碗魚旦餃子米線就係B仔是日晚餐! 其他... 乜都唔食!!! 第時B仔要俾錢食buffet, 一定同佢一齊去食呀! 蝕硬~

 

 

食飯期間, 有個小丑係度扭波波俾小朋友, 個條龍又長又唔郁, d大陸小朋友排完又排, 真係怕咗佢地, 但B仔又好想要喎... 到九點鐘左右, d人都走得八八九九, B仔爸就同B仔去排隊攞波波, 攞咗打劍返黎

 

 

但... B仔話係槍, 仲係咁嘭B仔爸媽, 嘭到不知幾~~ 咁HAPPY  @.@

 

 

晚飯後就坐地鐵返羅湖, 點知... 個保安叔叔話氣球唔可以帶入車站, 要沒收B仔個氣球...  =.="""  B仔當然唔開心啦~ 好彩無喊! 但過咗一陣, 個叔叔又俾返個波B仔, 但就叫B仔媽收入袋入面唔好拎出黎...... 結果, 去到羅湖站就係B仔不知不覺間俾B仔媽掉咗落垃圾筒~

 

 

初初入到去四海一家, 都覺好似幾多嘢食咁, 但當行多兩轉就開始覺得又唔係咁多嘢啱/想食 @.@ 仲有...... 個D所謂既甜品... 難食到呢~~~~~~~~~~~~~ 仲衰過大飽口福!!! 大飽口福個D都叫做入到口, 四海一家個D, 真係食一啖吐一啖, 吞不下去!!!

 

咁就快快樂樂渡過一日family day~ ^^

嬉水樂

2.5.2010

 

今朝去咗大尾篤嘆茶, 之後諗住去踩單車, 點知太晏既關系, 無車位, 於是去咗新娘潭玩水~

 

天氣熱, 人又唔多, d水好冰涼, 好舒服呢~

 

 

初初B仔都有少少驚, 但好快就習慣, 仲玩水玩得非常開心~

 

 

 

見咁熱, 諗住除咗B仔條褲, 點知... 係都唔肯除... 結果, 玩濕咗條褲至肯除出黎晒乾... =.=""

 

 

支水實在太熱 (飲茶時沖咗樽熱水), 於是放咗係D水流下沖凍佢~ HAHA... 結果, 個樽同D石頭碰撞花晒~

 

 

玩完水去食個tea, 之後便返婆婆家~

B仔爸牛一快樂

1.5.2010

 

今朝等埋B仔爸放工就返屯門同公公婆婆太婆太嫲飲茶, 公公話有日放工回家叫B仔做Marco, B仔話唔係Marco, 我叫Jacko呀! 原來B仔已經知自己英文名叫Jacko!

 

飲完茶, 無地方去便回家, 今日B仔爸牛一, 去咗上水街巿買餸, 買餸期間, B仔父子就係車度等, 仲玩自拍... 俾B仔爸整古...

 

B仔媽買完餸返到去, B仔爸叫我睇相, 一禁到個蛋糕相, B仔媽醒覺兼大叫: 俾你睇到個蛋糕添................. 心諗, 好日B仔爸都唔會主動同B仔影相, 今日就抽唔知邊條根走去影相, 咁就俾佢發現咗原來既驚喜!!! 無晒癮~

 

 

食飽飯就一家三口慶牛一, 之但係似B仔牛一多過B仔爸呢~~~ HAHAHAHA......

 

病病...

31.3.2010

B仔尋晚發燒, 但食咗退燒藥又無燒, 日頭都無燒, 但穩陣起見, 還是去睇下陳醫生~ 婆婆帶B仔出黎睇, 五點半就睇完, B仔媽放工join婆婆, 公公過咗黎車我地一齊返屋企, 食埋晚飯, 公公婆婆便回家, 佢地明早去上海旅行呢~

今晚就係全職湊仔生涯的開始...

 

公園吹Bubble

28.3.2010

B仔爸要返工, B仔媽下晝就自己湊B仔返婆婆家, 之後一齊去公園吹bubble...

吹吹下自己跑黎跑去...

扁咀既樣就係咁... 好搞笑~

玩玩下扒係度唔知做乜?!

抺手準備走...

玩下呢個平行橋先~

返到婆婆屋企, 又走去睇魚... 晚晚B仔就係餵呢缸魚...

又拎個小丑眼鏡黎玩...

