30 Oct 2007
好耐都無試過瞓捉12hrs啦~~
瞓醒同張爹哋上咗深圳行咗陣, 跟住去咗按肩按腳兼揼骨, 都好耐好耐無俾人揼過啦~~
食埋晚飯就返歸, 本來打算返娘家照顧B仔, 但太夜, 所以無返到, 要婆婆辛苦多一晚啦~~
一日兩夜無見B仔啦, 好掛住佢呢~~ 咁耐無見我, 會唔會唔記得我呢?! 聽朝都係早d返娘家至得!!!
2007年10月31日 星期三
"UN咕" BB
29 Oct 2007
張B仔依家朝朝早瞓醒覺, 攤係張床度, 就鍾意人同佢傾計, 一同佢傾計佢就會好開心, 挈大個嘴仔笑, 好想同你講嘢咁, 有時會發出呀呀聲~~ Haha...... 
B仔得個零月大, 已經識 "UN咕" 啦~~ 之前扭計前奏就會 "UN咕", 跟手就大喊, 依家同佢傾計, 叫佢 "UN咕", 佢間唔吏都會講架~~ haha...
張B仔, 你個樣做乜咁搞笑架~~ Haha...... 
見到個仔咁得意, 真係有幾咁眼瞓, 幾咁攰, 幾咁辛苦都唔記得晒~~
今朝B仔淨咗篤大屎我嘆~~ 大pet之餘仲要係超嗅!!! 超眼瞓o既我同佢清潔兼換片時都俾佢嗅到精神為之一振, 當堂醒晒呀~~~~~~
今日同張爹哋去咗睇雪櫃同抽油煙機, 睇中咗部雪櫃, 但係新屋個度雪櫃同洗衣機係放埋一齊, 仲要空間有限, 我地已經有洗衣機, 所以要用部雪櫃黎就位, 但係我地睇中個部雪櫃又濶得濟, 左度右度, 無理由為咗個雪櫃而買過部洗衣機架~~
最衰又睇唔中其他, 結果都係未買! 都唔明點解家陣d雪櫃個冰箱做乜咁大, 大得黎無乜用至晒麻~~
之後去咗沙田宜家拎窗簾, 買埋餐枱, 食埋晚飯就去咗新屋砌枱!
第一次同B仔白白豬
26 Oct 2007
今日原本等張爹哋搞店新屋d嘢至黎娘家接我同張B仔返屋企, 點知下晝爸爸媽咪有急事要回鄉走一趟, 順路車咗我地返屋企!
返到屋企, 好忙呀! 
要煲水、蒸奶樽、湊B仔、抺地...... 真係一腳踢呀!
今日係我第一次自己一個人幫B仔沖涼呀! 成日都好想自己試下幫佢沖架, 終於有機會啦!
其實同佢沖涼都唔係好難! 不過B仔肚仔餓, 所以一邊沖, 間中佢就喊下~~ 沖完涼就咋咋臨開奶佢食! haha......
今日好勁呀! 唔止做以上d嘢, 我仲帶埋B仔去買餸添呀~~ 好耐無去過街巿啦! 另有一番感覺, 以前馱住B仔一齊去, 依家要咩住佢一齊去!
2007年10月28日 星期日
2007年10月27日 星期六
聽力測試
15 Oct 2007
今日12點帶咗B仔返健康院洗肚臍, 話說大前日俾人扎住咗個粒肉芽, 第二日條繩就甩咗! 今日返到健康院, 姑娘又幫佢扎, 不過今次難度高過上次, 因為個粒肉芽縮到好細粒(上次好大粒架~~)
今次我都無睇住姑娘扎, 我知自己實睇到佢喊自己又係度喊! 所以又係張先生睇住! 今次張先生幫姑娘手捉住B仔隻腳仔, 所以扎o既過程睇得好清楚, 佢都忍唔住, 實在覺得太殘忍, 眼濕濕咁行出黎門口, 抖一抖氣就入返去睇B仔!
因為下晝要做聽力測試, 所以係附近食完嘢逛咗一陣又返健康院! 今次見到張先生另一位同事, 佢好勁呀! 生咗對龍鳳胎, 已經兩個月大啦~~ 睇見佢就忙囉! 個爸爸餵完個仔食奶奶, 跟住就到媽咪餵個女食!
聽力測試結果非常好! 下次去健康院就係兩個月o既事囉~~
去到婆婆屋企, 換條片片時, 個條扎住肚臍粒肉芽o既繩又甩咗! 不過我同張先生都決定唔會再俾姑娘扎, 唔想B仔又再受埋d無謂o既痛楚! (姑娘講過唔扎都無問題, 唔會對BB健康有影響)
我地湊佢時就成日喊, 要人抱!