又係學校撞到

27.3.2010

尋日下午劉老師打電俾B仔媽, 話放學播音樂時, B仔興奮得濟, 撞咗去枱度, 撞損咗個咀, 劉老師係咁話唔好意思, B仔媽問劉老師B仔有無喪喊, 劉老師話只係喊咗一陣就無喊…

就係撞損個咀唇下面…… 好似多咗粒墨咁, HAHA…… 眼角返到黎屋企時唔知幾時整損… =.=”””

同妹妹一齊睇醫生

21.3.2010

 

尋晚B仔又黎料... 瞓到點幾兩點又黎合實雙眼喪喊半粒鐘以上, 又係問乜都唔係/唔要...... 真係人都癲呀!!! 成晚又咳...... 之後瞓到九點左右就醒, 嘈食奶...... 醒咗當然無返瞓啦~ B仔爸媽就真係...... 眼都挈唔開咁濟呀!!!

 

梳洗完就出門去食早餐, 落樓時咁啱遇到龍叔叔一個人去食早餐, 於是就一齊, 咁啱佢晏d帶澄澄妹妹去睇醫生, 於是我地又約埋一齊去睇, 呢幾晚B仔都係夜晚至黎啱, 日頭就無咳... 同埋試下呢頭個個陳醫生夾唔夾到B仔!

 

龍叔叔個工人Inn姨姨好鍾意撩B仔玩, 原來... Inn姨姨係鍾意仔多過女, HAHA...... 初初B仔都唔肯俾佢拖住行, 到後尾都肯... 仲同澄澄妹妹玩, 兩個笑到卡卡聲添~ HAHA... 好得意呀!

 

等睇醫生期間, 四圍閒逛, 食下嘢... 因為要等成個幾鐘至有得睇呀!!!

 

睇醫生時, B仔好鍾意玩個部港鐵火車, 一見就唔肯放手, 有個小朋友想玩, B仔係都唔肯讓人玩, 仲拎第二樣玩具俾個個小朋友玩添, 等佢唔好黎搶佢火車... 真係搞笑...

 

到見醫生時, 醫生話B仔可能有鼻敏感, 開咗D藥, 之後就一齊返屋企! B仔仲想去妹妹屋企玩, 但大家都要午睡啦~ 下次先啦~ 返到屋企玩咗陣就午睡, B仔媽都頂唔住來個午睡叉叉電! 瞓醒便返婆家!

 

B仔爸媽準備返屋企時, 公公抱住B仔, B仔扁晒咀仔咁呀... 唔開心... 唉... 雖然扁咀仔個樣好好笑, 但係... 唉... B仔媽都想B仔跟返我地住, 畢竟開始大個啦~~~ 相信B仔都好想跟返我地住! 好快... 過多幾個月啦~ B仔你仲要返N1呀! 媽咪交咗雜費同茶點費架~~~

扭計返屋企

19.3.2010

 

話說B仔爸今日要返工, B仔媽明天又要返工, 待放工至返婆家湊B仔, 點知...... 今晚放工返到屋企樓下, 睇完大夫, 正在圖書館之際... 婆婆打電急召B仔媽返娘家, B仔瞓瞓下覺無啦啦喪喊要搵媽咪.................... B仔媽唯有急急回家放低d嘢, 墊定包袱返娘家過夜..........

 

返到娘家, B仔見到B仔媽非常興奮~ 公公婆婆都異口同聲話B仔媽未黎之前, B仔同依家完全係兩個人, 見到B仔媽之後成個開心晒, 紥紥跳... 婆婆仲話B仔成個下晝唔肯午睡, 食奶又唔肯瞓係度食, 係都要坐係度食, 怕且B仔係驚瞓係度食會食食下瞓着覺吧!

 

B仔開始大個啦~ 知道逄星期五要坐BABA車, 要返媽咪屋企, 平日一至四都唔會有咁既反常表現, B仔媽應該開心, B仔識得要求要返屋企! 過多幾個月返K1時, B仔就長期跟返B仔媽啦~~ 到時希望B仔習慣啦~

想跟返工?!

13.3.2010

 

今朝B仔好早起床, B仔見B仔媽執袋準備返工, B仔邊入房邊話要換衫(去街), B仔媽話要返工, 見B仔媽着鞋, B仔又話要着鞋, B仔想跟埋B仔媽一齊返工呢~~~

 

B仔媽出門時, B仔想喊... B仔媽唯有話你未刷牙洗面, 婆婆即借D以同B仔去刷牙洗面, B仔媽至能夠順利出門返工... 事後打電俾婆婆, 話B仔一陣就無嘢囉~ HAHA...

 

到放工即join埋B仔爸一齊返娘家接B仔, 之但係... B仔又喪喊要婆婆跟埋一齊走......

 

 

之後去咗巿中心食嘢同埋閒逛咗一陣便返屋企買餸!

 

返屋企時, B仔好開心呢…

夜晚又同B仔媽玩影相…

古靈精怪…

同小狗搏鬥中…