大頭媽媽生大頭仔
12 Oct 2007
今朝B仔要去健康院打乙型肝炎第二針, 去到健康院樓下咁啱遇到張先生o既同事, 佢個BB出世6日咋~~ 見到佢個BB咁細個, 就諗返起B仔初初出世個豬樣! 
去到健康院, B仔已經瞓到豬咁, 不知幾咁嘆~~ 因為全程有我呢個肥媽媽抱住佢麻~~ 係等候期間, B仔就醒咗, 張爹哋抱住佢, 唔知係咪抱得唔舒服, 無幾耐就扭計...
今日都搞咗好耐! 首先磅重, B仔有4.65kg~~ 好搞笑, 磅重要徐晒衫褲(因為張師奶第一次同B仔去健康院呢), 連片片都要徐埋, 今云真係俾人睇蝕晒囉~~
之後見姑娘, 因為B仔已經成個月大, 但肚臍仲有分泌, 結果姑娘叫我地去見醫生! 另外, 又度咗B仔個頭圍, 有成37cm, 姑娘以為自己度錯, 又再度一次, 度完又度我同張先生個頭圍! (我同張先生相差唔夠2cm呢~~)
原來B仔係大頭仔一名呢~~ 所以要度埋父母係咪大頭, 結果, 原來我屬大頭(真係今日至知自己係頭大呀!), 張先生就大少少, 所以生咗個大頭仔出黎~~
見完姑娘就見醫生, 醫生又度我地成家人o既頭 醫生仲話B仔個頭係100個BB之中係最大個個!
至於肚臍方面, 醫生話B仔肚腩粒肉芽大粒, 要扎住佢等唔好有血流入去, 扎住等佢謝, 咁就會好好多! 而粒肉芽係唔會影響B仔呢~~
見完醫生就去打針, 坐係打針房門口見十個有九個BB都係喊到收唔到聲出黎, 心諗B仔一定比佢地喊得更加利害, 因為B仔出世係醫院打個支卡介苗針, 姑娘抱住佢, 針都未吉入去佢已經喊到拆天, 打完仲喊到收唔到聲, 個次抱咗佢好耐至收聲呢~~ 所以仲諗住佢今次都唔會例外, 點知......................
我抱住佢入去, 不嬲唔怕打針唔怕抽血o既我仲驚個B仔, 姑娘叫我捉住B仔隻腳仔, 但我又驚支針吉咗入去B仔反抗我捉唔實佢, 唯有自己捉實d~~
眼見姑娘將支針吉入去, 雖然唔係吉我, 但個心都幾痛呀~~ 真係寧願佢吉我呀! 當然B仔喊到嘩嘩聲啦~~ 丫........... 佢今次又好叻仔喎! 出咗打針房就收晒聲! 出乎意料之外呢~~
打完針, 等咗一陣就去俾姑娘扎肚臍, 扎之前姑娘話都幾殘忍, 叫我係門口等, 於是張先生就睇住B仔, 而我就係門口老遠咁望住B仔~~ 期間聽到B仔喊到拆天, 心都痛埋呀~~~~~~
搞完一輪, 食埋支奶就返屋企, 咁就搞咗一個朝早呀!
第一次 "豆" 痾屎屎
10 Oct 2007
今日張B仔無痾屎屎, 所以夜晚婆婆試下 "豆" 佢痾, 丫~~ "豆豆" 下佢真係痾喎~~ 個樣仲要勁好笑!
呢個就係痾屎中o既B仔啦~~ 以後見到佢咁o既樣即係佢辦大事中! 唔好騷擾佢~~
唔知點解?! 佢人仔細細, 痾d屎嗅到丫~~~~~~~~~~~~~~ 下次 "豆" 佢真係要戴定口罩至得呀!
2007年10月22日 星期一
精神爽利
14 Oct 2007
張B仔啱啱沖完涼, 精神爽利呢~~
B仔就好啦~~ 日日有得沖涼洗頭! 而我就淨係可以沖涼!
大拿拿24日無洗過頭啦~~ 今日第25日, 終於頂唔順, 去咗髮型屋洗頭!
咁多日無洗, 若果自己洗真係有排洗兼自己要慢慢 "R", 俾人洗都係36蚊, 瞓係度洗之餘仲要有人幫你 "R", 零舍舒服~~ 加上髮型屋d風筒勁過家用果d, 吹乾都快d~~
入到髮型屋第一時間同佢講家陣坐緊月, 個姐姐仔果然快手, 洗又快, 吹頭又快~~
洗頭時至尷尬, 洗咗兩次連個姐姐仔都嘩咗一聲~~ 佢話要洗多一次至得! 有人服待都要洗成3次(再加一次護髮素), 自己洗咪有排至洗得乾淨?!
洗乾淨個頭果然零舍舒服~~ 爽呀!!!
訂閱：
意見 (Atom)